মানৱেন্দ্ৰ কুমাৰ দাসঃ চৰকাৰী চাকৰিত নিযুক্তি লাভৰ বাবে ভাৰতৰ সৰহসংখ্যক যুৱক-যুৱতীৰে এক হাবিয়াস থাকে৷ আৰু সেই হাবিয়াস পূৰণ কৰিবলৈ সকলো সময়তে সজাগ আৰু সতৰ্ক হৈয়ো থাকে৷ কিন্তু তাৰ পাছতো সাম্প্ৰতিক ভাৰতবৰ্ষত চৰকাৰী চাকৰি লাভ কৰা সহজ নহয়৷
কিয়নো শিক্ষিত নিবনুৱাৰ অনুপাতে চৰকাৰী কাৰ্যালয় অথবা বিভাগসমূহত থকা খালী পদৰ সংখ্যা যথেষ্ট কম৷ কিন্তু তাৰ মাজতো শিক্ষিত নিবনুৱা যুৱক-যুৱতীসকলৰ বাবে আছে এক সুখবৰ৷ প্ৰাপ্ত তথ্য অনুসৰি সম্প্ৰতি ভাৰতবৰ্ষত বিভিন্ন চৰকাৰী কাৰ্যালয়ত খালী হৈ থকা পদৰ সংখ্যা ৬০ লাখৰো অধিক৷
কেন্দ্ৰ আৰু ৰাজ্য চৰকাৰে যদি ব্যৱস্থা গ্ৰহণ কৰে তেন্তে এবছৰৰ ভিতৰত ৬০ লাখ যুৱক-যুৱতীয়ে চৰকাৰী কাৰ্যালয়ত বিভিন্ন পদত নিযুক্তি লাভ কৰাটো সহজ হৈ উঠিব৷
ইমান বৃহৎসংখ্যক চৰকাৰী চাকৰি খালী হৈ থকাৰ তথ্য ফাদিল কৰিছে কংগ্ৰেছৰ জ্যেষ্ঠ নেতা ড০ অজয় কুমাৰে৷ নিখিল ভাৰত কংগ্ৰেছ কমিটীৰ জ্যেষ্ঠ নেতা ড০ অজয় কুমাৰে ২৬ জুনত গুৱাহাটীত অনুষ্ঠিত কৰে এক সংবাদমেল৷ আৰু সংবাদমেলতে কংগ্ৰেছ নেতাগৰাকীয়ে এই তথ্য সদৰী কৰিছে৷
নেতাগৰাকীৰ পৰা পোৱা তথ্য অনুসৰি কেৱল কেন্দ্ৰ চৰকাৰৰ অধীনষ্ঠ কাৰ্যালয়সমূহতে ২৪ লাখতকৈয়ো অধিক চৰকাৰী চাকৰি খালী হৈ আছে৷ এতিয়া স্বাভাৱিকতে প্ৰশ্ন হয় ইমান বৃহৎসংখ্যক চৰকাৰী পদ খালী হৈ থকাৰ পাছতো সেই পদত চৰকাৰে নিযুক্তিৰ ব্যৱস্থা কৰিব পৰা নাই কিয়?
বিভিন্ন সূত্ৰই সংবাদ মাধ্যমত অভিযোগ কৰা অনুসৰি দেশৰ বিত্তীয় অৱস্থা সুস্থিৰ আৰু নিৰাপদ নহয় বাবে বিজেপি চৰকাৰে ৬০ লাখ খালী পদত নিযুক্তি প্ৰক্ৰিয়া সম্পূৰ্ণ কৰিবলৈ কুণ্ঠাবোধ কৰিছে৷
কিয়নো এইসমূহ খালী পদ পূৰণ হোৱাৰ পাছতে প্ৰতিমাহত ব্যয়ৰ বোজা বহুগুণে বৃদ্ধি পাব৷ ইফালে দেশত মুদ্ৰাস্ফীতিৰ হাৰ অত্যধিক৷
স্বাধীনোত্তৰ ভাৰতবৰ্ষত ইয়াৰ পূৰ্বে ৭ শতাংশ মুদ্ৰাস্ফীতি হোৱাৰ কোনো নজিৰ নাই আৰু সেইবাবে শোচনীয় বিত্তীয় পৰিস্থিতিৰ জোৰা মাৰিবলৈ চৰকাৰে কুণ্ঠাবোধ কৰিছে৷ ইয়াৰ পৰা এইটো স্পষ্ট হৈছে যে দেশৰ বিত্তীয় পৰিস্থিতি সুস্থিৰ অথবা নিৰাপদ নহয়৷
বিৰোধী দল-সংগঠনসমূহে যোৱা দুবছৰৰ পৰা এই অভিযোগ উত্থাপন কৰি আহিছে৷ অৱশ্যে তৎসত্ত্বেও আশাৰ খবৰটো হৈছে যদি দেশৰ বিত্তীয় পৰিস্থিতি উন্নত অথবা সুস্থিৰ হয় তেতিয়া মুদ্ৰাস্ফীতিৰ হাৰ নিম্নগামী হোৱাটো নিশ্চিত হৈ উঠিব৷ আৰু হয়তো চৰকাৰে সেই সময়লৈ অপেক্ষা কৰিছে৷
কিন্তু ইয়াৰ সমান্তৰালভাৱে বিৰোধী দলসমূহে আন এক বিস্ফোৰক তথ্যও প্ৰকাশ পাইছে৷ চৰকাৰী তথ্যৰ উদ্ধৃতি দি কংগ্ৰেছ নেতা ড০ অজয় কুমাৰে সংবাদমেলত ইয়াকো কৈছে যে অগ্নিপথ নামৰ যি আঁচনি প্ৰতিৰক্ষা বিভাগে গ্ৰহণ কৰিছে সেই আঁচনিয়ে দেশৰ সামৰিক শক্তিক দুৰ্বল কৰি পেলাব৷
কিয় আৰু কেনেকৈ সামৰিক শক্তি দুৰ্বল হ’ব তাকো ৰাজহুৱা কৰিছে বিৰোধী শিবিৰৰ নেতাগৰাকীয়ে৷ তেওঁ সদৰী কৰা অনুসৰি সম্প্ৰতি ভাৰতত সক্ৰিয় সশস্ত্ৰ সৈনিকৰ সংখ্যা ১৬ লাখ৷
প্ৰতিবছৰে নিৰ্দিষ্ট সংখ্যক সেনাজোৱানে অৱসৰ গ্ৰহণ কৰে৷ আৰু সেই খালী পদ পূৰাবলৈ প্ৰতিবছৰে নতুনকৈ ৮০ হাজাৰ সেনাজোৱানক নিযুক্তি দিয়া হয়৷ এই অৱসৰ গ্ৰহণ আৰু নিযুক্তি প্ৰক্ৰিয়াৰ মাজত সামাঞ্জস্য নাথাকিলে দেশৰ সামৰিক শক্তিত বিসংগতি হোৱা স্বাভাৱিক৷
ইফালে ১৪ জুনত দেশৰ প্ৰতিৰক্ষা মন্ত্ৰ্যালয়ে জাৰি কৰা এক জাননী অনুসৰি অগ্নিপথ নামৰ আঁচনিৰ অধীনত ৪ বছৰৰ বাবে সেনাবাহিনীত জোৱান হিচাপে নিযুক্তি দিয়া হ’ব৷ প্ৰস্তাৱ অনুসৰি এই প্ৰক্ৰিয়াৰে বছৰি ২৪ হাজাৰ সেনাজোৱানক নিযুক্তি দিয়া হ’ব৷
অৰ্থাৎ অৱসৰ গ্ৰহণ কৰিবলগীয়া ৮০ হাজাৰ জোৱানৰ বিপৰীতে মাত্ৰ ২৪ হাজাৰ জোৱানক নিযুক্তি দিবলৈ প্ৰস্তাৱ লোৱা হৈছে নেকি? এই প্ৰক্ৰিয়াই দেশৰ সামৰিক শক্তি হ্ৰাস নকৰিবনে?
বিত্তীয় পৰিস্থিতিৰ জোৰা মাৰিবলৈ চৰকাৰে যদি এই সিদ্ধান্ত লৈছে তেন্তে এই সিদ্ধান্তই সামৰিক শক্তিক দুৰ্বল কৰাৰ লগতে দেশৰ সাৰ্বভৌমত্ব আৰু নিৰাপত্তাৰ প্ৰতিও সৃষ্টি কৰিব ভাবুকি৷
কিয়নো এই প্ৰক্ৰিয়াই ৪ বছৰ পাছত দেশৰ সামৰিক ক্ষমতা ৬ লাখলৈ হ্ৰাস কৰিব বুলিও অতি বিস্ফোৰক অভিযোগ আনিছে বিৰোধী পক্ষৰ বহু নেতাই৷
আৰু সেইবাবে আগন্তুক সময়ছোৱাত চৰকাৰৰ ভূমিকাইহে নিৰ্ণয় কৰিব দেশৰ নিৰাপত্তা আৰু নিবনুৱা যুৱক-যুৱতীৰ কৰ্মময় জীৱনৰ ভৱিষ্যৎ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
