অষ্ট্ৰিয়াৰ মাটিত থিয় হৈ শান্তিৰ পক্ষত বিশেষ বাৰ্তা দিছে প্ৰধানমন্ত্ৰী নৰেন্দ্ৰ মোদীয়ে৷ মোদীয়ে কয়, ‘ভাৰতে বিশ্বক বুদ্ধ দিছে যুদ্ধ নহয়৷’ আন্তৰ্জাতিক সংকটৰ সময়ত ভাৰতৰ শান্তিকামী যি অৱস্থান সেয়া তুলি ধৰিয়েই যুদ্ধ আৰু বুদ্ধৰ পাৰ্থক্য বুজাই দিছে প্ৰধানমন্ত্ৰী মোদীয়ে৷ বুদ্ধই তেওঁৰ শান্তি আৰু অহিংসবাদী দৰ্শনৰ বাবে সমগ্ৰ বিশ্বত পৰিচিত৷
বুধবাৰে অষ্ট্ৰিয়া যাত্ৰাৰ দ্বিতীয় দিনা এই বিশেষ বক্তব্য ৰাখিছে মোদীয়ে৷ সেই অনুষ্ঠানত প্ৰধানমন্ত্ৰীয়ে কয়, ‘হাজাৰ হাজাৰ বছৰ ধৰি আমাৰ জ্ঞান আৰু অভিজ্ঞতা বিশ্বৰ সৈতে ভাগ কৰি লৈছে৷ আমি যুদ্ধ নকৰো৷ আমি বিশ্বক বুদ্ধ দিছো৷ ভাৰত সৰ্বদা শান্তি আৰু সমৃদ্ধি দিছে৷’ ৰুছ-ইউক্ৰেইন আৰু পেলেষ্টাইন-হামাছ যুদ্ধৰ মাজত মোদীৰ এই মন্তব্য বিশেষ তাৎপৰ্যপূৰ্ণ বুলি দাবী কৰিছে বহুজনে৷
দুদিনীয়া ৰাছিয়া ভ্ৰমণ শেষ কৰি মঙলবাৰে অষ্ট্ৰিয়াত উপস্থিত হৈছে মোদী৷ ৪১ বছৰ পাছত ইউৰোপৰ এই দেশত ভাৰতৰ এগৰাকী প্ৰধানমন্ত্ৰী উপস্থিত হৈছে৷ নিজৰ প্ৰথম অষ্ট্ৰিয়া ভ্ৰমণক তাৎপৰ্যপূৰ্ণ বুলি অভিহিত কৰিছে মোদীয়ে৷ বুধবাৰে প্ৰৱাসী ভাৰতীয়সকলৰ এক অনুষ্ঠানত মোদীয়ে অষ্ট্ৰিয়াৰ সৈতে ভাৰতৰ সম্পৰ্কৰ বাখ্যা দি কয়, ‘বহু পাৰ্থক্য থকা স্বত্ত্বেও গণতন্ত্ৰই দুই দেশত এক কৰি ৰাখিছে৷’
বিগত দুবছৰ ধৰি ইউক্ৰেইনৰ সৈতে ৰাছিয়াৰ যুদ্ধ চলি আছে৷ সেই যুদ্ধত আমেৰিকাসহ প্ৰথম বিশ্বৰ বহু দেশেই থিয় দিছে ইউক্ৰেইনৰ কাষত৷ পুৰণি মিত্ৰদেশ ৰাছিয়াত উপস্থিত হৈ মোদীয়ে কি বাৰ্তা দিয়ে সেই বিষয়টোত নজৰ দি আছিল পশ্চিমী দুনীয়াৰ প্ৰায়কেইখন দেশেই৷ ৰাছিয়াত উপস্থিত হৈ এই যুদ্ধ শেষ কৰাৰ বাবে আৰ্জি জনাই প্ৰধানমন্ত্ৰী মোদীয়ে৷ ইয়াৰ সৈতে পুটিনক তেওঁ কয় যে আলোচনা আৰু কূটনীতিয়েই এইক্ষেত্ৰত সাফল্য দিব পাৰিব৷ যুদ্ধই কাহানিও কোনো সমাধান নিদিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
