ভাৰতীয় প্ৰতিৰক্ষা গৱেষণা আৰু উন্নয়ন সংস্থা (DRDO)-য়ে বুধবাৰে ওড়িশাৰ চান্দিপুৰস্থিত ইণ্টিগ্ৰেটেড টেষ্ট ৰেঞ্জ (ITR)ৰ পৰা দেশীয়ভাৱে বিকশিত মধ্যম-পাল্লাৰ বেলিষ্টিক ক্ষেপণাস্ত্ৰ AGNI-4ৰ সফল পৰীক্ষামূলক উৎক্ষেপণ সম্পন্ন কৰে। এই সফল উৎক্ষেপণে ভাৰতৰ কৌশলগত প্ৰতিৰক্ষা শক্তিক পুনৰ এবাৰ অধিক সুদৃঢ় কৰাৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে।
ভাৰতৰ প্ৰতিৰক্ষা মন্ত্ৰালয়ে প্ৰকাশ কৰা অনুসৰি, এই পৰীক্ষাত ক্ষেপণাস্ত্ৰটোৰ সকলো অপাৰেশ্যনেল আৰু কাৰিকৰী মানদণ্ড সফলভাৱে পৰীক্ষিত হয়। উৎক্ষেপণৰ সময়ত ক্ষেপণাস্ত্ৰটোৰ লক্ষ্যভেদ ক্ষমতা, উৰণপথ, নিয়ন্ত্ৰণ ব্যৱস্থা, নেভিগেশ্যন প্ৰযুক্তি আৰু পুনঃপ্ৰৱেশ (Re-entry) ক্ষমতাকো সন্তোষজনকভাৱে মূল্যায়ন কৰা হয়। এই পৰীক্ষা ষ্ট্ৰেটেজিক ফ’ৰ্চেছ কমাণ্ডৰ তত্বাৱধানত সম্পন্ন কৰা হয়। ভাৰতৰ পাৰমাণৱিক অস্ত্ৰভাণ্ডাৰ পৰিচালনাৰ দায়িত্বত থকা এই সংস্থাই নিয়মীয়াকৈ বিভিন্ন ক্ষেপণাস্ত্ৰৰ অপাৰেশ্যনেল প্ৰস্তুতি পৰীক্ষা কৰি আহিছে।
AGNI-4 হৈছে ভাৰতৰ অগ্নি শৃংখলাৰ এক আধুনিক মধ্যম-পাল্লাৰ বেলিষ্টিক ক্ষেপণাস্ত্ৰ। ইয়াৰ মুখ্য বৈশিষ্ট্যসমূহ হৈছে—
প্ৰায় ৪,০০০ কিলোমিটাৰ দূৰত্বৰ লক্ষ্যত আঘাত হানিব পাৰে। ই দুটা স্তৰৰ Solid Fuel ব্যৱস্থা ব্যৱহাৰ কৰে। অত্যাধুনিক ৰিং লেজাৰ জাইৰোস্কোপ, মাইক্ৰ’ নেভিগেশ্যন চিষ্টেম আৰু ডিজিটেল নিয়ন্ত্ৰণ প্ৰযুক্তিৰে সজ্জিত। পাৰমাণৱিক অথবা প্ৰচলিত দুয়ো ধৰণৰ ৱাৰহেড বহন কৰিব পাৰে। উচ্চ নিখুঁততাৰে লক্ষ্যভেদ কৰাৰ সক্ষমতা আছে। কম্পোজিট মেটেৰিয়েল ব্যৱহাৰৰ ফলত ক্ষেপণাস্ত্ৰটো তুলনামূলকভাৱে লঘু আৰু অধিক কাৰ্যক্ষম। AGNI-4 ক্ষেপণাস্ত্ৰই ভাৰতৰ বিশ্বাসযোগ্য ন্যূনতম পাৰমাণৱিক প্ৰতিৰোধ ক্ষমতা নীতি অধিক শক্তিশালী কৰাত গুৰুত্বপূৰ্ণ ভূমিকা পালন কৰে।
প্ৰতিৰক্ষা মন্ত্ৰালয়ে কয় যে, এই সফল উৎক্ষেপণে দেশৰ কৌশলগত প্ৰতিৰোধ ক্ষমতা অধিক সুদৃঢ় কৰাৰ ক্ষেত্ৰত আন এক গুৰুত্বপূৰ্ণ মাইলৰ খুঁটি স্থাপন কৰিছে। অগ্নি শৃংখলাৰ এই আধুনিক ক্ষেপণাস্ত্ৰই ভাৰতীয় সশস্ত্ৰ বাহিনীৰ দীৰ্ঘ-পাল্লাৰ আঘাত হানিব পৰা ক্ষমতাক অধিক শক্তিশালী কৰাৰ লগতে দেশৰ জাতীয় সুৰক্ষা ব্যৱস্থাকো অধিক নিৰ্ভৰযোগ্য কৰি তুলিব।
বিশ্বজুৰি দ্ৰুতগতিত পৰিৱৰ্তিত সুৰক্ষা পৰিস্থিতিৰ মাজত এনে সফল পৰীক্ষাই ভাৰতৰ নিজস্ব প্ৰতিৰক্ষা প্ৰযুক্তি, ক্ষেপণাস্ত্ৰ উন্নয়ন ক্ষমতা আৰু আত্মনিৰ্ভৰশীল সামৰিক শক্তিৰ ক্ষেত্ৰত উল্লেখযোগ্য অগ্ৰগতিৰ প্ৰমাণ বহন কৰিছে। বিশেষজ্ঞসকলৰ মতে, অগ্নি-৪ৰ এই সফল পৰীক্ষাই ভাৰতৰ কৌশলগত সুৰক্ষা ব্যৱস্থাক নতুন মাত্ৰা প্ৰদান কৰাৰ লগতে ভবিষ্যতৰ প্ৰতিৰক্ষা প্ৰস্তুতিকো অধিক শক্তিশালী কৰি তুলিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
