ঋষভ পণ্টৰ ঠাইত অন্য খেলুৱৈয়ে পাৰিব নে খেলিব, কি কয় নিয়মে !
ইংলেণ্ডৰ বিৰুদ্ধে শৃংখলাৰ চতুৰ্থ টেষ্ট মেচৰ প্ৰথম দিনাই বেটিং কৰি থকা অৱস্থাত আঘাতপ্ৰাপ্ত হয় ঋষভ পণ্ট ৷ যাৰ ফলত খেলুৱৈগৰাকীক ততাতৈয়াকৈ এম্বুলেন্সৰ সহায়ত চিকিৎসালয়লৈ লৈ যোৱা হয় ৷ য’ত পণ্টৰ আঘাত স্কেন কৰা হ’ব ৷
বৰ্তমানে পণ্টে আঘাতৰ বাবে ‘ৰিটায়াৰ্ড হাৰ্ট’ লৈছে৷ কিন্তু এতিয়া প্ৰশ্ন উত্থাপন হৈছে যে যদি পণ্টৰ আঘাত গুৰুতৰ হয় তেন্তে টিম ইণ্ডিয়াই পণ্টৰ বিকল্প লাভ কৰিবনে?
ভাৰতীয় ইনিংছৰ ৬৮ নং অভাৰৰ চতুৰ্থ বলত আঘাতপ্ৰাপ্ত হৈছিল উইকেটকীপাৰ বেটছমেন ঋষভ পণ্ট ৷ ক্ৰীছ ৱ’কেছৰ বলত ৰিভাৰ্ছ ছুইপ খেলিব বিচাৰিছিল ঋষভ পণ্টে । কিন্তু বলটো বেটত নালাগি পোনে পোনে পণ্টৰ ভৰিত প্ৰচণ্ড জোৰে খুন্দা মাৰে ৷ যাৰ ফলত পণ্টৰ ভৰি লগে লগে ফুলি উঠাৰ লগতে তেজ বাহিৰ হয়।
কিন্তু এতিয়া যদি ঋষভৰ স্কেন ৰিপোৰ্টত সকলো ঠিকে নাথাকে আৰু পণ্ট পুনৰ খেলপথাৰলৈ উভতি আহিব নোৱাৰে, তেন্তে টিম ইণ্ডিয়াই তেওঁৰ ঠাইত অন্য খেলুৱৈ লাভ কৰিবনে ?
আইচিচিৰ নিয়ম অনুসৰি কোনো খেলুৱৈয়ে মূৰত আঘাত পালে আৰু চকুৰে ভালদৰে নেদেখিলে তেতিয়া দলে সেই খেলুৱৈৰ সলনি অন্য খেলুৱৈৰ বিকল্প লাভ কৰে ৷ এতিয়া পণ্টৰ কথা কবলৈ গ’লে নিয়ম অনুসৰি বেটিঙৰ ক্ষেত্ৰত ভাৰতে পণ্টৰ বিকল্প লাভ নকৰে।
কিন্তু ফিল্ডিঙৰ সময়ত বিকল্প লাভ কৰিব। পণ্টৰ ঠাইত ইংলেণ্ডৰ ইনিংছত ধ্ৰুৱ জুৰেলে উইকেট ৰক্ষক হিচাপে খেলিব পাব ৷ কিন্তু জুৰেলে বেটিং কৰিব নোৱাৰে কাৰণ পণ্টে ভৰিত আঘাত পাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
