পত্নীহন্তা বুলি শাস্তি হিচাপে বহু মাহ ধৰি কাৰাগাৰত কটালে স্বামীয়ে, এতিয়া সোঁশৰীৰে উপস্থিত পত্নী, হতভম্ব আৰক্ষীয়ো
অপহৰণ আৰু হত্যাৰ অভিযোগত স্বামীয়ে ৩৪ মাহ ধৰি কাৰাবন্দী জীৱন কটালে। পাছে এতিয়াও জীয়াই আছে পত্নী। সেই একেটা গোচৰতে বোৱাৰীগৰাকীৰ শাহুৱেকও সাত মাহ ধৰি কাৰাগাৰত থাকি অযথা শাস্তি ভুগিব লগা হয়। পাছে সোঁশৰীৰে পত্নীগৰাকী উপস্থিত হোৱাত আচৰিত হৈ পৰিছে আৰক্ষী। সম্পূৰ্ণ সুস্থ হৈ আছে পত্নীগৰাকী।
বিহাৰৰ গোপালগঞ্জৰ এই ঘটনাই এতিয়া সমগ্ৰ অঞ্চলতে চাঞ্চল্যকৰ সৃষ্টি কৰিছে। প্ৰেমিকৰ সৈতে জীৱিত অৱস্থাত উদ্ধাৰ হৈছে মহিলাগৰাকী। আৰক্ষীয়ে উত্তৰ প্ৰদেশৰ বলিয়াৰ পৰা উদ্ধাৰ কৰিছে মহিলাগৰাকীক।
বিয়াৰ পাছতে সুখৰ সংসাৰ আছিল লতা দেৱী আৰু সুনীল চৌহানৰ। বিয়াৰ পিছত দুগৰাকী কন্যা সন্তানৰো মাতৃত্ব লাভ কৰে। কিন্তু পাছলৈ সংসাৰত কেনা লাগে। ২০১৬ চনত মহিলাগৰাকীয়ে স্বামী আৰু শহুৰেকৰ বিৰুদ্ধে হাৰাশাস্তিৰ গোচৰ ৰুজু কৰে।
তাৰ পাছতে হঠাতে নোহোৱা হৈ পৰে পত্নী। বহু গোচৰ, বহু বিচাৰ-খোচাৰ, তালাচী চলোৱা হৈছিল। ২০২১ চনৰ ২৫ জুলাইত আৰক্ষী থানাত এফআইআৰ দাখিল কৰা হৈছিল। এই গোচৰত মহিলাগৰাকীৰ স্বামী সুনীল চৌহান, তিনিগৰাকী দেওৰ আৰু শাহুৱেকসহ মুঠ পাঁচজন লোকক অভিযুক্ত কৰি কাৰাগাৰলৈ প্ৰেৰণ কৰা হৈছিল।
অৱশেষত কিছু তথ্যৰ ভিত্তিত উত্তৰ প্ৰদেশৰ বালিয়াৰ পৰা নিৰুদ্দিষ্ট লতা দেৱীক আৰক্ষীয়ে ধৰে। যি লতা দেৱীক হত্যা কৰি পুতি থোৱা বুলি ধৰা হৈছিল, সেই লতা দেৱীত জীৱিত দেখি আৰক্ষীয়ে নিজেও আচৰিত হৈ পৰে।
আৰক্ষীয়ে সন্দেহ কৰা মতে, প্ৰেমজনিত কাৰণতে সংঘটিত হয় এই সমষ্ট ঘটনা। লতা দেৱীয়ে ঘৰৰ পৰা পলাই গৈ দ্বিতীয়বাৰৰ বাবে বিয়া পাতে। কিন্তু লতা দেৱীয়ে জনোৱা অনুসৰি, স্বামীৰ পৰিয়ালে যৌতুকৰ বাবে অত্যাচাৰ কৰাৰ বাবেই পলাই গৈছিল । বাটতে লগ পাইছিল এতিয়াৰ প্ৰেমিক তথা স্বামীক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
