কেন্দ্ৰীয় চৰকাৰৰ কৰ্মচাৰীসকলৰ মাজত এতিয়া ৮ম দৰমহা আয়োগক লৈ ব্যাপক চৰ্চা চলিছে। নতুন দৰমহা আয়োগ কাৰ্যকৰী হোৱাৰ পিছত কৰ্মচাৰীসকলৰ দৰমহা কিমান বৃদ্ধি পাব, সেই বিষয়টোক লৈ বিশেষ আগ্ৰহ দেখা গৈছে। ইয়াৰ মাজতে আটাইতকৈ বেছি আলোচনা চলিছে ফিটমেণ্ট ফেক্টৰক লৈ। ফিটমেণ্ট ফেক্টৰ হৈছে এনে এটা গুণক, যাৰ জৰিয়তে পুৰণি মৌলিক দৰমহাৰ ভিত্তিত নতুন মৌলিক দৰমহা নিৰ্ধাৰণ কৰা হয়। ৭ম দৰমহা আয়োগত ২.৫৭ ফিটমেণ্ট ফেক্টৰ ব্যৱহাৰ কৰা হৈছিল। এতিয়া যদি ৮ম দৰমহা আয়োগতো একে ২.৫৭ ফিটমেণ্ট ফেক্টৰ ব্যৱহাৰ কৰা হয়, তেন্তে কৰ্মচাৰীসকলৰ মৌলিক দৰমহা যথেষ্ট বৃদ্ধি পাব পাৰে।
ফিটমেণ্ট ফেক্টৰ কেনেকৈ কাম কৰে?
সহজ ভাষাত ক’বলৈ গ’লে, পুৰণি মৌলিক দৰমহাক নিৰ্দিষ্ট ফিটমেণ্ট ফেক্টৰে গুণ কৰিলে নতুন মৌলিক দৰমহাৰ এটা সম্ভাব্য অংক পোৱা যায়। উদাহৰণস্বৰূপে, যদি কোনো কৰ্মচাৰীৰ বৰ্তমানৰ মৌলিক দৰমহা ১৮,০০০ টকা হয় আৰু ফিটমেণ্ট ফেক্টৰ ২.৫৭ ধৰা হয়, তেন্তে— ১৮,০০০ টকা × ২.৫৭ = ৪৬,২৬০ টকা। অৰ্থাৎ নতুন মৌলিক দৰমহা ৪৬,২৬০ টকা হ’ব পাৰে।
পিয়নৰ পৰা শিক্ষকৰ দৰমহালৈ কিমান হ’ব পাৰে?
৭ম দৰমহা আয়োগ অনুসৰি লেভেল-১ৰ কৰ্মচাৰী, যেনে পিয়ন বা MTSৰ আৰম্ভণিৰ মৌলিক দৰমহা ১৮,০০০ টকা। ২.৫৭ ফিটমেণ্ট ফেক্টৰ ধৰা হ’লে এই দৰমহা সম্ভাব্যভাৱে টকা ৪৬,২৬০লৈ বৃদ্ধি পাব পাৰে। একেদৰে লেভেল-৬ৰ প্ৰাথমিক শিক্ষক বা TGT শিক্ষকৰ আৰম্ভণিৰ মৌলিক দৰমহা ৩৫,৪০০ টকা। ২.৫৭ৰে গুণ কৰিলে— ৩৫,৪০০ টকা × ২.৫৭ = ৯০,৯৭৮ টকা। অৰ্থাৎ এই হিচাপ অনুসৰি মৌলিক দৰমহা প্ৰায় ৯১ টকা হাজাৰ হ’ব পাৰে।
লেভেল-১০ৰ বিষয়াৰ দৰমহা
লেভেল-১০ত নিযুক্ত বিষয়াৰ আৰম্ভণিৰ মৌলিক দৰমহা ৫৬,১০০ টকা। ২.৫৭ ফিটমেণ্ট ফেক্টৰ ধৰা হ’লে— ৫৬,১০০ টকা × ২.৫৭ = ১,৪৪,১৭৭ টকা। অৰ্থাৎ এই হিচাপ অনুসৰি লেভেল-১০ৰ বিষয়াৰ আৰম্ভণিৰ মৌলিক দৰমহা ১.৪৪ লাখ টকাৰো অধিক হ’ব পাৰে। মনত ৰখা প্ৰয়োজন যে ওপৰৰ অংকসমূহ কেৱল মৌলিক দৰমহাৰ সম্ভাব্য হিচাপ। কৰ্মচাৰীৰ প্ৰকৃত মাহিলী দৰমহা কেৱল বেচিক পে’ৰে নিৰ্ধাৰিত নহয়। ইয়াৰ সৈতে Dearness Allowance (DA), House Rent Allowance (HRA), Transport Allowance (TA) আদি বিভিন্ন ভাট্টা জড়িত থাকে। নতুন দৰমহা আয়োগ কাৰ্যকৰী হোৱাৰ সময়ত DAৰ পুনৰ নিৰ্ধাৰণ, HRA আৰু অন্যান্য ভাট্টাৰ ক্ষেত্ৰতো পৰিৱৰ্তন হ’ব পাৰে। সেয়েহে নতুন দৰমহাৰ প্ৰকৃত পৰিমাণ ফিটমেণ্ট ফেক্টৰৰ লগতে চৰকাৰে গ্ৰহণ কৰা অন্যান্য সিদ্ধান্তৰ ওপৰতো নিৰ্ভৰ কৰিব।
পেঞ্চনাৰসকলৰ বাবেও গুৰুত্বপূৰ্ণ
৮ম দৰমহা আয়োগৰ প্ৰভাৱ কেৱল কৰ্মৰত কেন্দ্ৰীয় চৰকাৰৰ কৰ্মচাৰীসকলৰ মাজতে সীমাবদ্ধ নাথাকিব। পেঞ্চনাৰসকলৰ পেঞ্চনতো ইয়াৰ প্ৰভাৱ পৰিব পাৰে। যদি ২.৫৭ ফিটমেণ্ট ফেক্টৰ ধৰা হয়, তেন্তে বৰ্তমানৰ ৯,০০০ টকা নূন্যতম পেঞ্চনৰ ক্ষেত্ৰত একে ধৰণৰ গাণিতিক হিচাপ কৰিলে— ৯,০০০ টকা × ২.৫৭ = ২৩,১৩০ টকা। অৰ্থাৎ নূন্যতম পেঞ্চন ২৩,১৩০ টকা হোৱাৰ সম্ভাব্য হিচাপ পোৱা যায়।
এতিয়াও চূড়ান্ত সিদ্ধান্ত হোৱা নাই
ইয়াত আটাইতকৈ গুৰুত্বপূৰ্ণ কথাটো হ’ল, ৮ম দৰমহা আয়োগত ২.৫৭ ফিটমেণ্ট ফেক্টৰেই চূড়ান্তভাৱে কাৰ্যকৰী হ’ব বুলি এতিয়াও নিশ্চিত হোৱা নাই। চৰকাৰে শেষত কিমান ফিটমেণ্ট ফেক্টৰ নিৰ্ধাৰণ কৰে, তাৰ ওপৰতেই কৰ্মচাৰী আৰু পেঞ্চনাৰসকলৰ প্ৰকৃত দৰমহা-পেঞ্চন বৃদ্ধি নিৰ্ভৰ কৰিব। সেয়েহে ৪৬,২৬০ টকা, ৯০,৯৭৮ টকা বা ১,৪৪,১৭৭ টকা আদি অংকক সম্ভাব্য হিচাপ হিচাপেহে চাব লাগে, নিশ্চিত নতুন দৰমহা হিচাপে নহয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
