মধ্যবিত্তক পৰিত্ৰাণ দিয়াৰ বাবে কেন্দ্ৰীয় চৰকাৰে আসন্ন বাজেটত অৰ্থাৎ ২০২৫-২০২৬ৰ বাৰ্ষিক বাজেটত ১৫ লাখ টকা পৰ্যন্ত উপাৰ্জনকাৰীক আয়কৰ কমাব পাৰে বুলি এক সূত্ৰই প্ৰকাশ কৰিছে৷ এই খবৰ প্ৰকাশ কৰিছে ৰয়টাৰ্ছে৷ মন্থৰ প্ৰবৃদ্ধিৰ মাজত অৰ্থনীতিত ব্যৱহাৰ বঢ়োৱাৰ লক্ষ্য আগত ৰাখি এই পদক্ষেপ ল’ব পাৰে চৰকাৰে৷
ৰয়টাৰ্ছে জনাইছে যে ১ ফেব্ৰুৱাৰীত বাজেট অধিবেশনৰ সমসাময়িকভাৱে এই সিদ্ধান্ত ল’ব পাৰে চৰকাৰে৷ বিশিষ্ট অৰ্থনীতিবিদসকলেও প্ৰধানমন্ত্ৰী নৰেন্দ্ৰ মোদীক নাগৰিকৰ বোজা কমাবলৈ আয়কৰৰ হাৰ কমোৱাৰ আহ্বান জনাইছে৷ মঙলবাৰে প্ৰধানমন্ত্ৰী মোদীয়ে আসন্ন বাজেটৰ বাবে তেওঁৰ মতামত আৰু পৰামৰ্শ শুনিবলৈ NITI আয়োগত বিশিষ্ট অৰ্থনীতিবিদ আৰু ছেক্টৰেল বিশেষজ্ঞসকলৰ সৈতে দেখা কৰিছিল৷
বৈঠকত অৰ্থনীতিবিদ আৰু খ্যাতনামা কেইবাগৰাকীও বিশেষজ্ঞই আসন্ন বাজেটত আয়কৰ কমাবলৈ শুল্ক যৌক্তিককৰণ আৰু ৰপ্তানি সমৰ্থন কৰাৰ ব্যৱস্থা আৰম্ভ কৰাৰ বাবে চৰকাৰক অনুৰোধ জনোৱা বুলিও এক সূত্ৰই প্ৰকাশ কৰিছে৷ কেন্দ্ৰীয় বিত্তমন্ত্ৰী নিৰ্মলা সীতাৰমণে ১ ফেব্ৰুৱাৰী ২০২৫ত লোকসভাত ২০২৫-২০২৬ৰ বাজেট পেছ কৰাৰ কথা আছে৷ নিৰ্মলা সীতাৰমণে পূৰ্বে অৰ্থাৎ জুলাই মাহত ২০২৪-২০২৫ চনৰ শেষ বাজেটত আয়কৰ আইনৰ এটা ব্যাপক পৰ্যালোচনাৰ কথা ঘোষণা কৰিছিল৷
ইয়াৰ পৰিপ্ৰেক্ষিতত আয়কৰ বিভাগৰ প্ৰধান কমিছনৰ ভি কে গুপ্তাৰ নেতৃত্বত পৰ্যালোচনা কমিটি গঠন কৰা হৈছিল৷ ২০২৫-২৬ বাজেটৰ পূৰ্বে পেনেলে প্ৰতিবেদন জমা দিব বুলি আশা কৰা হৈছে৷ নতুন আই টি আইন, আসন্ন বাজেট অধিবেশনত উপস্থাপিত হোৱাৰ সম্ভাৱনা কম, কাৰ্ককৰ হ’বলৈ এবছৰতকৈ বেছি সময় লাগিবও পাৰে বুলি কেইবাটাও সূত্ৰই প্ৰকাশ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
