প্ৰায় সমাপ্তিৰ দিশে আগবাঢ়িছে ১০০ দিন সম্পূৰ্ণ কৰা ইৰান-আমেৰিকাৰ যুদ্ধ। যুদ্ধৰ প্ৰভাৱত বিশ্বৰ প্ৰায় বহুকেইখনত দেশতেই বাঢ়িছিল অত্যাৱশ্যকীয় সামগ্ৰীৰ দাম। আন্তঃৰাষ্ট্ৰীয় তেলৰ বজাৰত দ্ৰুত হাৰত বৃদ্ধি হোৱা দামেই আছিল ইয়াৰ অন্যতম কাৰণ। কাৰণ যিকোনো সামগ্ৰী কঢ়িয়াবলৈ হলেও লাগিব ইন্ধন। ইয়াৰ উপৰিও হৰমুজ ষ্ট্ৰেইট বন্ধ হৈ থকাৰ ফলতো সেই জলপথেৰে পাৰ হ’ব পৰা নাছিল আমদানি-ৰপ্তানি কৰা জাহাজ। এতিয়া মধ্যপ্ৰাচ্যৰ যুদ্ধ অৱসানৰ দিশে আগবঢ়াৰ লগে লগে দ্ৰুতহাৰত বৃদ্ধি হোৱা ইন্ধনৰ দাম পুনৰাই আগৰ স্বাভাৱিক অৱস্থালৈ ঘূৰি অহাৰ সম্ভাৱনা ব্যক্ত কৰা হৈছে।
যদি যুদ্ধৰ অৱসান ঘটে তেতিয়া ইন্ধনৰ দাম কমিবলৈ কিমান দিন লাগিব
শক্তি খণ্ডৰ বিশেষজ্ঞসকলৰ মতে যুদ্ধবিৰতি বা কোনো চুক্তি সম্পন্ন হ’লেও তেল আৰু পেট্ৰ’লৰ বৰ্ধিত মূল্য আৰু শক্তি যোগানৰ সংকট এদিনতে সমাধান নহ’ব। বিশ্বজুৰি চাহিদা পূৰণ কৰিব পৰাকৈ উৎপাদন আৰু যোগান ব্যৱস্থা পুনৰ স্বাভাৱিক অৱস্থালৈ ঘূৰাই আনিবলৈ শক্তি কোম্পানীসমূহক লাগিব পাৰে কেইবামাহো সময়। বিশেষজ্ঞসকলৰ মতে, কেঁচা তেলৰ পৰিবহণ আৰু শোধন প্ৰক্ৰিয়া স্বাভাৱিকতে মন্থৰ গতিত চলে। ইয়াৰ লগতে গুৰুত্বপূৰ্ণ জলপথসমূহেৰে জাহাজ চলাচলৰ সুৰক্ষা সম্পৰ্কীয় অনিশ্চয়তায়ো যোগান ব্যৱস্থা স্বাভাৱিক হোৱাত বাধাৰ সৃষ্টি কৰে। ফলস্বৰূপে, যিকোনো ইতিবাচক পৰিৱৰ্তনৰ প্ৰভাৱ বজাৰত তৎক্ষণাত দেখা নাযাব পাৰে। কেঁচা তেলেৰে ভৰ্তি বহু টেংকাৰ জাহাজ তিনিমাহতকৈ অধিক সময় ধৰি পাৰস্য উপসাগৰত আবদ্ধ হৈ আছে। সুৰক্ষাজনিত আশংকাৰ বাবে জাহাজসমূহ জলপথ ব্যৱহাৰ কৰি আগবাঢ়িব পৰা নাই। যুদ্ধ আৰম্ভ হোৱাৰ পূৰ্বে বিশ্বৰ প্ৰায় এক-পঞ্চমাংশ তেল আৰু পেট্ৰ’লৰ যোগান এই পথেৰেই চলিছিল।
উৎপাদনৰ স্থানৰ পৰা পেট্ৰ’ল ডিপোলৈ তেল পাবলৈ কিমান সময় লাগে?
S&P গ্ল’বেল এনৰ্জিৰ ফুৱেলছ এণ্ড ৰিফাইনিং ৰিচাৰ্চ বিভাগৰ গ্ল’বেল হেড ডেনিয়েল ইভান্সে এই সন্দৰ্ভত কয়, ‘বজাৰ আৰু ব্যৱসায়িক মহলক পুনৰ আত্মবিশ্বাসী অনুভৱ কৰিবলৈ আৰু বীমা ব্যৱস্থা স্বাভাৱিক হ’বলৈ সময় লাগিব। এতিয়া আবদ্ধ হৈ থকা জাহাজসমূহক প্ৰথমে জলপথসমূহ পাৰ হৈ ওলাই যাব লাগিব, তাৰ পিছত নতুন টেংকাৰসমূহ তেল ল’বলৈ ভিতৰলৈ আহিব লাগিব। কোনো জাহাজক ভিতৰলৈ অনাৰ আগতে এই বিশ্বাস থাকিব লাগিব যে তাক সুৰক্ষিতভাৱে ভিতৰলৈ আনিব, তেল ভৰাই পুনৰ বাহিৰলৈ উলিয়াই নিয়াৰ বাবে যথেষ্ট সময় আৰু সুৰক্ষাৰ প্ৰয়োজন আছে।’ তেলবাহী টেংকাৰ জাহাজ সাধাৰণতে অত্যন্ত ধীৰ গতিত চলে গতিকে সাগৰীয় পথেৰে গন্তব্য স্থান পাবলৈ যথেষ্ট সময় লাগে। ইয়াৰ পিছত কেঁচা তেল শোধনাগাৰত শোধন কৰি পেট্ৰ’ল-ডিজেল ডিপোসমূহলৈ পঠিওৱা প্ৰক্ৰিয়াৰ বাবেও যথেষ্ট সময়ৰ প্ৰয়োজন। ইয়াৰ উপৰিও, পশ্চিম এছিয়াৰ কেইবাটাও তেল উৎপাদক দেশে সংৰক্ষণাগাৰৰ স্থান পূৰ্ণ হৈ যোৱাৰ বাবে উৎপাদন সাময়িকভাৱে বন্ধ কৰি দিছিল। সেই উৎপাদন পুনৰ সম্পূৰ্ণ গতিত আৰম্ভ কৰাটোও এটা জটিল আৰু সময়সাপেক্ষ প্ৰক্ৰিয়া। সেয়েহে, যুদ্ধবিৰতি বা চুক্তি হ’লেও বিশ্বৰ শক্তি বজাৰ তৎক্ষণাত স্বাভাৱিক হোৱাৰ সম্ভাৱনা কম বুলি বিশেষজ্ঞসকলে মত প্ৰকাশ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
