চকুৰ তলত ক’লা বৃত্ত বা Dark Circle হোৱা এটা সাধাৰণ সমস্যা। সাধাৰণতে চকুৰ তলৰ ছালখন মুখৰ আন অংশৰ তুলনাত ক’লা দেখা গ’লে এই সমস্যাটো লক্ষ্য কৰা যায়। কম টোপনি, অধিক ভাগৰ, মানসিক চাপ, বেছি সময় মোবাইল বা কম্পিউটাৰ ব্যৱহাৰ, বয়স বৃদ্ধি আৰু বংশগত কাৰণত Dark Circles হ’ব পাৰে।
ইয়াৰ উপৰি এলাৰ্জী, সঘনাই চকু ঘঁহা, অত্যধিক ৰ’দত থকা, পানীৰ অভাৱ আৰু চকুৰ তলৰ ছাল পাতল হোৱাৰ বাবেও ক’লা বৃত্ত দেখা দিব পাৰে। যিকোনো বয়সতে এই সমস্যা হ’ব পাৰে যদিও বয়স বঢ়াৰ লগে লগে ই অধিক স্পষ্ট হৈ পৰিব পাৰে।
পৰ্যাপ্ত টোপনি লওক
ক’লা বৃত্ত কমাবলৈ পৰ্যাপ্ত টোপনি অতি গুৰুত্বপূৰ্ণ। ক্লিভলেণ্ড ক্লিনিকৰ মতে, প্ৰতিদিনে কমেও ৭ ঘণ্টা টোপনি ল’বলৈ চেষ্টা কৰিব লাগে। টোপনিৰ অভাৱৰ বাবেই যদি Dark Circle হৈছে, তেন্তে ভালদৰে টোপনি ল’লে এই সমস্যা কিছু পৰিমাণে কমিব পাৰে। লগতে মোবাইল, কম্পিউটাৰ বা আন স্ক্ৰীনৰ সন্মুখত বেছি সময় কটোৱা কমাব লাগে। মাজে মাজে চকুক জিৰণি দিয়াটোও উপকাৰী।
ঠাণ্ডা কম্প্ৰেছ ব্যৱহাৰ কৰিব পাৰে
চকুৰ তলত কিছু সময়ৰ বাবে ঠাণ্ডা কম্প্ৰেছ বা ঠাণ্ডা চামুচ ৰাখিব পাৰে। ইয়াৰ ফলত চকুৰ চাৰিওফালে হোৱা ফুলি উঠা কিছু পৰিমাণে কমিব পাৰে আৰু ক’লা বৃত্তৰ উপস্থিতিও সাময়িকভাৱে কম যেন দেখা যাব পাৰে।
তিয়ঁহৰ টুকুৰা ব্যৱহাৰ কৰিব পাৰে
চকুৰ ওপৰত শীতল তিয়ঁহৰ টুকুৰা কিছু সময় ৰাখিলে চকুৰ চাৰিওফালে থকা ভাগৰুৱা ভাব আৰু ফুলি উঠা কিছু পৰিমাণে কমিব পাৰে। তিয়ঁহত পানীৰ পৰিমাণ বেছি থকাৰ বাবে ই ছালখন সতেজ অনুভৱ কৰাত সহায় কৰিব পাৰে। অৱশ্যে ইয়াক Dark Circleৰ নিশ্চিত চিকিৎসা বুলি ধৰা উচিত নহয়।
চকু সঘনাই ঘঁহিব নালাগে
চকুত খজুৱতি বা এলাৰ্জী হ’লে বহুতে বাৰে বাৰে চকু ঘঁহে। এনে কৰিলে চকুৰ তলৰ কোমল ছালত জ্বলা-পোৰা বা প্ৰদাহ হ’ব পাৰে আৰু ক’লা বৃত্ত অধিক স্পষ্ট হৈ পৰিব পাৰে। সেয়েহে চকু ঘঁহাৰ অভ্যাস পৰিহাৰ কৰা উচিত।
কেতিয়া চিকিৎসকৰ পৰামৰ্শ ল’ব?
সাধাৰণতে Dark Circle কোনো গুৰুতৰ ৰোগৰ লক্ষণ নহয়। কিন্তু কেৱল এটা চকুৰ তলতহে ক’লা বৃত্ত বা ফুলি উঠা দেখা দিলে চিকিৎসকৰ পৰামৰ্শ লোৱাটো গুৰুত্বপূৰ্ণ। চকুৰ তলত অত্যধিক ফুলি উঠিলেও বিষয়টো পৰীক্ষা কৰোৱা উচিত। চিকিৎসকে Dark Circleৰ প্ৰকৃত কাৰণ নিৰ্ণয় কৰি প্ৰয়োজন অনুসৰি চিকিৎসা পৰামৰ্শ দিব পাৰে। ক’লা বৃত্ত কমাবলৈ বিভিন্ন ধৰণৰ ক্ৰীম বা চিকিৎসা পদ্ধতি আছে যদিও চিকিৎসকৰ পৰামৰ্শ নোলোৱাকৈ নিজে কোনো ক্ৰীম বা ঔষধ ব্যৱহাৰ কৰা উচিত নহয়।
সুস্থ জীৱনশৈলী, পৰ্যাপ্ত টোপনি, স্ক্ৰীন টাইম কমোৱা, চকু নঘঁহা আৰু ছালৰ সঠিক যত্ন লোৱাৰ অভ্যাসে Dark Circlesৰ সমস্যা কিছু পৰিমাণে নিয়ন্ত্ৰণ কৰাত সহায় কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
