অসম লাইভ২৪ঃ দিল্লী অভিমুখে ৰাওনা হাজাৰ হাজাৰ কৃষক। আকৌ এবাৰ দিল্লী কঁপাবলৈ সাজু হৈছে দেশৰ কৃষক। দিল্লী অভিমুখী প্ৰতিবাদী কৃষকক বাধা দিবৰ বাবেই প্ৰশাসনো সম্পূৰ্ণৰূপে সাজু হৈ উঠিছে। দিল্লী অভিমুখী কৃষকক বাধা দিবৰ বাবে প্ৰশাসনে অনা প্ৰতিবন্ধকতাৰ ভিতৰত প্ৰধানকৈ সমগ্ৰ দিল্লীতেই ১৪৪ ধাৰা জাৰি কৰা হৈছে। ১৪৪ ধাৰা জাৰিৰ লগে লগেই মানুহ একত্ৰিত হোৱাত নিষেধাজ্ঞা আৰোপ কৰা হৈছে। কোনো ধৰণৰ ৰেলীৰ বাবে দিল্লীত অনুমতি দিয়া নহয় বুলিও প্রশাসনে স্পষ্টকৈ জনাই দিছে। ইয়াৰোপৰি দিল্লীৰ কোনো সীমান্তৰ পৰাই ট্ৰেক্টৰ-ট্ৰলীৰ প্ৰৱেশ নিষিদ্ধ। বাৰুদজাতীয় সামগ্ৰী, ইটা, শিল, পেট্ৰল, চ’ডা বটল লৈ প্ৰৱেশ কৰিব নোৱাৰিব দিল্লীত। লাউডস্পিকাৰৰ ব্যৱহাৰ সম্পূৰ্ণৰূপে নিষিদ্ধ কৰা হৈছে দিল্লীত। ইয়াৰোপৰি কোনোৱে যদি ১৪৪ ধাৰা উলংঘা কৰে তেন্তে তাৎক্ষণিকভাৱে গ্ৰেপ্তাৰ কৰাৰো নিৰ্দেশ জাৰি কৰিছে প্ৰশাসনে।
ডাঙৰ ডাঙৰ লাউডস্পীকাৰ আৰু কেমেৰা স্থাপন কৰা হৈছে প্ৰতিটো বৰ্ডাৰত। কৃষকক বাধা দিবলৈ ৰাস্তাত চিমেণ্টৰ বেৰিকেড স্থাপন কৰা হৈছে। কৃষক সংগঠনবোৰে দিল্লীত যাতে প্ৰৱেশ কৰিব নোৱাৰে তাৰ প্ৰতি লক্ষ্য ৰাখিয়েই সাৱধানতামূলক প্ৰস্তুতিসমূহ গঢ়ি তোলা লৈছে দিল্লীৰ আটাইকেইটা বৰ্ডাৰত। চাৰ্ভিছ ৰোডত দিল্লী আৰক্ষীয়ে কেইবাটাও তম্বুও স্থাপন কৰিছে।
২০০টা কৃষক সংগঠনৰ আহ্বানত দিল্লী অভিযান চলাবলৈ আগবাঢ়িছে পঞ্জাৱ, হাৰিয়ানাৰ হাজাৰ হাজাৰ কৃষক। মঙলবাৰে দিল্লী যাত্ৰাৰ বাবে পঞ্জাৱ, হাৰিয়ানাত হাজাৰ হাজাৰ কৃষক সমবেতও হৈছে। কৃষক সমবেত হোৱাৰ পূৰ্বেই দুখনকৈ ডাঙৰ ষ্টেডিয়ামত অস্থায়ী কাৰাগাৰ গঢ়ি তুলিছে হাৰিয়ানা চৰকাৰে। চিৰছাৰ চৌধুৰি দলবীৰ সিংহ ইন্দোৰ ষ্টেডিয়াম আৰু ডাবুয়ালিৰ গুৰু গোবিন্দ সিংহ ষ্টেডিয়ামত দুখনকৈ অস্থায়ী কাৰাগাৰ নিৰ্মাণ কৰা হৈছে। কৃষকৰ মিছিল আগুৱাই যাতে যাব নোৱাৰে তাৰবাবে প্ৰশাসন সম্পূৰ্ণৰূপে সাজু। ইপিনে কাৰাগাৰ নিৰ্মাণ কৰাৰ প্ৰধান উদ্দেশ্য হৈছে প্ৰতিবাদী কৃষকে যদি কোনো অপ্ৰীতিকৰ পৰিস্থিতিৰ সৃষ্টি কৰে তেন্তে তেওঁলোকক আটক কৰি সেই কাৰাগাৰত নিক্ষেপ কৰা হ’ব। এমাহৰ বাবে দিল্লীত কাৰফিউ বা ১৪৪ ধাৰা জাৰি থাকিব।
বিক্ষোভকাৰীয়ে যাতে অন্যান্য জিলাৰ পৰা হাৰিয়ানালৈ আহিব নোৱাৰে সেই উদ্দেশ্যেৰেই হাৰিয়ানাৰ আটাইকেইটা সীমান্তত সষ্টম হৈ আছে আৰক্ষী। অতিৰিক্তভাৱে ৫০ টা আৰক্ষীৰ বিশেষ কোম্পানী মোতায়েন কৰা হৈছে হাৰিয়ানাৰ আটাইকেইটা সীমান্তত। হাৰিয়ানাৰ মনোহৰ লাল খট্টৰ চৰকাৰে ইণ্টাৰনেট পৰিসেৱা বন্ধ ৰখাৰ বিজ্ঞাপ্তিও জাৰি কৰিছে। হাৰিয়ানা চৰকাৰে জাৰি কৰা বিজ্ঞাপ্তি অনুসৰি, ‘অশান্তিময় পৰিবেশৰ সৃষ্টি নহ’বৰ বাবেই অম্বালা, কুৰুক্ষেত্ৰ, কইথাল, জিন্দ, হিচাৰ, ফাতেহাবাদ আৰু চিৰছা জিলাত মঙলবাৰে নিশালৈকে মোবাইল ইণ্টাৰনেট পৰিসেৱা বন্ধ থাকিব। গ্ৰাহকে কেৱলমাত্ৰ ভয়েছ কল হে কৰিব পাৰিব।’ কৃষক বিদ্ৰোহক লৈ সতৰ্ক এইবাৰ দিল্লীও। দিল্লীৰ সীমান্তই সীমান্তই কংক্ৰিটৰ দেৱাল গঢ়ি তোলা হৈছে। অগণন আৰক্ষীয়ে টহল দি আছে দিল্লীৰ আটাইকেইটা সীমান্তত।
কৃষকসকলক দিল্লীত সোমোৱাত বাধা দিয়াক কেন্দ্ৰ কৰি কেন্দ্ৰীয় চৰকাৰক কঠোৰ সমালোচনা কৰিছে বিৰোধী দল আৰু কৃষক সংগঠনসমূহে। কংগ্ৰেছ নেতা প্ৰিয়ংকা গান্ধীয়ে দিল্লী সীমনাত এনে কটকটীয়া নিৰাপত্তা ব্যৱস্থা গঢ়ি তোলাক লৈ বিশেষ মন্তব্য কৰিছে। প্ৰিয়ংকাই এক বিশেষ ভিডিঅ’ শ্বেয়াৰ কৰি কৈছে, ‘কৃষক অহাৰ পথত এনে কাটা তাঁৰৰ বিচনা পাৰি দিয়াই অমৃত কাল নেকি? এয়াতো এক অৰ্থত অন্যায়কাল।’ ৰাস্তাত প্ৰতিবাদী কৃষকক বাধা দিবৰ বাবে পাৰি দিয়া কাঁইটক লৈ মন্তব্য কৰিছে সন্মিলিত কৃষক মৰ্চাৰ নেতা জগজিৎ সিং ডালেৱালে। তেওঁ এক ভিডিঅ’ বাৰ্তা শ্বেয়াৰ কৰি লিখিছে, ‘চৰকাৰে ইমান ভয় কিয় কৰিছে? বিশাল বেৰিকেড তৈয়াৰ কৰাৰ অৰ্থ কি? এয়া গণতন্ত্ৰ নেকি? পৰিস্থিতি বেয়া হ’লে ইয়াৰ বাবে কিন্তু চৰকাৰেই দায়ী হ’ব।’
পঞ্জাৱৰ মুখ্যমন্ত্ৰী তথা আম আদমী পাৰ্টীৰ নেতা ভগৱন্ত মানে দিল্লী আৰু হাৰিয়ানাৰ প্ৰৱেশ পথসমূহক ভাৰত-পাকিস্তান নিয়ন্ত্ৰণৰেখাৰ সৈতে তুলনা কৰিছে। তেওঁ কয়, ‘আমি কেন্দ্ৰক কৃষকৰ সৈতে আলোচনা কৰি তেওঁলোকৰ দাবীসমূহ মানি ল’বলৈ অনুৰোধ জনাম। পাকিস্তান সীমান্তৰ দৰে দিল্লী যোৱা ৰাস্তাসমূহত কাটা তাঁৰ পাৰি দিয়াটো একেবাৰেই ভুল কাম।’
কৃষকে প্ৰতিবাদ কৰাৰ প্রধান কাৰণসমূহ হৈছে, তেওঁলোকৰ ফচলৰ নূন্যতম সহায়ক মূল্যৰ গেৰাণ্টি দিয়া বিশেষ আইন, কৃষকৰ পেঞ্চন, শস্যবীমা আৰু তেওঁলোকৰ বিৰুদ্ধে থকা এফ আই আৰ বাতিলৰ দাবীত ১৩ ফেব্ৰুৱাৰীচ ‘দিল্লী চলো’ প্ৰতিবাদী মিছিলৰ ঘোষণা কৰিছে উত্তৰপ্ৰদেশ, পঞ্জাৱ আৰু হাৰিয়ানাৰ কৃষকে। একাধিক দাবী লৈ ৰাস্তাত নামি পৰিছে দেশৰ কৃষক। এই দাবীসমূহ মানি নল’লে পৰিস্থিতি বেয়া হ’ব বুলিও হুংকাৰ দিছে কৃষকে। ভাইৰেল খবৰ অনুসৰি ২০০তকৈয়ো অধিক কৃষকে এই আন্দোলনত চামিল হৈছে।
মঙলবাৰে ৰাজধানীত পদযাত্ৰা আৰু বিক্ষোভৰ পৰিকল্পনা কৃষকৰ। আকৌ এবাৰ ৰাজধানী দিল্লীৰ ৰাজপথ উত্তপ্ত হোৱাৰ আশংকা কৰিছে বহুজনেই। কেন্দ্ৰৰ তৰফৰ পৰা সোমবাৰে কৃষক সংগঠন কেইটাক আলোচনাৰ বাবে আহ্বান জনাইছিল কেন্দ্ৰীয় চৰকাৰে। কিন্তু আলোচনাত বহাৰ পূৰ্বেই হাৰিয়ানা চৰকাৰ আৰু দিল্লীত বান্ধি দিয়া বেৰিকেডহে চৰ্চাৰ কাৰণ হৈ পৰিছে।
উত্তৰপ্ৰদেশৰ নয়ডা আৰু গ্ৰেটাৰ নয়ডাৰ কৃষকে ক্ষতিপূৰণ বৃদ্ধিৰ দাবীত বিগত ডিচেম্বৰৰ পৰাই আন্দোলন আৰম্ভ কৰিছে। কিছুদিন পূৰ্বে প্ৰতিবাদী কৃষকে মহাপঞ্চায়তৰ বাবেও আহ্বান জনাইছিল। সেই সন্মীলনতেই তেওঁলোকে এই প্ৰতিবাদী মিছিলৰ সিদ্ধান্ত গ্ৰহণ কৰিছিল। ফচলৰ ক্ষতিপূৰণৰ দাবীত বৃহস্পতিবাৰে মিছিল কৰিছিল উত্তৰপ্ৰদেশৰ কৃষকে। উত্তৰপ্ৰদেশৰ প্ৰতিবাদী মিছিল দেখা মাত্ৰকেই দিল্লীৰ সমস্ত ৰাজপথত ১৪৪ধাৰা জাৰি কৰে আৰক্ষীয়ে। ২৪ ঘণ্টাৰ বাবে ১৪৪ ধাৰা বলবৎ কৰা হৈছিল যদিও সেই সময় এতিয়া বঢ়াই এমাহ কৰা হৈছে।
উল্লেখ্য যে ২০২০ চনত কৃষক বিক্ষোভত উত্তাল হৈ উঠিছিল সমগ্ৰ দেশ। ইয়াৰ পাছৰে পৰাই উত্তৰ ভাৰতৰ ৰাজ্যসমূহত বিগত সময়চোৱাত চেগাচোৰোকাকৈ প্ৰতিবাদ চলিয়েই আছে। সেই আন্দোলনেই এতিয়া ভয়ংকৰ হৈ উঠিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
