অসম লাইভ২৪ঃ বিহুলৈ অপেক্ষা দুগুণ বাঢ়িছে অসমবাসীৰ। ৰঙালীত উলাহ বঢ়াবলৈকে অসমলৈ আহি আছে ভাৰতৰ বহুকেইজন তাৰকা খেলুৱৈ। শুকুৰবাৰে আই পি এল-২০২৩ ৰ সময়সূচী ঘোষণা কৰাৰ পাছতেই ৰাজ্যৰ ক্ৰিকেট প্ৰেমীৰো উলাহে নধৰে হিয়া। ৩১ মাৰ্চৰ পৰা আৰম্ভ হ’ব আইপিএল। আহমেদাবাদত গুজৰাট আৰু চেন্নাই চুপাৰ কিংছৰ মাজত অনুষ্ঠিত হ’ব উদ্বোধনী মেচ।
আনহাতে আই পি এলৰ লীগৰ অন্তিমখন মেচ অনুষ্ঠিত হ’ব ২১ মে’ ২০২৩ত বাংগালুৰুত।অসমতো অনুষ্ঠিত হ’ব আই পি এলৰ দুখন মেচ। ৰাজস্থান ৰয়েলছ আৰু পঞ্জাৱ কিংছৰ দুখনকৈ মেচ অনুষ্ঠিত হ’ব গুৱাহাটীৰ বৰ্ষাপাৰা ষ্টেডিয়ামত। ইয়াৰে প্ৰথমখন মেচ অনুষ্ঠিত হ’ব ৫ এপ্ৰিলত। সন্ধিয়া ৭-৩০ বজাৰ পৰা বৰ্ষাপাৰাত ৰাজস্থান ৰয়েলছে পঞ্জাৱ কিংছৰ বিৰুদ্ধে খেলিব প্ৰথমখন মেচ। আনহাতে ৮ এপ্ৰিলত গুৱাহাটীত অনুষ্ঠিত হ’ব দ্বিতীয়খন মেচ। এই দ্বিতীয়খন মেচ অনুষ্ঠিত হ’ব বিয়লি ৩-৩০ বজাৰ পৰা। দ্বিতীয়খন মেচত ৰাজস্থান ৰয়েলছ আৰু দিল্লী কেপিটেলছ মুখামুখি হ’ব।
উল্লেখ্য যে, অসমত আই পি এলৰ মেচ অনুষ্ঠিত কৰিবৰ বাবে অসম ক্ৰিকেট সন্থাই বি চি চি আই আৰু ৰাজস্থান ৰয়েলছক অনুৰোধ জনাইছিল। সেই অনুৰোধ ৰক্ষা কৰিয়েই অসমত অনুষ্ঠিত হ’ব দুখনকৈ আই পি এলৰ মেচ। বিহুৰ বতৰতে অসমত দুখনকৈ মেচ অনুষ্ঠিত হোৱাক লৈ সুখী হৈ পৰিছে ৰাজ্যৰ সৰহসংখ্যক ক্ৰিকেট অনুৰাগীয়েই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ