জীৱনৰ শেষ সময়খিনিত চিকিৎসক পুত্ৰলৈ পিতৃৰ ফোন- ‘মোৰ অৱস্থা খুব বেয়া, নেদেখা-নুশুনা বহু বছৰেই হ’ল সময় হ’লে তই পাৰিলে এবাৰ আহিবিচোন। নাতি-পুতি হৈছে যদি লৈ আহিবি, শেষ সময়খিনিত তহঁতৰ মুখখন এবাৰ চাবলৈ বৰ মন।’ পিতৃ চিৰদিনলৈ গ’লগৈ, কিন্তু পুত্ৰই আজি পৰ্যন্ত নল’লে খবৰ। পিতৃৰ ফোন লাভ কৰি পুত্ৰই একেআষাৰেই পিতৃক চিনি নোপোৱাৰ কথা ক’লে৷ কিন্তু কিয় পুত্ৰই চিনি নাপাওঁ কৈছিল পিতৃক? পিতা-পুত্ৰৰ সম্পৰ্কত নাছিল নেকি মধুৰতা? চিকিৎসক পুত্ৰৰ বিষয়ে এগৰাকী মহিলাই সামাজিক মাধ্যমত লিখিছে,
সংগীতা গগৈ নামৰ মহিলাগৰাকীয়ে লিখিছে, ‘মৃতক মোৰ নিকটাত্মীয়৷ সন্তান দুটি সৰু হৈ থাকোতেই তেওঁ অন্য এক মধুৰ সম্পৰ্কৰ খাতিৰত তেওঁলোকক ত্যাগ কৰিছিল৷ প্ৰায় গোটেই জীৱন নিজৰ খাম খেয়ালী স্বভাৱৰ বাবে আৰু আত্মকেন্দ্ৰিক স্বভাৱৰ বাবে সন্তান আৰু পত্নীক পিঠি দি এক বহেমীয়ান জীৱন যাপন কৰিছিল৷ কোন সন্তানে মাতৃৰ জীৱিত অৱস্থাত বেলেগ কাৰোবাক আদৰি ল’ব?
আমাৰ সমাজো আজৱ৷ নজনাকৈ বিচাৰৰ ৰায় দি যায়৷ আজি বহু বছৰ হ’ল তেওঁ পুত্ৰ আৰু পৰিবাৰ ত্যাগ কৰা৷ হয়তো জন্মদাতা বুলি এপাক আহিব লাগিছিল কিন্তু কেতিয়াবা ব্যভিচাৰ আৰু তেজৰ সম্পৰ্কবোৰৰ অবিশ্বাস, প্ৰৱঞ্চনাৰ ওজন জীৱন দায়ীৰ ঋণৰ ওজনতকৈ বেছি হৈ পৰে৷ ল’ৰা ছোৱালী দুয়োজনেই অমায়িক আৰু অতি দায়িত্বশীল৷ তেওঁলোকৰ মাতৃ তেওঁলোকৰ লগতেই থাকে৷ যদি মাতৃৰ প্ৰতি দায়িত্ব পালন কৰিব পাৰিছে তেন্তে পিতৃৰ প্ৰতি কিয়নো নোৱাৰিব? নিশ্চয় কিবা অত্যন্ত গোপনীয় ৰহস্য আছে৷ বয়স হ’লেই যে মানুহ দেৱতা হৈ যায় তেনে নহয়৷ সকলোৰে কথা কোৱা নাই৷ পিতা স্বৰ্গ৷ কিন্তু সন্তান ত্যাগী পিতাক কি কোৱা যাব? ল’ৰা ছোৱালী দুয়োজনেই বৰ দুখেৰে লৰালি পাৰ কৰিছে৷ ৰাইজে আৰু দুখ নিদিব৷’
অৱশ্যে পিতা পুত্ৰৰ সম্পৰ্ক প্ৰকৃততে কেনে আছিল সেই সম্পৰ্কে স্পষ্ট নহলেও পুত্ৰৰ সৈতে পিতৃয়ে পতা শেষ কথাৰ অডিঅ’ এতিয়া খুবেই ভাইৰেল হৈ পৰিছে সামাজিক মাধ্যমত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
