পশ্চিমবংগ গেৰুৱা হ’ল৷ আগন্তুক ৯মে ৰবীন্দ্ৰ জয়ন্তীৰ দিনাই শপত গ্ৰহণ কৰিব নতুন চৰকাৰে. অৱসান ঘটিল দীৰ্ঘ ১৫ বছৰীয়া তৃণমূল শাসনৰ. পশ্চিমবংগ বিধানসভা নিৰ্বাচনত একক সংখ্যাগৰিষ্ঠতা লাভ কৰিব প্ৰথমবাৰৰ বাবে চৰকাৰ গঢ়িব বিজেপিয়ে৷ আৰু এই শিবিৰৰ অন্যতম আলোচিত প্ৰাৰ্থী আছিল আৰ জি কৰৰ নিৰ্যাতিতাৰ মাতৃ ৰত্না দেৱনাথ৷ পানিহাটি কেন্দ্ৰৰ পৰা জয়ী হৈছে তেওঁ৷ সদ্য নিৰ্বাচিত এই বিধায়কৰো লক্ষ্য স্থিৰ৷ দুৰ্নীতিৰ বিৰুদ্ধে যুঁজ কৰাৰ হুংকাৰ দিছে তেওঁ৷
মমতা বেনাৰ্জীৰ মনোনীত তৃণমূল প্ৰাৰ্থী তীৰ্থাংকৰ ঘোষক বৃহৎ ব্যৱধানত পৰাজিত কৰি বিধানসভালৈ আহিছে ৰত্না দেৱনাথ৷ ভোট গণনা শেষ হোৱাৰ পাছতেই আৰ জি কৰৰ নিৰ্যাতিতাৰ মাতৃয়ে কয়, ‘এই জয় তেওঁলোকৰ বাবে উৎসৰ্গিত, এই জয় পানিহাটীৰ সমগ্ৰ মানুহ, আমাৰ সহকৰ্মী আৰু দলীয় কৰ্মীসকলৰ বাবে উৎসৰ্গিত যিয়ে আমাক অবিৰাম সমৰ্থন কৰি আহিছে৷ মই পূৰ্বেই কৈছিলো যে আমি পানিহাটীক ঘোষ পৰিয়ালৰ পৰা মুক্ত কৰিব কৰিব খোজো আৰু মই সেয়া কৰিম৷
আমি তৃণমূল কংগ্ৰেছক নৰ্দমাৰ ওপৰত পেলাই দিয়াৰ প্ৰতিশ্ৰুতি দিছিলো৷ গংগাত নহয়, কাৰণ তাৰ পানী দূষিত হব৷ মই ৩০,০০০ ভোটৰ ব্যৱধানত এই নিৰ্বাচনী যুঁজত জয়ী হৈছো৷ মই এই জয় প্ৰধানমন্ত্ৰী মোদীক উৎসৰ্গা কৰিম৷ মোৰ কন্যাই মা দুৰ্গাক খুব ভালপাইছিল৷ সেয়ে বাংলাত পদুম ফুলিছে৷ বহুতে মোক তিৰস্কাৰ কৰিছিল কিন্তু বাংলাৰ মানুহে তাৰ যোগ্য জবাব দিছে৷
ৰত্না দেৱনাথে জয়ৰ পাছতেই মমতা বেনাৰ্জিক উদ্দেশ্যি কৈছে, ‘মই তেওঁ আৰু তেওঁৰ ভাতৃ পুত্ৰ অভিষেক বেনাৰ্জীক জে’লত দেখিব খোজো. মমতা মুখ্যমন্ত্ৰী, স্বাস্থ্যমন্ত্ৰী আৰু গৃহমন্ত্ৰী আছিল কিন্তু মোৰ কন্যাৰ মৃত্যুৰ ন্যায় দিব নোৱাৰিলে৷ মোৰ কন্যাৰ মৃত্যুৰ ন্যায়বিচাৰৰ প্ৰথম ঢাপ মই পাৰ কৰিছো৷ আমাৰ সমাজত নাৰী নিৰাপদ নহয়৷ মমতা বেনাৰ্জীয়ে নিজেই নিৰ্দেশ দিছিল যে নিশা ৮ বজাৰ পাছত মহিলাসকল ঘৰৰ বাহিৰলৈ যোৱা উচিত নহয়৷ আমি সেই পৰিস্থিতিৰ পৰা মুক্তি পালো৷’
ইয়াৰোপৰি ৰত্না দেৱনাথে সংবাদমাধ্যমৰ আগত কয়, ‘এই জয় মই প্ৰথমেই প্ৰধানমন্ত্ৰী নৰেন্দ্ৰ মোদীক উৎসৰ্গা কৰিব খোজে৷ বাংলাৰ বহু লোকৰ অভিযোগ, চাকৰি নাই, স্কুলসমূহত তলা লাগিছে, কৈছিলো তৃণমূলক মূল উভালি পেলাম, সেয়া কৰিব পাৰিছো৷ পানিহাটীৰ পৰা ঘোষ পৰিয়ালৰ থ্ৰেট কালচাৰ এতিয়া আৰু চলিবলৈ দিয়া নহ’ব৷ ভয়ৰ ৰাজনীতি, দুৰ্নীতিৰ পৰা পানিহাটিক মুক্ত কৰিব পাৰিম বুলি বিশ্বাস৷’
বিধানসভালৈ গৈ প্ৰথমে কি কাম কৰিব সেয়াও স্পষ্টকৈ জনালে আৰ জি কৰৰ নিৰ্যাতিতাৰ মাতৃয়ে৷ তেওঁ কয়, ‘মোৰ কনাই যি দুৰ্নীতিৰ বাবে মাত মাতি জীৱন দিলে সেই স্বাস্থ্য দফতৰৰ দুৰ্নীতি কিমান গভীৰ সেয়া বিচাৰি ওলিয়াম৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
