আলঝাইমাৰ্ছৰ নতুন ঔষধ আহিছে দেশত, প্ৰতিমাহত এটাকৈ ইঞ্জেকছন ল’লেই দূৰ হ’ব পাহৰি যোৱাৰ সমস্যা

বয়সকাল বুলি নহয়, কমবয়সতো স্মৃতিশক্তি কমি গৈছে৷ দিনকদিনে এই সমস্যা বাঢ়িব ধৰিছে৷ আলঝাইমাৰ্ছ মানেই যে কেৱল পাহৰি যাব তেনে নহয়৷ এই ৰোগত আক্ৰান্ত হ’লে ৰোগীৰ স্বভাৱ, বৈশিষ্ট্য, আচাৰ আচৰণো সলনি হ’ব ধৰে৷ ই স্নায়ুৰ এক জটিল অসুখ, যি এবাৰ শৰীৰত বাঁহ বান্ধিলে নিৰাময়ৰ কোনো উপায় নাথাকে৷ স্মৃতিৰ পাত ধূসৰ হৈ হৈ এসময়ত ৰোগীজনে সকলোবোৰেই পাহৰি যায়৷ তেতিয়া চকুৰ সন্মুখত থকা অতি আপোনজনো অচিনাকি হৈ পৰে৷

আলঝাইমাৰ্ছ নিয়ন্ত্ৰণত ৰখাৰ নানান চিকিৎসা পদ্ধতিক লৈ গৱেষণা চলিছে বিশ্বজুৰি৷ নিত্যনতুন ঔষধ অনাৰ চেষ্টাও কৰিছে গৱেষকে৷ নতুন এক ঔষধে সম্প্ৰতি অনুমোদন লাভ কৰিছে৷ সকলো ঠিকে থাকিলে আগন্তুক কেইবামাহৰ ভিতৰত এই ঔষধ দেশৰ বজাৰত বিক্ৰি হ’ব বুলিও জনা গৈছে৷

ঔষধটিৰ নাম হৈছে ডোনোনেমাৰ৷ তৈয়াৰ কৰিছে আমেৰিকান ঔষধ নিৰ্মাতা সংস্থা এলি লিলিয়ে৷ খবৰ অনুসৰি এই ঔষধৰ ক্লিনিকেল ট্ৰায়েল চলি আছিল৷ ৰোগীসকলৰ শৰীৰত প্ৰয়োগ কৰি দেখা গৈছে যে ৰোগৰ তীব্ৰতা বহু পৰিমাণে কমে এই ঔষধত৷ ৰোগীৰ পাহৰি যোৱাৰ প্ৰৱণতাও কমে৷ বহুতেই নিজেও সিদ্ধান্ত ল’ব পৰা ক্ষমতা আকৌ অৰ্জনো কৰে৷ ঔষধৰ বাবে অনুমোদন দিয়া হৈছে আমেৰিকাত৷ আৰু কেইমাহৰ ভিতৰত এই ঔষধ ভাৰতৰ বজাৰতো উপলব্ধ হ’ব৷

সাম্প্ৰতিক সময়ত কিছু গৱেষণাই কৈছে যে বাইপোলাৰ ডিজঅৰ্ডাৰৰ পৰা আলঝাইমাৰ্ছ হ’ব পাৰে৷ অৱসাদৰ পৰা যে হঠাৎ আলঝাইমাৰ্ছে দেখা দিব তেনে নহয়৷ বিভিন্ন বিষয় ইয়াত সংপৃক্ত হৈ থাকে৷ অৱসাদ যদি দীৰ্ঘম্যাদি হয় তেতিয়া সঠিক চিকিৎসা নকৰিলে মস্তিষ্কৰ কাৰ্যক্ষমতা কমিব ধৰে৷ ষ্ট্ৰেছ হৰমনৰ ক্ষৰণ বাঢ়ি যায়৷ মস্তিষ্কৰ নানান জটিল ৰোগৰো আশংকা বাঢ়ি থাকে৷ অতিৰিক্ত মানসিক চাপৰ কাৰণে কগনিটিভ ডিজফাংছন হ’ব পাৰে৷ তেতিয়াই পাহৰি যোৱাৰ সমস্যা বাঢ়ে৷

উদ্বেগৰ সৈতেও পাহৰি যোৱাৰ কথাবোৰ ওতপ্ৰোতভাৱে জড়িত৷ কেৱল স্মৃতিশক্তিয়েই নহয়, যুক্তি, বুদ্ধিৰে পৰিকল্পনা কৰা, যুক্তিৰে বিচাৰ কৰাৰ ক্ষমতা, সমাজত মিলামিছা কৰাৰ ক্ষমতা এইসকলোবোৰেই কগনিটিভ ফাংছন৷ সেয়ে আলঝাইমাৰ্ছ ৰোগীৰ চিন্তাভাৱনা সলনি হয়, মিলামিছা কৰাতো সমস্যা হয়, সিদ্ধান্ত লোৱাৰ ক্ষমতা কমি থাকে, কথাবাৰ্তা অসংলগ্ন হৈ পৰে৷ এই সমস্যাসমূহ ধাপে ধাপে দূৰ কৰিব নতুন ঔষধে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ