সহজ হৈ পৰিল কেদাৰনাথ যাত্ৰা, ৯ ঘণ্টাৰ পথ এতিয়া ৩০ মিনিটতে হ’ব সম্পূৰ্ণ
কেদাৰনাথ যাত্ৰা কৰিম বুলি ভাবি থকা ভক্ত সকললৈ আহিল এক সুখবৰ। এতিয়াৰে পৰা কেদাৰনাথ যাত্ৰা কৰিবৰ বাবে নালাগে ৯ ঘণ্টা সময়। মাথো ৩০ মিনিটতে পাব আপুনি আপোনাৰ গন্তব্য স্থ’ল।
ৰাষ্ট্ৰীয় ৰ’পৱে উন্নয়ন কাৰ্যসূচী – পাৰ্বতমালা প্ৰকল্পৰ অধীনত উত্তৰাখণ্ডৰ সোণপ্ৰয়াগৰ পৰা কেদাৰনাথলৈ ১২.৯ কিলোমিটাৰ দৈৰ্ঘ্যৰ ৰ’পৱে প্ৰকল্পৰ উন্নয়নৰ বাবে কেন্দ্ৰীয় কেবিনেটে অনুমোদন জনায়।
ইয়াৰ ফলত কেদাৰনাথলৈ যোৱাটো সহজ হৈ পৰিব। ইয়াৰ সমান্তৰালকৈ আন এটা প্ৰকল্প হেমকুণ্ড ৰ’পৱেইও কেবিনেটৰ অনুমোদন লাভ কৰিছে। আগতে যি দূৰত্ব অতিক্ৰম কৰিবলৈ ৯ ঘণ্টা সময় লাগিছিল, এতিয়া এই প্ৰকল্প সম্পূৰ্ণ হোৱাৰ পিছত মাত্ৰ আধা ঘণ্টা সময় লাগিব।
এই সন্দৰ্ভত তথ্য দি কেন্দ্ৰীয় মন্ত্ৰী অশ্বিনী বৈষ্ণৱে কয় যে এই প্ৰকল্পৰ আটাইতকৈ ডাঙৰ সুবিধা হ’ব যে বৰ্তমান ৮-৯ ঘণ্টাৰ যাত্ৰা ৩০ মিনিটলৈ হ্ৰাস পাব। এই ৰ’পৱেত এটা সময়ত ৩৬ জন লোক বহিব পৰা যাব।
এই প্ৰকল্পৰ বাবে হেমকুণ্ডলৈও সহজলভ্য হৈ পৰিল। হেমকুণ্ড প্ৰকল্পৰ বাবে ২৭৩০ কোটি টকাৰ অনুমোদন। সোণপ্ৰয়াগ আৰু কেদাৰনাথৰ মাজত এটা ৰ’পৱেও নিৰ্মাণ কৰা হ’ব। ইয়াৰ দ্বাৰা কেদাৰনাথলৈ যোৱাটো অতি সহজ হৈ পৰিব। কেদাৰনাথ ৰ’পৱে প্ৰকল্পৰ বাবে কেবিনেটে অনুমোদন জনাইছে ৪০৮১ কোটি টকা।
সোণপ্ৰয়াগৰ পৰা কেদাৰনাথলৈ ৰ’পৱে প্ৰকল্পটো ডিজাইন, বিল্ড, ফাইনেন্স, অপাৰেট এণ্ড ট্ৰেন্সফাৰ (ডিবিএফঅ’টি) মোডত বিকশিত কৰা হ’ব। ২০২২ চনৰ অক্টোবৰ মাহত প্ৰথমবাৰৰ বাবে “পাৰ্বতমালা প্ৰকল্প” কাৰ্যসূচীৰ অধীনত এই প্ৰকল্পৰ কথা ঘোষণা কৰা হৈছিল, প্ৰকল্পটোৰ মূল উদ্দেশ্য হৈছে দুৰ্গম পাহাৰীয়া অঞ্চলত পৰ্যটনক প্ৰসাৰিত কৰা।
পাব্লিক প্ৰাইভেট পাৰ্টনাৰশ্বিপত নিৰ্মাণ কৰাৰ পৰিকল্পনা কৰা হৈছে আৰু এই ৰ’পৱেটো আটাইতকৈ উন্নত ট্ৰাই-কেবল ডিটাচেবল গণ্ডোলা প্ৰযুক্তিৰ ওপৰত ভিত্তি কৰি নিৰ্মাণ কৰা হ’ব। এই ৰ’পৱে’ৰ মাজেৰে প্ৰতি ঘণ্টাত ১৮০০ যাত্ৰীয়ে এটা দিশত যাত্ৰা কৰিব পাৰিব, আনহাতে এদিনতে তেওঁলোকৰ সংখ্যা ১৮ হাজাৰৰো অধিক হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
