বাইক-চাৰিচকীয়া বাহনৰ মালিকৰ বাবে সুখবৰ!

দেশজুৰি কোটি কোটি ব্যক্তিগত বাহন আৰু বাইকৰ স্বত্বাধিকাৰীৰ বাবে আহিছে এক স্বস্তিদায়ক খবৰ। কেন্দ্ৰীয় পথ পৰিবহণ আৰু ৰাজপথ মন্ত্ৰালয়ে (MoRTH) বাহনৰ প্ৰদূষণ নিয়ন্ত্ৰণ প্ৰমাণ পত্ৰ (Pollution Under Control Certificate – PUCC)-ৰ বৈধতাৰ নিয়মত এক ডাঙৰ পৰিৱৰ্তন আনিবলৈ প্ৰস্তুতি চলাইছে।
চৰকাৰে জাৰি কৰা এক খচৰা অধিসূচনা অনুসৰি, ৬ বছৰ পৰ্যন্ত পুৰণি BS6ৰ ব্যক্তিগত বাহনসমূহৰ PUC প্ৰমাণপত্ৰৰ বৈধতা বৰ্তমানৰ এবছৰৰ পৰিৱৰ্তে ৩ বছৰলৈ বৃদ্ধি কৰাৰ প্ৰস্তাৱ আগবঢ়োৱা হৈছে। এই নিয়ম কাৰ্যকৰী হ’লে গাড়ীৰ মালিকসকলে প্ৰতি বছৰে প’লিউচন চাৰ্টিফিকেট নবীকৰণ কৰিব নালাগিব।

বাহনৰ বয়স অনুসৰি BS6 বাহনৰ নতুন নিয়ম

খচৰা অধিসূচনা অনুসৰি BS6 বাহনৰ ক্ষেত্ৰত বয়সৰ ভিত্তিত পৃথক পৃথক নিয়মৰ প্ৰস্তাৱ দিয়া হৈছে—
৬ বছৰ পৰ্যন্ত পুৰণি BS6 গাড়ী: এতিয়া প্ৰতি বছৰে নহয়, ৩ বছৰত মাত্ৰ এবাৰ প্ৰদূষণ পৰীক্ষা কৰালেই হ’ব।
৬ৰ পৰা ১০ বছৰ পুৰণি BS6 গাড়ী: এই বাহনসমূহে প্ৰতি ১২ মাহত এবাৰ PUC প্ৰমাণ পত্ৰ নবীকৰণ কৰিব লাগিব।
১০ বছৰৰ অধিক পুৰণি BS6 গাড়ী: এই গাড়ীসমূহৰ বাবে প্ৰতি ৬ মাহত এবাৰ প্ৰদূষণ পৰীক্ষা কৰাটো বাধ্যতামূলক হ’ব।

BS-1ৰ পৰা BS-4 বাহনৰ বাবে কঠোৰ নিয়ম

এফালে নতুন BS6 গাড়ীৰ মালিকসকলে ডাঙৰ সকাহ পাব যদিও, আনফালে পুৰণি বাহনৰ ক্ষেত্ৰত নিয়ম অধিক কঠোৰ কৰাৰ প্ৰস্তাৱ দিয়া হৈছে। BS-4 (BS-IV) গাড়ী: সকলো BS4 গাড়ীয়ে প্ৰতি ৬ মাহত এবাৰ PUC নবীকৰণ কৰিব লাগিব।
BS-1, BS-2 আৰু BS-3 গাড়ী: এই শ্ৰেণীৰ সকলো বাহনৰ বাবে প্ৰতি ৩ মাহত এবাৰ প্ৰদূষণ পৰীক্ষা বাধ্যতামূলক কৰাৰ প্ৰস্তাৱ দিয়া হৈছে।

BS6 মান কি?

BS-ৰ সম্পূৰ্ণ অৰ্থ হৈছে Bharat Stage, যি বাহনৰ পৰা নিৰ্গত ধোঁৱা আৰু প্ৰদূষণৰ মাত্ৰা নিৰ্ধাৰণ কৰা এক মান। ইয়াৰ মূল উদ্দেশ্য হৈছে বায়ুত কাৰ্বন মন’অক্সাইড, নাইট্ৰজেন অক্সাইড আৰু অন্যান্য ক্ষতিকাৰক কণাৰ নিৰ্গমন নিয়ন্ত্ৰণ কৰা। এপ্ৰিল ২০২০ৰ পৰা কাৰ্যকৰী: ভাৰতত এপ্ৰিল ২০২০ৰ পৰা BS6 নিৰ্গমন মান কাৰ্যকৰী কৰা হয়। প্ৰদূষণ দ্ৰুতগতিত হ্ৰাস কৰাৰ লক্ষ্যৰে ভাৰত চৰকাৰে BS5 এৰি BS4ৰ পৰা পোনে পোনে BS6 মান গ্ৰহণ কৰিছিল। BS6 ইঞ্জিনত কম ছালফাৰযুক্ত ইন্ধন ব্যৱহাৰ কৰা হয়, ফলত এই বাহনসমূহে পুৰণি মডেলৰ তুলনাত যথেষ্ট কম প্ৰদূষণ সৃষ্টি কৰে।

নতুন নিয়ম কেতিয়াৰ পৰা কাৰ্যকৰী হ’ব?

বৰ্তমান এই নিয়মসমূহ কাৰ্যকৰী হোৱা নাই। কেন্দ্ৰীয় চৰকাৰে এতিয়ালৈ কেৱল খচৰা অধিসূচনাহে জাৰি কৰিছে। এই প্ৰস্তাৱৰ ওপৰত সাধাৰণ জনতাৰ পৰা পৰামৰ্শ আৰু আপত্তি বিচৰা হৈছে। সকলো মতামত পৰ্যালোচনা কৰাৰ পিছত চৰকাৰে চূড়ান্ত অধিসূচনা জাৰি কৰিব। যদি এই প্ৰস্তাৱে অনুমোদন লাভ কৰে, তেন্তে দেশৰ কোটি কোটি BS6 কাৰ আৰু বাইকৰ মালিকে প্ৰতি বছৰে প’লিউচন চাৰ্টিফিকেট নবীকৰণ কৰাৰ ঝামেলাৰ পৰা যথেষ্ট সকাহ লাভ কৰিব।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ