এইখন দেশত এতিয়াৰে পৰা ভাৰতৰ বিৰুদ্ধে ছ’চিয়েল মিডিয়াত কৰিব নোৱাৰিব একো পোষ্ট

শেহতীয়াভাৱে ভাৰত বিৰুদ্ধে ছচিয়েল মিডিয়াৰ বিভিন্ন ছাইটত কেইবাটাও পোষ্ট চিনাক্ত কৰি block কৰিছে ছিংগাপুৰ চৰকাৰে। দেশখনৰ গৃহমন্ত্ৰালয়ে ফেচবুক, youtube আৰু Xত ভাৰতৰ বিৰুদ্ধে উচটনিমূলক মন্তব্য আগবঢ়োৱা তেনে ১৪টাকৈ পোষ্ট চিনাক্ত কৰি block কৰিছে। অনুসন্ধানত এই পোষ্টকেইটা চীনৰ পৰা আপলোড কৰি ছিংগাপুৰৰ ছচিয়েল মিডিয়া ব্যৱহাৰকাৰীৰ মাজত বিয়পাই দিয়াৰ তথ্য লাভ কৰিছে দেশখনৰ গৃহ বিভাগে। উপৰিও এই ফেচবুক, youtube আৰু X এই তিনিওটা ফ্লেটফৰ্মকে ভৱিষ্যতে ছিংগাপুৰৰ ব্যৱহাৰকাৰীয়ে যাতে এনে ভাৰতবিৰুদ্ধ পোষ্ট নাপায় তাৰ বাবে ব্যৱস্থা লবলৈ নিৰ্দেশ দিছে। ছিংগাপুৰ আৰক্ষীয়ে দেশখনৰ অনলাইন অপৰাধিক অধিনিয়ম ২০২৩ৰ অধীনত এনে ধৰণৰ অপপ্ৰচাৰ চলোৱা পোষ্টৰ ক্ষেত্ৰত নিষেধাজ্ঞা আৰোপ কৰিছে।

ছিংগাপুৰৰ গৃহমন্ত্ৰালয়ৰ এগৰাকী বিষয়াই সদৰী কৰা অনুসৰি চীনা ভাষাত লিখা পোষ্টকেইটাত প্ৰথমে ছিংগাপুৰে নিজৰ সংস্কৃতি আৰু দেশখনৰ জাতীয় ৰাজনৈতিক নীতি ক্ৰমাৎ হেৰুৱালৈ ধৰা বুলি মন্তব্য কৰে। ইয়াৰ পিছতে পোষ্টকেইটাত চীনা ব্যৱহাৰকাৰীয়ে ভাৰতৰ বিৰুদ্ধে বহুতো আপত্তিজনক মন্তব্য আগবঢ়ায় আৰু ইয়াক ছিংগাপুৰৰ ছচিয়েল মিডিয়া ব্যৱহাৰকাৰী মাজত বিয়পাই দিয়ে। ইয়াৰ ভিতৰত ছিংগাপুৰত ভাৰতীয়ৰ অবৈধ আগ্ৰাসন সন্বন্ধীয় কেইবাটাও পোষ্ট আছিল। ছিংগাপুৰৰ ৰাজনীতিত ভাৰতীয় মূলৰ নেতাও ছিংগাপুৰৰ নাগৰিকৰ বাবে চিন্তাৰ কাৰণ হিচাপে বিবেচিত হৈছে বুলিও অন্য কেইবাটাও পোষ্ট চিনাক্ত কৰে ছিংগাপুৰৰ গৃহ মন্ত্ৰালয়ে। ইয়াৰ উপৰিও ছিংগাপুৰত ভাৰতীয় মূলৰ লোকৰ উপস্থিতি বৃদ্ধিয়ে দেশখনৰ বাবে হানিকাৰক বুলি আন কেইবাটাও পোষ্টো চিনাক্ত কৰে দেশখনৰ গৃহমন্ত্ৰালয়ে। ছিংগাপুৰত বসবাস কৰা কেইবাগৰাকীও ভাৰতীয় মূলৰ লোকৰ ব্যৱসায়িক প্ৰতিষ্ঠান, ঘৰৰ ফটো, ভিডিঅ পোষ্ট কৰে দুষ্ট চক্ৰটোৱে।

দেশখনৰ গৃহমন্ত্ৰালয়ে ছিংগাপুৰৰ দণ্ড সহিতাৰ অধীনত ২৯৮A নং ধাৰাৰ অধীনত এনেধৰণৰ পোষ্টসমূহত অপৰাধৰ শ্ৰেণীত অন্তৰ্ভুক্ত কৰিছে। প্ৰাথমিক তদন্তত চীনৰ বিভিন্ন ছচিয়েল মিডিয়া প্লেটফৰ্মৰ জৰিয়তে ছিংগাপুৰৰ facebook, youtube আৰু X ব্যৱহাৰকাৰীৰ মাজলৈ বিয়পাই দিয়া হৈছে। এই পোষ্টসমূহত কৰা অভিযোগক খণ্ডন কৰি ছিংগাপুৰ চৰকাৰে দেশখনৰ নিৰ্মাণ ক্ষেত্ৰত ভাৰতীয় প্ৰৱাসী শ্ৰমিকৰ যোগদান উল্লেখযোগ্য আৰু তেওঁলোক ছিংগাপুৰ সমাজৰ এক উল্লেখযোগ্য সদস্য বুলিও মন্তব্য কৰে।