পুনৰ ট্ৰাম্পৰ হুংকাৰ ‘বহু পলম কৰিলে, এতিয়া পৰিণাম ভুগিবলৈ সাজু হওঁক’

পুনৰ অশান্ত হৈ পৰিছে মধ্যপ্ৰাচ্যৰ আকাশ-বতাহ। সাময়িক যুদ্ধ বিৰতিৰ পিছত পুনৰ ধ্বং*সলীলাৰ পৰিৱেশৰ মাজলৈ ঘূৰি গৈছে ইৰান-ইজৰাইল আমেৰিকাসহ আৰৱৰ কেইবাখনো দেশ। আমেৰিকাৰ এয়াৰষ্ট্ৰাইক আৰু ইৰানৰ প্ৰত্যাক্ৰমণৰ মাজতে মাৰ্কিন ৰাষ্ট্ৰপতি ডোনাল্ড ট্ৰাম্পে ভয়ংকৰ পৰিস্থিতিৰ বাবে সাজু থকাৰ হুংকাৰ দিছে ইৰানক। ইৰান-আমেৰিকাৰ আক্ৰমণ-প্ৰত্যাক্ৰমণে সমগ্ৰ অঞ্চলটোকে অস্থিৰ কৰি তুলিছে। যুদ্ধ বিৰতি আৰম্ভ হোৱাৰ পিছৰে পৰা আমেৰিকাৰ ৰাষ্ট্ৰপতি ডোনাল্ড ট্ৰাম্পে শান্তি আলোচনাৰ বাবে ইৰানক আগবঢ়াই আছিল কেইবাটাও প্ৰস্তাৱ বা হেঁচা। কিন্তু আলোচনাৰ পূৰ্বে মাৰ্কিন ৰাষ্ট্ৰপতিজনে দিয়া কেইবাটাও চৰ্তক পোনছাটেই নস্যাৎ কৰিছিল ইৰানে। এই চৰ্তসমূহৰ ভিতৰত বৃহৎ ইউৰেনিয়ামৰ ভাণ্ডাৰৰ প্ৰসংগ আছিল মূল বিষয়। যাৰ বাবে ইৰানে আমেৰিকাৰ সৈতে শান্তি আলোচনাৰ বাবে আগ্ৰহী নাছিল। শেহতীয়াকৈ ইৰানৰ এই বিলম্বৰ বাবে অগ্নিশৰ্মা ট্ৰাম্পে অতি আক্ৰমণাত্মক মন্তব্য আগবঢ়াই কয়- ‘ইৰানে বুজাবুজি চুক্তিক লৈ হ’বলগীয়া আলোচনাৰ বাবে বহু সময় নষ্ট কৰিলে। দুয়োখন দেশৰ আলোচনাৰ ফলত সৰ্বাধিক লাভ ইৰানেই ল’ব পাৰিলেহেঁতেন, কিন্তু আলোচনাৰ ক্ষেত্ৰত তেওঁলোকে এই পৰ্যন্ত কোনো পদক্ষেপ লোৱা দেখা নগ’ল, দেখা নগ’ল কোনো ধৰণৰ আগ্ৰহ। যাৰ ভয়ংকৰ পৰিণাম তেওঁলোকে ভুগিবলৈ সাজু থাকক’। ট্ৰাম্পে লগতে ইৰানৰ সাম্প্ৰতিক সৈন্য শক্তি সন্দৰ্ভত কয় যে- ইৰানৰ সৈন্য শক্তি এতিয়া দুৰ্বল হৈ পৰিছে। তেওঁলোকৰ নৌ-সেনা আৰু বায়ুসেনাৰ গুৰুত্বপূৰ্ণ অংশ ইতিমধ্যে ধ্বংস হৈ পৰিছে।

ইপিনে আজি পুৱা মধ্য প্ৰাচ্যত এখন মাৰ্কিন হেলিকপ্টাৰ ভূপতিত হোৱাৰ পিছতে আমেৰিকাই ইয়াৰ বাবে ইৰানক জগৰীয়া কৰে আৰু ইৰানৰ বিৰুদ্ধে পুনৰ এয়াৰষ্ট্ৰাইক আৰম্ভ কৰে। আমেৰিকাৰ এই আক্ৰমণৰ পিছতে ইৰানেও ইয়াৰ প্ৰত্যাক্ৰমণ কৰে। লগে লগে মধ্যপ্ৰাচ্যত দুয়োখন দেশৰ সৈনিক গতিবিধি পুনৰ বৃদ্ধি পাইছে। ইৰানেও জৰ্ডান, বাহৰেইন আৰু কুৱেইটস্থিত আমেৰিকাৰ সৈন্য ঘাটিক টাৰ্গেট কৰি আক্ৰমণ কৰে।

ইতিমধ্যে ইৰানৰ তেনে ৫টা মিছাইল জৰ্ডানে ভূপতিত কৰাৰ দাবী কৰিছে। জৰ্ডানে দাবী কৰিছে যে ইৰানে জৰ্ডানস্থিত মুৱফ্ফাক ছাল্টী এয়াৰবেছক টাৰ্গেট কৰি মিছাইলেৰে আক্ৰমণ কৰিছিল যত আমেৰিকান F-35 ফাইটাৰ জেটসহ আন কেইবাখনো আমেৰিকান যুদ্ধ বিমান ৰখা হৈছিল। আমেৰিকাৰ পৰৱৰ্তী পদক্ষেপ সন্দৰ্ভত মাৰ্কিন সেনাৰ চেণ্ট্ৰেল কমাণ্ডৰে সদৰী কৰিছে যে আমেৰিকাই ইতিমধ্যে ইৰানৰ কেইবাটাও বায়ু আৰু নৌসেনাৰ ঘাটি, এয়াৰ ডিফেন্স ছিষ্টেম, গ্ৰাউণ্ড কণ্ট্ৰল ছিষ্টেম আৰু ছৰ্ভিলেন্স ৰাডাৰ ছাইটক টেৰ্গেটত ৰখা হৈছে।

এই প্ৰতিবেদনটো যুগুতাইছে মানসজ্যোতিয়ে