থাইলেণ্ডত সংঘটিত হৈছে এক ভয়ংকৰ ঘটনা। স্থানীয় ফুটবল প্ৰতিযোগিতাৰ এখন মেচ চলি থকৰ সময়তে ২৪ বছৰীয়া যুৱ ফুটবলাৰ ছোফৱান আৱাৰে বজ্ৰপাতৰ ফলত মৃ*ত্যুক সাবটিবলগীয়া হয়। মেচখনত অংশগ্ৰহণ কৰা আন ১২জন খেলুৱৈও আঘাতপ্ৰাপ্ত হৈ বৰ্তমান চিকিৎসাধীন হৈ আছে।
থাইলেণ্ডৰ নাৰথীৱাট প্ৰদেশৰ সুংগাই গোলোক চহৰৰ শান্তিফুপ ষ্টেডিয়ামত গোলোক এফ এ কাপৰ ছেমি ফাইনেল মেচৰ সময়তে এই ঘটনা সংঘটিত হয়। সন্ধিয়া প্ৰায় ৫:৩০ বজাত হঠাতে বতৰ গোমা হৈ আহে আৰু পলকতে তীব্ৰ ধুমুহাৰ সৃষ্টি হয়। আনহাতে বতৰৰ অৱনতিৰ পিছতো আয়োজকে মেচখন অব্যাহত ৰাখে। ইফালে খেলপথাৰৰ ঠিক মাজভাগত বজ্ৰপাত হয়। বজ্ৰপাতত ঘটনাস্থলীতে মৃত্যু হয় ছোফৱান আৱাৰ নামৰ এজন খেলুৱৈ।
মেচখনত বিদ্যুৎস্পৃষ্ট হোৱাৰ পিছতে প্ৰথমে অচেতন হৈ পৰে ছোফৱান আৱাৰ। খেলপথাৰত নিয়োজিত মেডিকেল ৰেচপন্স টিমে লগে লগে খেলুৱৈজনক চিকিৎসা প্ৰদানেৰে ঠিক কৰি তুলিবলৈ চেষ্টা কৰি বিফল হোৱাৰ পিছতে খেলপথাৰৰ ওচৰৰ সমীপৰ চিকিৎসালয়লৈ লৈ যোৱা হয় যদিও চিকিৎসালয়ত মৃত ঘোষণা কৰা হয় খেলুৱৈজনক। এই কথা নিশ্চিত কৰি ছুংগাই গোলকৰ আৰক্ষী অধীক্ষক কৰ্ণেল থুন ছিৰিখন্তই কয় যে, জৰুৰীকালীন চিকিৎসা দলে খেলুৱৈগৰাকীৰ জীৱন ৰক্ষাৰ বাবে সকলো চেষ্টা কৰিছিল যদিও দুৰ্ঘটনাটোত তেওঁৰ মৃত্যু হয়।
ছফৱান এৱাৰ আছিল থাইলেণ্ডৰ এজন প্ৰতিভাৱান উইংগাৰ আৰু দুৰ্ঘটনাৰ মাত্ৰ কেইদিনমান পূৰ্বে থাই লীগ ৩ৰ আগশাৰীৰ ক্লাব য়ালা এফ চিৰ সৈতে চুক্তিবদ্ধ হৈছিল। এই মৰ্মান্তিক ঘটনাৰ পিছতে থাইলেণ্ডৰ ফুটবল এছ’চিয়েশ্যনে গভীৰ শোক প্ৰকাশ কৰাৰ লগতে মৃত খেলুৱৈগৰাকীৰ পৰিয়ালৰ লগতে ক্লাবলৈও সমবেদনা জ্ঞাপন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
