প্ৰতিবছৰেই আই পি এল দুমাহ চলে৷ ভাৰতৰ বিভিন্ন স্থানত থকা ষ্টেডিয়ামসমূহত ভিৰ কৰে ক্ৰিকেটপ্ৰেমীসকলে৷ বিৰাট কোহলি, শুভমন গিল, ৰোহিত শৰ্মা বা ৰিংকু সিঙৰ দৰে তাৰকা খেলুৱৈৰ খেল চাবলৈ ৰৈ থাকে বহু ক্ৰিকেটপ্ৰেমী৷ পূৰ্বৰ খেলসমূহতকৈ এইবাৰৰ আই পি এল চাবৰ বাবে ক্ৰিকেটপ্ৰেমীয়ে বেছিকৈ ধন খৰচ কৰিব লাগিব৷ বুধবাৰৰ জি এছ টিৰ নতুন কাঠামো ঘোষিত হৈছে তাতেই আই পি এলৰ টিকটৰ দাম বাঢ়িছে৷ পূৰ্বে আই পি এলৰ টিকট ক্ৰয় কৰিবলৈ গলে ২৮শতাংশ জি এছ টি দিব লাগিছিল৷ এইবাৰৰ পৰা ৪০ শতাংশ জি এছ টি দিব লাগিব৷ অৰ্থাৎ জি এছ টি কাঠামোৰ সৰ্বোচ্চ ঢাপ ৰখা হৈছে আই পি এলৰ টিকটত৷ কাৰণ কেন্দ্ৰীয় চৰকাৰে আই পিএলৰ মেচক ব্যয়বহুল বিনোদন হিচাপেই চাইছে৷ সেয়ে বেছিকৈ কৰ দিব লগা হৈছে৷
ধৰা হল আই পি এলৰ কোনো মেচৰ টিকটৰ দাম ১০০০ টকা৷ পূৰ্বে দিব লাগিছিল ১২৮০ টকা৷ এইবাৰৰ পৰা সেই টিকটত আপুনি দিব লাগিব ১৪০০ টকা৷ একেধৰণে ৬৪০ টকাৰ টিকটৰ দাম বাঢ়ি হৈছে ৭০০ টকা৷ ২০০০ টকাৰ টিকটৰ দাম ২৫৬০ টকাৰ সলনি হৈছে ২৮০০ টকা৷ তাৰপিছতেই ষ্টেডিয়াম ফি আৰু অনলাইন বুকিঙৰ বাবদো খৰচ আছে৷ ফলত এবাৰতেই কেইবাশ টকা অতিৰিক্ত খৰচ হব৷
কেন্দ্ৰীয় চৰকাৰৰ ঘোষণা অনুসৰি বিলাসবহুল বাহন, মটৰচাইকেল, প্ৰাইভেট জেট, ৰেচিং কাৰৰ ওপৰতো ৪০শতাংশ জি এছ টি আৰোপ কৰা হৈছে৷ ইয়াৰোপৰি চিগাৰেট, চুৰুট আৰু গুটখাজাতীয় পণ্যৰ ওপৰতো ৪০শতাংশ হাৰত জিএছটি লোৱা হব৷ জিএছটি বাঢ়িছে আই পি এলৰ টিকটতো৷ চমক অৱশ্যে আছে অন্যদিশতহে৷ কাৰণ আই পি এলৰ টিকটৰ দাম বাঢ়িলেও অন্য ক্ৰিকেট মেচৰ টিকটত ১৮ শতাংশ জিএছটিয়েই থাকিব৷ কেৱল আই পি এলৰ দৰে প্ৰিমিয়াম খেলৰ টিকটতহে বৰ্ধিত হাৰত কৰ দিব লাগিব৷
বিনোদনৰ মাজত আছে চিনেমাও৷ চিনেমাৰ টিকটৰ দাম অৱশ্যে কমিছে৷ পূৰ্বে চিনেমাৰ টিকটৰ দামৰ সৈতে ১২ শতাংশ কৰ দিব লাগিছিল৷ এতিয়া সেয়া ৫শতাংশ কমোৱা হৈছে৷ অৱশ্যে ১০০ টকা বা তাৰ তলৰ দামৰ ক্ষেত্ৰত এই কৰ প্ৰযোজ্য৷ টিকটৰ দাম ১০০ টকাতকৈ বেছি হলে ১৮শতাংশ কৰ দিব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
