গাৰ্লছ হোষ্টেলৰ বাথৰুমৰ ভিতৰত ভিডিঅ ৰেকৰ্ডিং হৈ থকা অৱস্থাত উদ্ধাৰ এটা মোবাইল ফোন। মোবাইল ফোন উদ্ধাৰ হোৱাৰ পিছতে সৃষ্টি হৈছে চাঞ্চল্য। এগৰাকী ছাত্ৰীয়ে বাথৰুমৰ টিনৰ চালৰ তলৰ এটা অংশত লুকুৱাই থোৱা অৱস্থাত উদ্ধাৰ কৰে মোবাইল ফোনটো। অভিযোগ অনুসৰি মোবাইল ফোনটোৰ কেমেৰা বাথৰুমৰ ফালে পোনাই থোৱা আছিল। এই ঘটনা সংঘটিত হৈছে উত্তৰ প্ৰদেশৰ মোহাদ্দিপুৰস্থিত এটা গাৰ্লছ হোষ্টেলত।
অভিযোগ অনুসৰি ছাত্ৰীগৰাকীয়ে প্ৰথমে নিজৰ মোবাইল ফোনেৰে সেই দৃশ্য ৰেকৰ্ড কৰে আৰু তাৰ পাছত হোষ্টেলৰ আন ছাত্ৰীসকলক বিষয়টো জনায়। মোবাইলটো পৰীক্ষা কৰাত বাথৰুমত কেইবাগৰাকীও ছাত্ৰীৰ ভিডিঅ’ ৰেকৰ্ডিং পোৱা গৈছে বুলি জানিব পৰা যায়। ইয়াৰ পাছতে এগৰাকী ছাত্ৰীয়ে ডায়েল ১১২ত ফোন কৰি আৰক্ষীক খবৰ দিয়ে। এই ঘটনা পোহৰলৈ আহিছে মঙলবাৰে নিশা। খবৰ পোৱাৰ পাছত নিশা প্ৰায় ১২ বজাত পিআৰভি আৰু কেণ্ট থানাৰ আৰক্ষী হোষ্টেলত উপস্থিত হয়। আৰক্ষীয়ে মোবাইলটো নিজৰ জিম্মাত লৈ ঘটনাৰ তদন্ত আৰম্ভ কৰে।
আৰক্ষীৰ সোধা-পোছাত মহিলা ৱাৰ্ডেনে কয় যে হোষ্টেলৰ বাথৰুমত ছেনিটেৰী পেড পেলাবলৈ ডাষ্টবিন ৰখা হৈছিল। কিন্তু কিছুমান ছাত্ৰীয়ে পেড ডাষ্টবিনত নেপেলাই ইফালে-সিফালে পেলাই দিয়াৰ অভিযোগ আছিল। ৱাৰ্ডেনৰ দাবী অনুসৰি, এই সমস্যাটো কোনে সৃষ্টি কৰিছে সেই বিষয়ে জানিবলৈ নিশা প্ৰায় ১০ বজাত মোবাইলটো ৰেকৰ্ডিং মোডত ৰখা হৈছিল। তেওঁ আৰক্ষীক লগতে কয় যে হোষ্টেলৰ সুৰক্ষাৰ বাবে চৌহদত চিচিটিভি কেমেৰাও স্থাপন কৰা আছে আৰু তেওঁৰ কোনো অসৎ উদ্দেশ্য নাছিল। অৱশ্যে, বাথৰুমৰ দৰে ব্যক্তিগত স্থানত মোবাইল ফোন ৰাখি ভিডিঅ’ ৰেকৰ্ডিং কৰাৰ অভিযোগক লৈ আৰক্ষীয়ে পৃথকভাৱে তদন্ত অব্যাহত ৰাখিছে। কিয়নো হোষ্টেলটোৰ ছাত্ৰীসকলে মোবাইল ফোনটোত কেইবাগৰাকীও ছাত্ৰীৰ ভিডিঅ পোৱা বুলি দাবী কৰিছে।
আৰক্ষী অধীক্ষক নিমিষ পাটিলে সংবাদমেলত জনোৱা মতে, ভুক্তভোগী ছাত্ৰীৰ লিখিত অভিযোগৰ ভিত্তিত মহিলা ৱাৰ্ডেনৰ বিৰুদ্ধে আইনী ব্যৱস্থা গ্ৰহণৰ প্ৰক্ৰিয়া আৰম্ভ কৰা হৈছে। আৰক্ষীয়ে জব্দ কৰা মোবাইল ফোন, তাত থকা ৰেকৰ্ডিং আৰু ঘটনাৰ সৈতে জড়িত অন্যান্য তথ্য পৰীক্ষা কৰি আছে। লগতে ভিডিঅ’বোৰ কিয় ৰেকৰ্ড কৰা হৈছিল আৰু সেইবোৰ কাৰোবাৰ সৈতে শ্বেয়াৰ কৰা হৈছিল নেকি, সেই বিষয়েও তদন্ত চলিছে। কিছুমান ভিডিঅ’ ভাইৰেল হোৱা বুলিও অভিযোগ উত্থাপিত হৈছে। আৰক্ষীয়ে এই ভিডিঅ’বোৰ কেনেদৰে বাহিৰলৈ গ’ল আৰু কোনো লোকে সেইবোৰ শ্বেয়াৰ কৰিছিল নেকি, সেই বিষয়টোও অনুসন্ধান কৰিছে। ঘটনাৰ সন্দৰ্ভত হোষ্টেলৰ মালিককো সোধা-পোছা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
