১১ জুনৰ পৰা আমেৰিকা, মেক্সিকো আৰু কানাডাত অনুষ্ঠিত হব বিশ্বকাপ ফুটবল। বিশ্বৰ বছা বছা ফুটবলাৰৰ দুভৰিৰ যাদুৰে প্ৰাণ পাই উঠিব আমেৰিকাৰ সেউজ ঘাঁহনি। মেছি, ৰোনাল্ডো, এমবাপে, হলাণ্ডৰ দৰে ছুপাৰষ্টাৰৰ খেলৰ শৈলীত মন্ত্ৰমুগ্ধ হ’বলৈ আমেৰিকালৈ ঢাপলি মেলিব বিশ্বৰ চুকে-কোনে থকা লাখ লাখ ক্ৰীড়া অনুৰাগী। ইপিনে পূৰ্বৰ বিশ্বকাপৰ তুলনাত এইবাৰ অংশগ্ৰহণকাৰী দলৰ সংখ্যাও বৃদ্ধি কৰিছে FIFAই। এইবাৰ বিশ্বকাপ ফুটবলত অংশ ল’ব বিশ্বৰ ৪৮খনকৈ দেশে। এই দেশসমূহৰ ভিতৰত বিশ্বকাপত অংশগ্ৰহণৰ বাবে যোগ্যতা অৰ্জন কৰিছে ইৰানেও। বিশ্বকাপত অংশগ্ৰহণৰ বাবে যোগ্যতা অৰ্জন কৰিলেও যুদ্ধভূমিৰ দৰেই সমস্যা আঁতৰা নাই ইৰানৰ।
অৱশ্য মধ্যপ্ৰাচ্যত ইৰান-আমেৰিকাৰ মাজত চলি থকা যুদ্ধৰ পিছতো বিশ্বকাপত অংশগ্ৰহণৰ বাবে যাবলগীয়া ইৰানৰ খেলুৱৈসকলক ভিছা প্ৰদান কৰিছে আমেৰিকাই। কিন্তু ট্ৰাম্পৰ দেশখনে ইৰানৰ খেলুৱৈসকলক ভিছা দিলেও এই পৰ্যন্ত ইৰান দলটোৰ কেইবাগৰাকীও ছাপ’ৰ্ট ষ্টাফ আৰু ইৰান ফুটবল ফেডাৰেশ্যনৰ বিষয়ববীয়াক আমেৰিকাই দিয়া নাই সেউজ সংকেত। ইৰান ফুটবল ফেডাৰেশ্যনৰ মহাসচিব হেদায়ত মোম্বেনী, উপাধ্যক্ষ মেহদী মহম্মদ নবীসহ ১৪গৰাকী বিষয়ববীয়া আৰু কেইবাগৰাকীও ছাপ’ৰ্ট ষ্টাফে এই পৰ্যন্ত লাভ কৰা নাই আমেৰিকাৰ ভিছা। ছাপ’ষ্ট ষ্টাফ অবিহনে বিশ্বকাপ ফুটবলৰ দৰে প্ৰতিযোগিতাখনত অংশগ্ৰহণ কৰাটো যিকোনো দেশৰ বাবে অতি কঠিন হৈ পৰিব। ইপিনে এই সন্দৰ্ভত আমেৰিকাই স্পষ্ট কৰিছে যে ইৰানৰ সকলো খেলুৱৈ, প্ৰশিক্ষক. ট্ৰেইনাৰ আৰু কেইবাজনো ছাপ’ৰ্ট ষ্টাফক ইতিমধ্যে ভিছা প্ৰদান কৰা হৈছে। অৱশ্যে বিভিন্ন কাৰণত কেইজনমান বিষয়বাবীয়া আৰু ছাপ’ৰ্ট ষ্টাফে এই পৰ্যন্ত আমেৰিকাৰ ফালৰ পৰা সেউজ সংকেত লাভ কৰা নাই। সম্প্ৰতি ইৰান ফুটবল দলটো তুৰ্কীত অন্তিম অনুশীলনত ব্যস্ত আছে। তুৰ্কীৰ পৰাই পোনে পোনে দলটো মেক্সিকোলৈ ৰাওনা হ’ব। ১১ জুনৰ পৰা আমেৰিকা, মেক্সিকো আৰু কানাডাত অনুষ্ঠিত হ’বলগীয়া বিশ্বকাপ ফুটবল ১৯ জুলাইলৈ চলিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
