মানৱেন্দ্ৰ কুমাৰ দাসঃ ২০১৬ চনৰ পৰা ধাৰাবাহিকভাৱে পৰাজিত হৈছে কংগ্ৰেছ। প্ৰতিটো নিৰ্বাচনতে দলটোৱে ক্ৰমাৎ বিধ্বস্ত হ’ব লাগিছে। কিন্তু ইয়াৰ কাৰণ কি? দলীয় পৰ্যায়ত চৰ্চিত হোৱা এক বিষয়। আৰু তাৰ সমান্তৰালকৈ এতিয়া ৰাইজৰ মাজতো চৰ্চিত হ’ব লাগিছে কংগ্ৰেছৰ শোচনীয় পৰাজয় অথবা ব্যৰ্থতা। বিশেষকৈ অলপতে অনুষ্ঠিত হোৱা গুৱাহাটী পৌৰ নিগমৰ নিৰ্বাচনত দলটো যি ধৰণে বিধ্বস্ত হ’ল, সেয়ে নিশ্চিত ভাৱে উদ্বেগজনক। একে সময়তে গুৱাহাটী পৌৰ নিগমৰ নিৰ্বাচনত প্ৰকট হৈছে প্ৰদেশ কংগ্ৰেছৰ আভ্যন্তৰীণ সংঘাত। আৰু এই সংঘাতৰ মূল নায়কসকল হৈছে খোদ প্ৰদেশ কংগ্ৰেছৰ একাংশ জ্যেষ্ঠ তথা প্ৰভাৱশালী নেতা।
লগতে পঢ়ক Love Vs Money : ধন নে প্ৰেম, মানুহে জীৱনত কোনটো অধিক বিচাৰে?
প্ৰদেশ কংগ্ৰেছৰ এক শীৰ্ষ সূত্ৰৰ পৰা সম্ভেদ পোৱা অনুসৰি গুৱাহাটী পৌৰ নিগমৰ নিৰ্বাচনত সক্ৰিয়ভাৱে অংশগ্ৰহণ কৰিবলৈ বিশেষকৈ নিৰ্বাচনী প্ৰচাৰ অভিযানত জড়িত হ’বলৈ কেইগৰাকীমান জ্যেষ্ঠ নেতাক আনুষ্ঠানিকভাৱে দায়িত্ব দিয়া হৈছিল। তেওঁলোক ক্ৰমে কলিয়াবৰ লোকসভা সমষ্টিৰ সাংসদ গৌৰৱ গগৈ, নগাঁও লোকসভা সমষ্টিৰ সাংসদ প্ৰদ্যুৎ বৰদলৈ, নগাঁও জিলাৰ প্ৰভাৱশালী কংগ্ৰেছ নেতা তথা প্ৰাক্তন মন্ত্ৰী ৰকিবুল হুছেইন, কংগ্ৰেছ বিধায়িনী দলৰ নেতা দেৱব্ৰত শইকীয়া, বৰপেটা লোকসভা সমষ্টিৰ সাংসদ আব্দুল খালেক, প্ৰদেশ কংগ্ৰেছৰ কাৰ্যকৰী সভাপতি কমলাক্ষ দে পুৰকায়ষ্ঠ, ৰাণা গোস্বামী আৰু জাকিৰ হুছেইন শিকদাৰ। কিন্তু নিৰ্বাচনী প্ৰচাৰ অভিযানত এইসকল নেতাই ভাগ নল’লে। ইয়াৰে প্ৰায়কেইগৰাকী নেতাই কৌশলেৰে নিৰ্বাচনী প্ৰচাৰৰ পৰা আঁতৰি থাকিল। অৱশ্যে তাৰ মাজতো দুই এগৰাকী জ্যেষ্ঠ নেতাই দলীয় আনুষ্ঠানিকতা পালন নকৰা নহয়।
তাৰ বিপৰীতে পৌৰ নিগমৰ নিৰ্বাচনত এককভাৱে সক্ৰিয় হৈ থাকিল প্ৰদেশ কংগ্ৰেছৰ সভাপতিগৰাকী। নিৰ্বাচনী প্ৰচাৰত সক্ৰিয়ভাৱে অংশগ্ৰহণ কৰা আন দুগৰাকী নেতা ক্ৰমে অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ আৰু মিডিয়া বিভাগৰ অধ্যক্ষ মনজিৎ মহন্ত। এই দুয়োগৰাকী নেতা কংগ্ৰেছৰ ৰাজনীতিত যথেষ্ট নতুন। স্বাভাৱিকতে তেওঁলোকৰ ৰাজনৈতিক প্ৰভাৱ আৰু ক্ষমতাও সীমিত। অন্য অৰ্থত গুৱাহাটী পৌৰ নিগমৰ নিৰ্বাচন প্ৰদেশ কংগ্ৰেছৰ সভাপতি ভূপেন কুমাৰ বৰাৰ বাবে কেৱল নিজা ৰাজনৈতিক ৰণ সদৃশ হৈ পৰিল। আৰু এনে পৰিবেশ সৃষ্টি কৰাৰ আঁৰত যিসকল ৰথী মহাৰথী জড়িত আছে বুলি চৰ্চা হৈছে তেওঁলোক হৈছে ক্ৰমে প্ৰদ্যুৎ বৰদলৈ, ৰকিবুল হুছেইন, আব্দুল খালেক, কমলাক্ষ দে পুৰকায়ষ্ঠ আৰু গৌৰৱ গগৈ। এইসকল নেতাৰ ধাৰাবাহিক সন্মিলিত ৰাজনৈতিক ষড়যন্ত্ৰৰ পৰিণতিত আজি কংগ্ৰেছৰ দলীয় বিফলতাৰ সমস্ত দায়িত্ব মূৰ পাতি ল’বলৈ বাধ্য হৈছে ভূপেন কুমাৰ বৰা।
লগতে পঢ়ক আপোনাৰ শিশুৰ হাতৰ আখৰ বেয়া নেকি? ৫টা পৰামৰ্শৰে ভাল হ’ব শিশুৰ হাতৰ আখৰ
উল্লেখযোগ্য যে, অসম বিধানসভাৰ যোৱা সাধাৰণ নিৰ্বাচনৰ সময়তো এপিচিচিৰ তদানীন্তন সভাপতি ৰিপুন বৰাৰ বিৰুদ্ধে অনুৰূপ ষড়যন্ত্ৰ হৈছিল। আৰু এচাম শীৰ্ষ নেতাৰ আত্মঘাতী ষড়যন্ত্ৰৰ বাবে ৰাজ ক্ষমতাৰ পৰা বঞ্চিত হৈছিল কংগ্ৰেছ। অৰ্থাৎ বাৰম্বাৰ ৰাজনৈতিক অভিশাপৰ বলি হৈছে নেকি প্ৰদেশ কংগ্ৰেছৰ সভাপতিগৰাকী? কেতিয়া সমাপ্ত হ’ব দলীয় এই সংঘাত? ইয়াৰ পৰবৰ্তী প্ৰতিবেদনত আমি ফাদিল কৰিম ৰাজ্যসভা নিৰ্বাচনৰ আঁৰৰ কাহিনী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
