বলিউডৰ অভিনেতা ছলমান খানে অসমৰ বানপীড়িত পৰিয়ালসমূহৰ পুনৰ সংস্থাপনৰ বাবে এক উল্লেখযোগ্য পদক্ষেপ গ্ৰহণ কৰিছে। বিভিন্ন সংবাদমাধ্যমৰ প্ৰকাশিত প্ৰতিবেদন অনুসৰি, ছালমান খানে স্বেচ্ছাসেৱী সংস্থা Global Sikhsক সহযোগ কৰি বানত গৃহহীন হোৱা লোকসকলৰ বাবে ৫০০টা অৰ্ধ-স্থায়ী ঘৰ নিৰ্মাণ কৰাৰ সিদ্ধান্ত লৈছে।
ছালমান খানৰ সমাজসেৱামূলক সংস্থা Being Human-এ ইয়াৰ পূৰ্বেও বানপীড়িত অঞ্চলসমূহত খাদ্য, অত্যাৱশ্যকীয় সামগ্ৰী আৰু অন্যান্য সাহায্য আগবঢ়াই আহিছে। এইবাৰ সাহায্য অভিযানৰ দ্বিতীয় পৰ্যায়ত ক্ষতিগ্ৰস্ত পৰিয়ালসমূহক স্থায়ীভাৱে পুনৰ সংস্থাপন কৰাৰ ওপৰত গুৰুত্ব আৰোপ কৰিছে ছলমান খানৰ Being Human-এ।
প্ৰতিবেদন অনুসৰি, অসমৰ আটাইতকৈ অধিক বানপ্ৰভাৱিত অঞ্চলৰ অন্যতম শিৱসাগৰ জিলাৰ নেপালী খুটি গাঁৱত বৰ্তমানলৈকে প্ৰায় ২২০টা অৰ্ধ-স্থায়ী ঘৰ নিৰ্মাণ সম্পূৰ্ণ হৈছে। এই ঘৰসমূহ বাঁহ আৰু টিনৰ চাল ব্যৱহাৰ কৰি নিৰ্মাণ কৰা হৈছে। বানপ্ৰৱণ অঞ্চলৰ প্ৰয়োজনীয়তা আৰু পৰিস্থিতিৰ কথা মনত ৰাখি ঘৰসমূহ বিশেষভাৱে নক্সা কৰা হৈছে, যাতে বানৰ সময়তো পৰিয়ালসমূহ তুলনামূলকভাৱে সুৰক্ষিতভাৱে বাস কৰিব পাৰে। সংস্থাটোৰ তথ্য অনুসৰি, এই পুনৰ সংস্থাপন প্ৰকল্প পূৰ্বৰ পৰাই তেওঁলোকৰ সাহায্য অভিযানৰ অংশ আছিল। অভিনেতা ৰণদ্বীপ হুদাক ঘটনাস্থলীত সক্ৰিয়ভাৱে সাহায্যকাৰ্য চলোৱা দেখি ছালমান খানে এই অভিযানত সহযোগিতা আগবঢ়োৱাৰ সিদ্ধান্ত লয়।
প্ৰতিটো ঘৰ নিৰ্মাণত ব্যয় হ’ব প্ৰায় ৪০ হাজাৰ টকা
সূত্ৰসমূহে জনোৱা অনুসৰি, ৰণদীপ হুডাই ছালমান খানক Global Sikhs-ৰ সাহায্য অভিযানৰ বিষয়ে অৱগত কৰে। এই অভিযানত প্ৰায় ৭০জন স্বেচ্ছাসেৱক দিনে-ৰাতিয়ে কাম কৰি আছে। সংস্থাটোৰ প্ৰতিষ্ঠাপক অমৰপ্ৰীৎ সিঙে ছালমান খানক জনায় যে প্ৰতিটো অৰ্ধ-স্থায়ী ঘৰ নিৰ্মাণ কৰিবলৈ প্ৰায় ৩৫ হাজাৰৰ পৰা ৪০ হাজাৰ টকা ব্যয় হয়। এই তথ্য লাভ কৰাৰ পিছতেই ছালমান খানে সংস্থাটোৰ সৈতে মিলি ৫০০টা ঘৰ নিৰ্মাণৰ সম্পূৰ্ণ দায়িত্ব লোৱাৰ সিদ্ধান্ত গ্ৰহণ কৰে। সাহায্য অভিযান সন্দৰ্ভত অমৰপ্ৰীৎ সিঙে সংবাদ মাধ্যমক জনোৱা মতে, কিছুদিন পূৰ্বে ছালমান খানে তেওঁলোকৰ সৈতে যোগাযোগ কৰি কৈছিল, “আপোনালোকে চিন্তা নকৰিব।”
তেওঁ আৰু জনায় যে ইতিমধ্যে সম্পূৰ্ণ হোৱা ২২০টা ঘৰ বানপীড়িত পৰিয়ালসমূহৰ হাতত হস্তান্তৰ কৰা হৈছে। সংস্থাটোৰ দক্ষ স্বেচ্ছাসেৱক দলটোৱে এদিনতে ৮ৰ পৰা ১০টা ঘৰ নিৰ্মাণ কৰাৰ সক্ষমতা ৰাখে। ফলত অহা কিছুদিনৰ ভিতৰতে ৫০০টা ঘৰ নিৰ্মাণৰ লক্ষ্যও পূৰণ হোৱাৰ আশা প্ৰকাশ কৰা হৈছে। এই পদক্ষেপে অসমৰ বানত ক্ষতিগ্ৰস্ত শতাধিক পৰিয়ালৰ বাবে কেৱল আশ্ৰয়ৰ ব্যৱস্থা কৰাই নহয়, নতুনকৈ জীৱন আৰম্ভ কৰাৰ এক আশাৰ বতৰা কঢ়িয়াই আনিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
