অসমবাসীৰ বাবে সুখবৰ। গুৱাহাটীৰ বৰঝাৰত অৱস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ নতুন টাৰ্মিনেলত এতিয়া যাত্ৰীসকলৰ সুবিধাৰ বাবে অসমীয়া ভাষাতো ৰাজহুৱা ঘোষণা কৰাৰ কথা আৰম্ভ কৰিছে।
ইয়াৰ পূৰ্বে নতুন টাৰ্মিনেলত কেৱল ইংৰাজী আৰু হিন্দী ভাষাত ঘোষণা কৰা হৈছিল। এই বিষয়টোক লৈ ৰাজ্যৰ বিভিন্ন মহলত আপত্তি কৰিছিল। গুৱাহাটী বিমান বন্দৰত ঘোষণাসমূহ অসমীয়া ভাষাতো কৰাৰ আহ্বান জনাইছিল অৱসৰ প্ৰাপ্ত IPS বিষয়া কুলধৰ শইকীয়াসহ ৩ আমোলায়। তেওঁলোকে পত্ৰ লিখিলে বিমান বন্দৰ কৰ্তৃপক্ষলৈ প্ৰেৰণ কৰিছিল। তেওঁলোকে কৰ্তৃপক্ষক স্মাৰকপত্ৰ প্ৰেৰণ কৰি কেন্দ্ৰীয় অসামৰিক বিমান পৰিবহণ মন্ত্ৰালয়ৰ নীতি অনুসৰি স্থানীয় ভাষা অন্তৰ্ভুক্ত কৰাৰ দাবী জনাইছিল।
তাৰ পিছতেই বিমানবন্দৰ কৰ্তৃপক্ষই অসমীয়া ভাষাৰ ঘোষণাৰ ব্যৱস্থা আৰম্ভ কৰে। জানিব পৰা মতে, স্বয়ংক্ৰিয় ঘোষণা ব্যৱস্থাত অসমীয়া শব্দৰ উচ্চাৰণ শুদ্ধভাৱে উপস্থাপন কৰিবলৈ বিশেষভাৱে পৰীক্ষা আৰু সংশোধনৰ ব্যৱস্থা কৰা হৈছিল।
অসমীয়া ভাষাত ঘোষণা আৰম্ভ হোৱাত স্থানীয় যাত্ৰীসকলৰ লগতে অসমৰ ভাষা-সংস্কৃতিৰ প্ৰতি সন্মান প্ৰদৰ্শনৰ এক ইতিবাচক পদক্ষেপ হিচাপে ইয়াক আদৰণি জনোৱা হৈছে। বিশেষকৈ জৰুৰীকালীন পৰিস্থিতিত স্থানীয় ভাষাত স্পষ্ট নিৰ্দেশনা লাভ কৰিলে যাত্ৰীসকলৰ বাবে যোগাযোগ অধিক সহজ আৰু ফলপ্ৰসূ হ’ব বুলি ধৰা হৈছে।
বিমানবন্দৰৰ নতুন টাৰ্মিনেলত অসমীয়া, হিন্দী আৰু ইংৰাজী—এই তিনিটা ভাষাতে ঘোষণা হোৱাত এতিয়া ৰাজ্যৰ নিজা ভাষাকো সম-মৰ্যাদা প্ৰদান কৰা হৈছে বুলি বিভিন্ন মহলে মত প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
