আজিকালি প্ৰায় সকলো স্মাৰ্টফোনেই ফাষ্ট চাৰ্জিং সুবিধাৰে আহে। কিন্তু দৈনন্দিন জীৱনত বহু সময়ত আমি নিজৰ চাৰ্জাৰ লগত নাৰাখো। অফিচ, বন্ধু বা আত্মীয়ৰ ঘৰত ফোনৰ বেটাৰী শেষ হৈ আহিলে ওচৰত থকা যিকোনো USB টাইপ-C চাৰ্জাৰ ব্যৱহাৰ কৰি ফোন চাৰ্জ কৰোঁ। ঠিক তেতিয়াই বহু লোকৰ মনত এটা সাধাৰণ প্ৰশ্ন উত্থাপন হয়—মোৰ ফোনে যদি ১৮W ফাষ্ট চাৰ্জিং সমৰ্থন কৰে, কিন্তু মই ৬০W বা তাতোকৈ অধিক ক্ষমতাৰ চাৰ্জাৰ ব্যৱহাৰ কৰোঁ, তেন্তে ফোন বা বেটাৰীৰ কোনো ক্ষতি হ’ব নেকি? প্ৰযুক্তি বিশেষজ্ঞসকলৰ মতে, এই বিষয়টো লৈ অযথা চিন্তা কৰাৰ প্ৰয়োজন নাই। কাৰণ, আধুনিক স্মাৰ্টফোনসমূহ এনেদৰে নিৰ্মাণ কৰা হয় যে ফোনটোৱেই চাৰ্জাৰৰ পৰা কিমান শক্তি ল’ব সেয়া নিজেই নিয়ন্ত্ৰণ কৰে।
ফোনে নিজেই নিৰ্ধাৰণ কৰে কিমান শক্তি ল’ব
বিভিন্ন ৱেবছাইটত প্ৰকাশিত তথ্য অনুসৰি, অধিক ক্ষমতাৰ চাৰ্জাৰ ব্যৱহাৰ কৰিলেই ফোনত অধিক বিদ্যুৎ প্ৰৱেশ নকৰে। বহুতে ভাবে যে ৬০W চাৰ্জাৰে ১৮W সমৰ্থিত ফোনলৈ ৬০W শক্তি ঠেলি দিব। কিন্তু বাস্তৱত এনে নহয়। চাৰ্জাৰে কেৱল বিদ্যুৎ যোগান ধৰে। ফোনটোৰ ভিতৰত থকা চাৰ্জিং কণ্ট্ৰ’লাৰ আৰু পাৱাৰ মেনেজমেণ্ট চিপেই চাৰ্জাৰৰ পৰা প্ৰয়োজন অনুসৰি শক্তি গ্ৰহণ কৰে। অৰ্থাৎ, আপোনাৰ ফোনে যদি সৰ্বাধিক ১৮W চাৰ্জিং সমৰ্থন কৰে, তেন্তে ৬০W, ৬৫W বা ১০০W ক্ষমতাৰ চাৰ্জাৰ লগালেও ফোনটোৱে সৰ্বাধিক ১৮W শক্তিহে ব্যৱহাৰ কৰিব।
বেছি wattৰ চাৰ্জাৰে বেটাৰীৰ আয়ুস কমায় নেকি?
এইটোও বহু ব্যৱহাৰকাৰীৰ মনত থকা এটা ডাঙৰ প্ৰশ্ন। বিশেষজ্ঞসকলৰ মতে বেছি ক্ষমতাৰ চাৰ্জাৰ ব্যৱহাৰ কৰাৰ বাবেই বেটাৰীৰ আয়ুস কমি নাযায়। বৰঞ্চ ফোনটোৰ ভিতৰত থকা সুৰক্ষা ব্যৱস্থাই অতিৰিক্ত কাৰেণ্ট বা তাপৰ পৰা বেটাৰী সুৰক্ষিত ৰাখে। সেয়েহে, মানসম্পন্ন আৰু প্ৰমাণিত চাৰ্জাৰ ব্যৱহাৰ কৰিলে বেটাৰীৰ ওপৰত কোনো বেয়া প্ৰভাৱ নপৰে। কিন্তু এটা বিষয় বিশেষভাৱে মনত ৰাখিব লাগিব। চাৰ্জাৰৰ wattতকৈ ভল্টেজ আৰু চাৰ্জিং প্ৰট’কল অধিক গুৰুত্বপূৰ্ণ। স্মাৰ্টফোনে সমৰ্থন কৰা ভল্টেজ, কাৰেণ্ট আৰু ফাষ্ট চাৰ্জিং প্ৰযুক্তিৰ সৈতে সামঞ্জস্য থকা চাৰ্জাৰ ব্যৱহাৰ কৰাটো সদায় উত্তম। বিশেষকৈ অচিনাকি বা নিম্নমানৰ নকল চাৰ্জাৰ যাক সাধাৰণ ভাষাত Copy বুলি কও, তেনে চাৰ্জাৰ ব্যৱহাৰ কৰাটো পৰিহাৰ কৰিব লাগে। এনে চাৰ্জাৰত প্ৰয়োজনীয় সুৰক্ষা ব্যৱস্থা নাথাকিবও পাৰে, যাৰ ফলত ফোন বা বেটাৰীৰ ক্ষতি হোৱাৰ আশংকা থাকে।
চাৰ্জ দিয়াৰ আগত গুৰুত্ব দিবলগীয়া কথা
ফোনে যিমান শক্তি সমৰ্থন কৰে, সিমানেই শক্তি চাৰ্জাৰৰ পৰা গ্ৰহণ কৰে। উদাহৰণস্বৰূপে ১৮W ফোনত ৬০W বা তাতোকৈ অধিক ক্ষমতাৰ চাৰ্জাৰ ব্যৱহাৰ কৰাটো সাধাৰণতে সম্পূৰ্ণ নিৰাপদ। অধিক ৱাটৰ চাৰ্জাৰ ব্যৱহাৰ কৰাৰ ফলত বেটাৰীৰ আয়ুস কমি নাযায়। সদায় উন্নত মানৰ, অ’ৰিজিনেল বা বিশ্বস্ত ব্ৰেণ্ডৰ চাৰ্জাৰ ব্যৱহাৰ কৰক।
নকল বা নিম্নমানৰ চাৰ্জাৰ আৰু ক্ষতিগ্ৰস্ত USB কেবল ব্যৱহাৰ কৰাৰ পৰা বিৰত থাকক। যদি আপোনাৰ হাতত নিজৰ চাৰ্জাৰ নাথাকে আৰু আন কাৰোবাৰ ৬০W বা তাতোকৈ অধিক ক্ষমতাৰ চাৰ্জাৰ ব্যৱহাৰ কৰিবলগীয়া হয়, তেন্তে চিন্তা কৰাৰ কোনো কাৰণ নাই। আধুনিক স্মাৰ্টফোনসমূহ স্মাৰ্ট পাৱাৰ মেনেজমেণ্ট ব্যৱস্থাৰে সজ্জিত। ফলত ফোনটোৱে নিজৰ প্ৰয়োজন অনুসৰিয়েই শক্তি গ্ৰহণ কৰে। অৱশ্যে, অধিক সুৰক্ষাৰ বাবে সদায় উন্নত মানৰ, বিশ্বস্ত আৰু ফোনৰ সৈতে সামঞ্জস্যপূৰ্ণ চাৰ্জাৰ ব্যৱহাৰ কৰাটোৱেই বুদ্ধিমানৰ কাম।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
