ইন্ধনৰ নাটনি হোৱা নাই দেশত। কিছুদিনৰ পৰা ইন্ধনৰ লগতে পেট্ৰ’ল-ডিজেলৰ নাটনি হ’ব বুলি উৰাবাতৰি বিয়পি পৰিছিল। ফলত ৰাজ্যৰ ভিন্ন পেট্ৰ’ল পাম্পত দেখা গৈছিল যথেষ্ঠ গ্ৰাহকৰ ভিৰ। কেৱল সেয়াই নহয়, ৰাজ্যৰ ভিন্ন প্ৰান্তত বিভিন্ন মূল্যত বিক্ৰি হৈ আছে LPG। কিন্তু এই বিপদৰ সময়তে মুখ্যমন্ত্ৰীয়ে ৰাইজক দিলে অভয়বাণী।
ইয়াৰ মাজতে মুখ্যমন্ত্ৰীয়ে ক’লে, “শেহতীয়াকৈ পশ্চিম এছিয়াত সৃষ্টি হোৱা অস্থিৰতাৰ পৰিপ্ৰেক্ষিতত বিশ্বজুৰি বৃদ্ধি পাইছে ইন্ধনৰ দাম, ব্যাহত হৈছে যোগান শৃংখলা। তথাপি ভাৰতৰ শক্তিখণ্ড সুদৃঢ় আৰু সুস্থিৰ হৈ আছে। ইয়াত অন্তর্নিহিত হৈ আছে এক শক্তিশালী নীতি, য’ত অসমৰো আছে এক বিৰাট ভূমিকা।
পশ্চিম এছিয়াত হোৱা সংঘাতৰ বাবে বিশ্বজুৰি খাৰুৱা তেল আৰু গেছৰ বজাৰত সৃষ্ট অনিশ্চয়তাৰ ফলত উৎপাদন, শোধন আৰু যোগান শৃংখলা প্ৰভাৱিত হৈছে যদিও ভাৰতে সুস্থিৰ যোগান ব্যৱস্থা, মূল্য নিয়ন্ত্ৰণ আৰু শক্তিখণ্ডৰ পৰিসৰ বিস্তাৰ কৰিবলৈ সক্ষম হৈছে। এই দিশত অসমে গুৰুত্বপূৰ্ণ ভূমিকা পালন কৰি এক উল্লেখযোগ্য সাফল্য হিচাপে অসমৰ পৰা আত্মপ্ৰকাশ কৰা অইল ইণ্ডিয়া লিমিটেডে ২৬ মাৰ্চ ২০২৬ত ১,৪৭,১৫৯ বি অ ই দৈনিক উৎপাদনৰ সৰ্বোচ্চ উৎপাদনৰ ইতিহাস ৰচিলে। ইয়াৰ আঁৰত আছে অভিলেখসংখ্যক ৭৩টা কুঁৱা খনন, ৩০০ উৎপাদন গোটৰ মেৰামতি আৰু পৰিচৰ্যা, তৈল ক্ষেত্ৰসমূহত কাৰ্যকৰী দক্ষতা বৃদ্ধি। লগতে একেদিনাই ৮০,০৬০ বেৰেল ক্ৰুড অইল উৎপাদনৰ অভিলেখ আছিল যোৱা ১০ বছৰৰ ভিতৰত সৰ্বোচ্চ দৈনিক উৎপাদন।
ই এটি প্ৰতিষ্ঠানৰ একক সাফল্য নহয়। ভাৰতৰ ৰাজহুৱা খণ্ডৰ শক্তি ব্যৱস্থাপনাতো এক নতুন গতিৰ প্ৰতিফলন। নুমলীগড় ৰিফাইনেৰী লিমিটেডৰ পৰা আৰম্ভ কৰি আন ৰাজহুৱা প্ৰতিষ্ঠানসমূহতো বিশ্বজুৰি প্ৰতিকূলতাৰ মাজতো স্বদেশী শক্তি ক্ষমতা বৃদ্ধি পাইছে।
ইয়াৰ ফলত উন্নত শক্তি সুৰক্ষা, বৈশ্বিক পৰিঘটনাৰ প্ৰভাৱৰ প্ৰতি তুলনামূলকভাৱে কম শংকা, স্বদেশী উৎপাদনত উৎসাহৰ জৰিয়তে আত্মনিৰ্ভৰ ভাৰতৰ লক্ষ্যত উপনীত হোৱাৰ দিশত ভাৰত দ্ৰুতগতিত আগুৱাইছে। মাননীয় প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়াৰ দূৰদৰ্শী নেতৃত্বত অসমে শক্তিখণ্ডৰ গৱেষণা, উৎপাদন আৰু শোধনাগাৰৰ বিকাশৰ বাবে প্ৰয়োজনীয় পৰিৱেশ, আন্তঃগাঁথনি আৰু নীতিগত সমৰ্থন প্ৰদান কৰি আহিছে আৰু ভাৰতৰ শক্তিখণ্ডক অধিক শক্তিশালী কৰি আছে। ভাৰতৰ বিকাশ যাত্ৰাত অসম এতিয়া অগ্রণী, সক্ৰিয় আৰু শক্তিশালী অংশীদাৰ।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
