অসম লাইভ২৪ঃ অসমত ক্ৰিকেট খেল হ’লেই অঘটন হয়েই। বৰষুণ, সাপ, কাৰেণ্ট ইত্যাদি ইত্যাদি ক’ত যে সমস্যা! বৰ্ষাপাৰাতেই কিয় এইবোৰ বাৰে বাৰে হয় বুলি একাংশই প্রশ্ন কৰাৰ সময়তে দিল্লীত হোৱা ভাৰত-দক্ষিণ আফ্ৰিকাৰ মেছত আকৌ তেনে এটি ঘটনাই সংঘটিত হ’ল। ভাৰত বনাম দক্ষিণ আফ্ৰিকাৰ তৃতীয় এদিনীয়া মেছত এটা কুকুৰে ফিল্ডত দৌৰি ফুৰা দৃশ্য ভাইৰেল হৈ পৰিছে। দক্ষিণ আফ্ৰিকাৰ দলটোৱে বেট ধৰি থকাৰ সময়তে কুকুৰটোৱে ফিল্ডত প্ৰৱেশ কৰে। কুকুৰৰ প্ৰবেশৰ বাবেই বৰ্ষাপাৰাৰ দৰেই কিছুসময়লৈ খেল স্তব্ধ কৰা হয়।
উল্লেখ্য যে, নতুন দিল্লীৰ অৰুণ জেটলী ষ্টেডিয়ামত চলা অন্তিমখন তৃতীয় এদিনীয়াত ৭ উইকেটত ভাৰতীয় দলটো জয়ী হৈছে। শ্বাসৰুদ্ধকৰ খেলখন চলি থকাৰ মাজতেই হঠাতেই এটা কুকুৰ সোমাই পৰে ষ্টেডিয়ামত। কুকুৰটোক উলিয়াবৰ বাবে ছিকিউৰিটিয়ে বহুসময় ধৰি ষ্টেডিয়ামত দৌৰি অৱশেষত কুকুৰটোক ধৰিবলৈ সক্ষম হয়। ভাৰত-দক্ষিণ আফ্ৰিকাৰ মেছত পূৰ্বেও সাপে অথন্তৰ লগাইছিল আৰু এইবাৰ কুকুৰৰ প্ৰবেশক লৈ দেশৰ সংবাদ মাধ্যমৰ লগতে আন্তঃৰাষ্ট্ৰীয় মহলতো এই বিষয়টোৱে বিশেষ চৰ্চা লাভ কৰা পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
