হায়ৰে সমাজ! থিয়েটাৰ চোৱাৰ বাবেই বস্ত্ৰনগৰীত এঘৰীয়া হ’ল শিক্ষকৰ পৰিয়াল
এইখন অসমত নহয়নো কি, কাৰোবাক যদি মুৰ্গী পোহাৰ বাবে কাৰোবাক আকৌ গাহৰি পোহাৰ বাবে এঘৰীয়া কৰে সমাজৰ লোকে। পাছে এইবাৰ এঘৰ লোকক থিয়েটাৰ চোৱাৰ বাবে এঘৰীয়া কৰিলে এখন গাঁৱৰ ৰাইজে।
কেৱল থিয়েটাৰ চোৱাৰ বাবেই নহয়, ভ্ৰাম্যমাণ থিয়েটাৰৰ নাটৰ মঞ্চ উদ্বোধন কৰাৰ বাবে সমাজৰ পৰা এঘৰীয়া হ’ল এগৰাকী শিক্ষক। এই ঘটনা সংঘটিত হৈছে বস্ত্ৰনগৰী শুৱালকুছিৰ শিলিগুড়িত।
ঘটনী সন্দৰ্ভত জানিব পৰা অনুসৰি, শুৱালকুছি আৰক্ষী থানাৰ অন্তৰ্গত শিলিগুড়ি মাহকালটোল চুবুৰীয়ে লক্ষ্মী মন্দিৰ নিৰ্মাণৰ সাহৰ্য্যৰ্থে আমন্ত্ৰণ কৰিছিল ভ্ৰাম্যমাণ নাট্য দল বীণাপানী থিয়েটাৰ দলক।
এই থিয়েটাৰৰ মঞ্চ উদ্বোধন কৰিছিল এগৰাকী স্থানীয় শিক্ষক বিৰিঞ্চি কলিতাই । থিয়েটাৰৰ মঞ্চ উদ্বোধন কৰি থিয়েটাৰো চালে কলিতাৰ পৰিয়ালে। কিন্তু সেয়ে অপৰাধ হল শিক্ষক বিৰিঞ্চি কলিতাৰ ।
এই অপৰাধতে শিক্ষক বিৰিঞ্চি কলিতাক এঘৰীয়া কৰাৰ কথা মাইকযোগে ঘোষণা কৰে শিলিগুড়িৰ ৰাইজে । আজিৰ সভ্যতাৰ সময়তো মাত্ৰ থিয়েটাৰৰ মঞ্চ উদ্বোধন কৰিয়েই ৰক্ষণশীল সমাজৰ বলি হ’ল শিক্ষক বিৰিঞ্চি কলিতা ৷
সমাজৰ পৰা এঘৰীয়া হোৱাত পৰিয়ালটো এতিয়া হতাশাত ভূগিবলগীয়া হৈছে। এই ঘটনা সন্দৰ্ভত শুৱালকুছি আৰক্ষীক অৱগত কৰাৰ পিছতো ভাৰপ্ৰাপ্ত বিষয়া গৰাকীয়ে বিষয়াটোত গুৰুত্ব নিদি একপ্ৰকাৰ ভূক্তভোগী পৰিয়ালটোক ওলোটাই ধমকহে দিয়ে বুলি অভিযোগ কৰিছে ভূক্তভোগী পৰিয়ালটোৱে।
এতিয়া শিক্ষক গৰাকীয়ে ফাৰ্মাচীৰ পৰা ঔষধ ক্ৰয় কৰা, দৰ্জীৰ ওচৰত কাপোৰ চিলোৱা আদি কামত বাধা আৰোপ কৰে শিলিগুড়িৰ ৰাইজে । ইপিনে শিক্ষক গৰাকীৰ লগতে অন্য দুটা পৰিয়ালকো থিয়েটাৰ চোৱাৰ অপৰাধত এঘৰীয়া কৰে ।
সেই পৰিয়ালদুটাৰ এগৰাকী কৰ্কট ৰোগী আৰু এগৰাকী দিন হাজিৰা কৰা লোকৰ পৰিয়ালক এঘৰীয়া কৰাৰ অভিযোগ কৰিছে। এই ঘটনাই এতিয়া অঞ্চলজুৰি চাঞ্চল্যৰ সৃষ্টি কৰাৰ লগতে সভ্য সমাজক লজ্জানত কৰি তুলিছে ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
