যুদ্ধৰ পাছত এইবাৰ বনজুইৰ কবলত ইজৰাইল, অন্য দেশক সহায় ভিক্ষা
মহাসংকটত পৰিছে ইজৰাইল, ইৰাণৰ সৈতে যুদ্ধৰ পাছত এইবাৰ ভয়ংকৰ বনজুইক কবলত দেশখন। যাৰ ফলত আন্তঃৰাষ্ট্ৰীয় সহায় ভিক্ষা খুজিছে ইজৰাইলে। এই বনজুই দেশখনৰ জেৰুজালেম চহৰৰ বাহিৰত হৈছে।
ইজৰাইলৰ জেৰুজালেমৰ উপকণ্ঠ অঞ্চলত এক বৃহৎ অগ্নিকাণ্ড সংঘটিত হৈছে। এই অগ্নিকাণ্ডই পৰিৱেশৰ যথেষ্ট ক্ষতি কৰাই নহয়, স্বাভাৱিক জীৱনো বেয়াকৈ প্ৰভাৱিত হৈছে।
এই জুই ইমানেই বৃহৎ যে ইয়াক নিৰ্বাপিত কৰিবলৈ শ শ অগ্নিনিৰ্বাপক বাহিনী, হেলিকপ্টাৰ আৰু অন্যান্য জৰুৰীকালীন সম্পদ নিয়োগ কৰা হৈছে। অগ্নিকাণ্ডৰ বাবে হাজাৰ হাজাৰ নাগৰিকে ঘৰ-দুৱাৰ খালী কৰিব লগা হৈছে।
বিষয়াসকলে এই অগ্নিকাণ্ডক দেশৰ ইতিহাসৰ আটাইতকৈ ডাঙৰ অগ্নিকাণ্ড বুলি অভিহিত কৰিছে। প্ৰৱল বতাহৰ বাবে জুই দ্ৰুতগতিত বিয়পি পৰিছে।
ইজৰাইলে আন্তঃৰাষ্ট্ৰীয় সমাজৰ পৰা সহায় বিচৰাৰ পৰাই এই জুইৰ ভয়াৱহতা নিৰ্ণয় কৰিব পাৰি। এই বনজুইৰ বিৰুদ্ধে যুঁজ দিয়াত সহায় কৰিবলৈ ইউক্ৰেইনে এখন বিমান প্ৰেৰণ কৰিব বুলি জানিবলৈ দিয়ে। স্পেইন, ফ্ৰান্স, ৰোমানিয়া, ক্ৰ’ৱেচিয়া আৰু ইটালীয়েও বিমান প্ৰেৰণ কৰাৰ কথা উল্লেখ কৰিছে।
ইজৰাইলৰ জৰুৰীকালীন চিকিৎসা সেৱাই জনোৱা মতে, এতিয়ালৈকে এই বনজুইত আহত হোৱা ২৩ জন লোকৰ চিকিৎসা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
