ৰাণু মণ্ডলক মনত আছেনে? এতিয়া কেনে আছে এসময়ৰ ভাইৰেল ৰাণু মণ্ডল?

আজিৰ পৰা ৭ বছৰ আগৰ কথা। নতুনকৈ ইণ্টাৰনেটৰ দুনীয়াখনে প্ৰাণ পাই উঠিছে। তেতিয়াই অৰ্থাৎ ২০১৯ত পশ্চিমবংগৰ এটা ৰে’লৱে ষ্টেশ্যনত গান গাই ভাইৰেল হৈছিল ৰাণু মণ্ডল। ইয়াৰ পিছত কেইবাটাও ৰাষ্ট্ৰীয় মনোৰঞ্জনধৰ্মী চেনেলেলৈও আমন্ত্ৰণ লাভ কৰিছিল ৰাণু মণ্ডলে। কেৱল সেয়াই নহয় বলীউডৰ প্ৰখ্যাত সংগীত পৰিচালক হিমেশ ৰেছমিয়াই এখন ছবিৰ এটা গানত কণ্ঠশিল্পী হিচাপে ভূমুকি মৰাৰো সুযোগ দিছিল ৰাণু মণ্ডলক। কিন্তু সময়ে যিদৰে একোজন মানুহক সুযোগ দিয়ে সেই সুযোগৰ সদ্ব্যৱহাৰ কৰিব নাজানিলে সময়ে এসময়ত সকলো কাঢ়িও নিব পাৰে। এসময়ত ধুমুহাৰ গতিত ভাইৰেল হোৱা ৰাণু মণ্ডল একেই গতিত নিচিহ্নও হৈ পৰিল।

ষ্টেশ্যনত গান গাই ভাইৰেল হৈ পৰা ৰাণু মণ্ডল সম্প্ৰতি পশ্চিমবংগৰ নদিয়া জিলাৰ ৰাণাঘাটৰ নিজ বাসভৱনত পূৰ্বৰ দৰেই জীৱন যাপন কৰি আছে। এসময়ত সকলোৰে আলোচনাৰ কেন্দ্ৰবিন্দু হোৱা ৰানু মণ্ডল এতিয়া তেওঁৰ দুটা কোঠাৰ এটা ঘৰত অকলশৰীয়াকৈ বাস কৰে। ওচৰ-চুবুৰীয়া দুই-এগৰাকী লোকে খবৰ লোৱা বাহিৰে এতিয়া আৰু কোনেও পূৰ্বৰ দৰে ৰাণু মণ্ডলৰ খবৰ নলয়। কোনেও এতিয়া পূৰ্বৰ দৰে ৰাণু মণ্ডলৰ প্ৰতি আগ্ৰহো নেদেখুৱায়। সম্প্ৰতি তেওঁ বিভিন্ন স্বাস্থ্যজনিত সমস্যাৰেও যুঁজি আছে। সৰু-সুৰা কেইবাটাও বেমাৰে প্ৰায়ে আমনি কৰি থাকে ৰাণু মণ্ডলক। জনপ্ৰিয়তা অৰ্জন কৰাৰ সময়ত যিদৰে ৰাণু মণ্ডল আৰ্থিকভাৱে হঠাতে স্বচ্ছল হৈ পৰিছিল। হঠাতে অহা জনপ্ৰিয়তাৰ দৰে যিদৰে ৰাণু মণ্ডলে আৰ্থিক স্বচ্ছলতাৰ মুখ দেখিছিল একেদৰে জনপ্ৰিয়তা নোহোৱা হোৱাৰ পিছত আৰ্থিক স্বচ্ছলতাও আগৰ দৰে দুৰ্বল হৈ পৰে ৰাণু মণ্ডলৰ। এতিয়া ৰাণু মণ্ডলৰ খবৰ লোৱা মানুহ প্ৰায় নাই বুলিয়েই ক’ব পাৰি। ৰাণু মণ্ডলৰ কোনো আত্মীয়ও বৰ্তমান তেওঁৰ কাষত নাই। সম্পূৰ্ণ নিসংগভাৱেই জীৱন সংগ্ৰাম চলাই নিছে ৰাণু মণ্ডলে। তেওঁ যিটো ঘৰত বাস কৰি আছে সেই ঘৰটোৰ অৱস্থাও অতি জৰাজীৰ্ণ হৈ পৰিছে। খাদ্য আৰু এমুঠি বস্ত্ৰৰ বাবেও ৰাণু মণ্ডলে এতিয়া সম্পূৰ্ণৰূপে আনৰ ওপৰতেই নিৰ্ভৰ কৰি চলিবলগীয়া হৈছে। অৱশ্যে মাজে সময়ে সৰু সৰু ইউটিউবাৰ আৰু ছ’চিয়েল মিডিয়া ইনফ্লুৱেঞ্চাৰে তেওঁক বিচাৰি তেওঁৰ বাসগৃহলৈ যায় আৰু সাধ্য অনুসাৰে কিছু সামগ্ৰী বা ধনেৰে সহায় কৰে।

হঠাতে অহা জনপ্ৰিয়তাক ধৰি ৰাখিব নোৱাৰৰ বাবে আক্ষেপ নকৰে ৰাণু মণ্ডলে। তেওঁ এই সন্দৰ্ভত কয় যে- জনপ্ৰিয় হোৱাৰ আগতেও মোৰ জীৱন সংগ্ৰামেৰেই পাৰ হৈছিল। এমুঠি ভাতৰ বাবেই আছিল সেই সংগ্ৰাম। এতিয়াও একেই ধৰণৰ জীৱন সংগ্ৰামেৰে মোৰ জীৱন অতিবাহিত হৈছে। গতিকে এনেধৰণৰ দৈনিকপঞ্জীত মই অভ্যস্ত। এজাক ধুমুহাৰ দৰে জনপ্ৰিয়তা আহিল আৰু গ’ল। অৱশ্যে জনপ্ৰিয়তাৰ সেই সময়ছোৱা ৰাণু মণ্ডলৰ জীৱনৰ সবাটোকৈ মূল্যৱান আৰু ভাল সময় বুলি মন্তব্য কৰে তেওঁ। সেই সময়ছোৱাত লগ পোৱা চিনাকি-অচিনাকি মানুহবোৰৰ পোৱা মৰমৰ কথা সুঁৱৰি কেতিয়াবা অকলশৰে থকা সময়খিনিত আৱেগিক হৈ পৰে ৰাণু মণ্ডল।

ৰাণাঘাটৰ বাসিন্দা ৰানু মণ্ডলৰ সৰুৰে পৰা সংগীতৰ প্ৰতি গভীৰ আগ্ৰহ আছিল। অৱশ্যে সৰুৰে পৰা এমুঠি ভাতৰ বাবে সংগ্ৰাম কৰি অহা ৰাণু মণ্ডলে কেতিয়াও লোৱা নাছিল সংগীতৰ আনুষ্ঠানিক শিক্ষা। ঘৰৰ ওচৰৰে সম্বন্ধীয় মাহীয়েক এগৰাকীৰ ঘৰত ৰেডিঅ’ত বাজি থকা গানবোৰ শুনিয়েই নিজে নিজে গান গাবলৈ শিকিছিল ৰাণু মণ্ডলে। তেওঁ লতা মংগেশকৰ, আশা ভোছলে, কিশোৰ কুমাৰ আৰু মহম্মদ ৰফীৰ গীত শুনি ডাঙৰ-দীঘল হৈছিল। কেৱল শুনাই নহয়, সেই গীতবোৰ লগে লগে তেওঁ নিজেও গাইছিল। সংগীতৰ প্ৰতি এই অনুৰাগেই পাছত তেওঁক ৰাণাঘাট ৰেলৱে ষ্টেচনৰ ইণ্টাৰনেটৰ বিশাল মঞ্চলৈ আগবঢ়াই দিয়ে। লতা মংগেশকাৰৰ ‘এক প্যাৰ কা নগমা হ্যায়’ গানটো ৰাণু মণ্ডলৰ অন্যতম প্ৰিয় গীত, যিটো গীতেৰেই তেওঁ এসময়ত লাভ কৰিছিল জনপ্ৰিয়তা।

এই প্ৰতিবেদন যুগুতাইছে মানসজ্যোতিয়ে