অসম লাইভ২৪ঃ নতুন বছৰতেই পৃথিৱীবাসীক আকৌ এবাৰ চমক দিবলৈ সাজু ইছৰোৰ দল৷ এইবাৰ ইছৰোই মঙল গ্ৰহলৈ পঠিয়াব যান৷ মঙলত দ্বিতীয়বাৰৰ বাবে যান পঠিয়াবলৈ সাঁজু হৈছে ইছৰোৰ৷ এই যানৰ নাম দিয়া হৈছে মঙলযান-২৷ কেইবাটাও উদ্দেশ্য হাতত লৈ ৰঙাগ্ৰহলৈ যান পঠিয়াবলৈ সাজু হৈছে ইছৰো৷
২০১৩ চনত প্রথমখন মহাকাশযান পঠিয়াইছিল ইছৰোই৷ সেই বৰ্ষতেই ইছৰোৱে আৰম্ভ কৰিছিল মঙল অৰবিটৰ মিছন৷ ২০১৪ চনত ৰঙা গ্ৰহৰ কক্ষপথত সফলভাৱে প্ৰৱেশ কৰিছিল মহাকাশযানখনে৷ মঙলগ্ৰহৰ কক্ষপথত সফলভাৱে মহাকাশযানখনক লৈ যোৱাটোৱেই ইছৰোৰ অন্যতম উদ্দেশ্য আছিল৷ সেই অভিযানৰ ৯ বছৰ সম্পূৰ্ণ হৈছে৷ ইছৰোৰ গৱেষণাৰ পৰিধিও বৃদ্ধি পাইছে৷ এইবাৰ ইছৰোৰ বিজ্ঞানীৰো আত্মবিশ্বাস পূৰ্বতকৈ বৃদ্ধি হৈছে৷ দ্বিতীয়বাৰৰ বাবে মঙলৰ কক্ষপথত মহাকাশযান পঠিয়াবলৈ সাঁজু হৈছে ভাৰতীয় মহাকাশ সংস্থাই৷ বিজ্ঞানীৰ আশা যে এই মিছনে ৰঙা গ্ৰহ মঙলৰ কোনেও আনিব নোৱাৰা তথ্য পঠিয়াব৷ এক সূত্ৰৰ খবৰ অনুসৰি মহাকাশযানখনৰ ভিতৰত থাকিব ৪টা পেলোড৷ এই পেলোডসমূহ হৈছে, ‘মাৰ্ক অৰবিট ডাছ এক্সপেৰিমেণ্ট(MODEX), এটা ৰেডিঅ’ অকালটেছন এক্সপেৰিমেণ্ট (RO), এটা এনাৰ্জেটিক আয়ন স্পেক্টমিটাৰ (EIS),এটা ‘লাংমুইৰ প্ৰোব আৰু এটা ইলেক্ট্ৰিক ফিল্ড এক্সপেৰিমেণ্ট (LPEX) যন্ত্র৷
এই বিশেষ ৪টা পেলোডৰ সহায়তেই মঙল গ্ৰহৰ ভিতৰ আৰু বাহিৰৰ পৰিবেশ, গ্ৰহটোৰ ভিতৰৰ পৃষ্ঠত থকা ধুলি আদিৰ ওপৰত গৱেষণা কৰিব৷ মঙলৰ গঠন আৰু বাসোপযোগ্যতা সম্পৰ্কীয় তথ্য আহৰণৰ চেষ্টা কৰিব ভাৰতীয় যানখনে৷ বৰ্তমান পৰ্যন্ত মঙলযান-২ সম্পৰ্কে বিশদ তথ্য দাঙি ধৰা নাই ইছৰোই৷ মঙলযান-২ মিছনৰ মোডেক্স পেলোডসমূহে মঙলৰ মাটিৰ পৰা এক নিৰ্দিষ্ট উচ্চতাৰ থাকি ধুলিৰ উৎপত্তি, ঘনত্ব আৰু গতিবিধি বুজিবলৈ চেষ্টা কৰিব৷ RO যন্ত্ৰবিধে মঙলৰ বায়ুমণ্ডল অধ্যয়ন কৰিব অৰ্থাৎ বায়ুমণ্ডলৰ চৰিত্ৰ বিশ্লেষণ কৰিব এই যন্ত্ৰই৷ EIS নামৰ যন্ত্ৰবিধে সৌৰকণা বিকিৰণ, সৌৰবায়ুকণা চিহ্নিত কৰিব৷ LPEX নামৰ যন্ত্ৰবিধে গ্ৰহটোৰ ইলেক্ট্ৰনৰ ঘনত্ব, ইলেক্ট্ৰনৰ তাপমাত্ৰা, বৈদুতিন তৰংগ অধ্যয়ন কৰিব৷
মঙলৰ বায়ুমণ্ডলৰ প্লাজমাৰ পৰিবেশ পৰ্যবেক্ষণৰ বাবেও বিশেষ পেলোড তৈয়াৰ কৰিছে ইছৰোই৷ সম্প্ৰতি ইছৰোৰ চন্দ্ৰযান-৩ মিছন অভিযান সফল হৈছে৷ চন্দ্ৰৰ দক্ষিণ মেৰুৰ কাষত ইছৰোৰ মহাকাশযানৰ বিক্ৰমে লেণ্ডিং কৰিছিল৷ ইয়াৰ পূৰ্বে চন্দ্ৰৰ দক্ষিণ মেৰুত কোনো দেশেই লেণ্ডিং কৰিব পৰা নাছিল৷ তাৰপিছতেই ইছৰোই পঠিয়াইছে সৌৰযান আদিত্য এল-১৷ আৰু শেহতীয়াভাৱে মঙললৈ যান পঠিয়াবলৈ সাজু হৈছে ইছৰোৰ দলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
