ভোলে বাবা সন্দৰ্ভত বন্ধুই প্ৰকাশ কৰিলে ডাঙৰ তথ্য, আশ্ৰমত ৩০-৪০ গৰাকী কন্যা ….
হাথৰছৰ সুৰজপাল সিং ওৰফে ভোলে বাবাৰ দৰবাৰত হোৱা ভয়াবহতাৰ বাবে ১২১ গৰাকী লোকে প্ৰাণ হেৰুৱা ঘটনাই আজিয়ো সেমেকাই তোলে । আৰক্ষীয়ে সেই দুৰ্ঘটনাৰ তদন্ত কৰিছে। এই দুৰ্ঘটনাৰ পিছত ভোলে বাবা ওৰফে সুৰজপালক লৈ ধাৰাবাহিকভাৱে নতুন নতুন তথ্য প্ৰকাশ পাই আছে।
এই তদন্ততে সুৰজপালৰ বন্ধু তথা দীৰ্ঘদিন ধৰি উত্তৰ প্ৰদেশৰ আৰক্ষীত কাম কৰা নজৰ সিং নামৰ এগৰাকী লোকে সংবাদ মাধ্যমৰ আগত সুৰজপালৰ বিষয়ে বহু ডাঙৰ ডাঙৰ কথা প্ৰকাশ কৰিছে। বন্ধু গৰাকীয়ে কয় যে, তেওঁ বাবাক বহুদিনৰ পৰা চিনি পায়। তেওঁলোকে একেলগে কাম কৰিছিল। পূৰ্বে সুৰজপালৰ কোনো ঐশ্বৰিক শক্তি নাছিল আৰু এতিয়া কোনো শক্তি নাই।
বাবাৰ বন্ধু নজৰ সিঙে লগতে ইয়াকো কয় যে, ‘আমি আগ্ৰাত একেলগে আছিলো। চাকৰিৰ সময়ত তেওঁৰ আধ্যাত্মিকতাৰ প্ৰতি কোনো প্ৰৱণতা নাছিল। তেওঁৰ পত্নীয়ে সকলোকে কৈছিল যে তেওঁ ভগৱান বিষ্ণুৰ অৱতাৰ। তেওঁ আৰু কয়, ‘বাবাই চাকৰি এৰি যোৱাৰ কাৰণৰ কোনো তথ্য তেওঁৰ হাতত নাই।
বন্ধুগৰাকীয়ে লগতে ইয়াকো কয় যে, ‘সুৰজপালৰ কোনো সন্তান নাছিল। যাৰ বাবে তেওঁ পত্নীৰ ভায়েকৰ কন্যাক দত্তক লৈছিল। কিন্তু পাছত হঠাৎ কোনো ৰোগৰ বাবে মৃত্যু হয়। তেতিয়া ভোলে বাবাই ভাল কৰিব বুলি দাবি কৰিছিল, কিন্তু দুদিন পিছত মৃতদেহটোৰ পৰা দুৰ্গন্ধ ওলাবলৈ ধৰে। যাৰ বাবে শেষত কন্যাৰ শেষ কৃত্য সম্পন্ন কৰা হয়।
সকলোতকৈ চাঞ্চল্যকৰ কথা যে, এবাৰ বাবাৰ আশ্ৰমলৈ যোৱাৰ সময়ত তাত ৩০-৪০ গৰাকী ছোৱালীয়ে নাচি থকা দেখা পাইছিল। বাবাই এই নৃত্য ওপৰৰ পৰা চাই আছিল। তাৰোপৰি আশ্ৰমত বাস কৰা অধিকাংশই মহিলা। যি সকল পুৰুষ আছিল সেয়া আশ্ৰমৰ বাহিৰতহে বাস কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
