সাংস্কৃতিক তথা শৈক্ষিক নগৰী যোৰহাটত বানৰ মাজতে সংঘটিত এক ভয়ংকৰ ডকাইতি কাণ্ডই চাঞ্চল্যৰ সৃষ্টি কৰিছে। উত্তৰ-পশ্চিম যোৰহাটৰ মালৌখাটত মথাউৰি মেৰামতিৰ কামত নিয়োজিত শ্ৰমিকৰ শিবিৰত সংঘটিত হৈছে এই লুটপাতৰ ঘটনা। অভিযোগ অনুসৰি, ১০-১২ জনীয়া এটা ডকাইতৰ দলে শ্ৰমিকসকলক আক্ৰমণ কৰি শিবিৰৰ পৰা বিভিন্ন সামগ্ৰী লুট কৰি নিয়ে। ঘটনাৰ পাছত পুলিবৰ আৰক্ষীয়ে অভিযান চলাই এই কাণ্ডৰ সৈতে জড়িত চাঞ্চল্যকৰ তথ্য পোহৰলৈ আনে। আৰক্ষীৰ তদন্তত এজন নামঘৰীয়াৰ নামো সাঙোৰ খোৱাৰ তথ্য পোহৰলৈ আহিছে। আনকি নামঘৰীয়াজনৰ বাৰীৰ চুকত মাটিৰ তলত পুতি থোৱা অৱস্থাৰ পৰা উদ্ধাৰ কৰা হৈছে লুট হোৱা সামগ্ৰী।
উল্লেখ্য যে, শেহতীয়া বানত উত্তৰ-পশ্চিম যোৰহাটৰ এলেংমৰা-মালৌখাট অঞ্চল ব্যাপকভাৱে ক্ষতিগ্ৰস্ত হৈছিল। ভোগদৈ নৈৰ বানে অঞ্চলটোৰ মথাউৰি প্ৰায় পাঁচটাকৈ স্থানত চিঙি পেলোৱাৰ ফলত পৰিস্থিতি অধিক জটিল হৈ পৰিছিল। বানৰ ভয়ংকৰ পৰিস্থিতিৰ মাজতে জলসম্পদ বিভাগে জিঅ’ বেগ ব্যৱহাৰ কৰি ক্ষিপ্ৰতাৰে মথাউৰি মেৰামতিৰ কাম আৰম্ভ কৰিছিল। এই মেৰামতিৰ কামত নিয়োজিত শ্ৰমিকসকলৰ বাবে অঞ্চলটোতে অস্থায়ী শিবিৰ স্থাপন কৰা হৈছিল। অভিযোগ অনুসৰি, নিশাৰ ভাগত ১০-১২ জনীয়া এটা দলে শ্ৰমিকসকলৰ শিবিৰত প্ৰৱেশ কৰে। দলটোৱে শ্ৰমিকসকলক আক্ৰমণ কৰাৰ লগতে ভয়-ভাবুকি প্ৰদান কৰি শিবিৰত থকা বিভিন্ন সামগ্ৰী লুট কৰি নিয়ে। ঘটনাটোৱে বানপীড়িত অঞ্চলটোত নতুন আতংকৰ সৃষ্টি কৰে।
ঘটনাৰ বিষয়ে অৱগত হোৱাৰ পাছতে পুলিবৰ আৰক্ষীয়ে তদন্ত আৰম্ভ কৰে। তদন্তৰ অংশ হিচাপে আৰক্ষীয়ে বিভিন্ন স্থানত অভিযান চলায়। এই অভিযানতে চাঞ্চল্যকৰভাৱে এজন নামঘৰীয়াৰ ঘৰৰ চৌহদত মাটিৰ তলত পুতি থোৱা অৱস্থাত জলসম্পদ বিভাগৰ জিঅ’ বেগ উদ্ধাৰ কৰা হয়। আৰক্ষীয়ে নামঘৰীয়াজনৰ বাৰীত খান্দি উলিয়াই লুট হোৱা সামগ্ৰী উদ্ধাৰ কৰাত সমগ্ৰ ঘটনাই নতুন মোৰ লয়। বানৰ দৰে জটিল পৰিস্থিতিত মথাউৰি মেৰামতিৰ বাবে ব্যৱহৃত সামগ্ৰী লুট কৰাৰ ঘটনাক লৈ স্বাভাৱিকতেই প্ৰশ্ন উত্থাপন হৈছে।
স্থানীয় লোকৰ মাজতো ঘটনাটোক লৈ তীব্ৰ প্ৰতিক্ৰিয়াৰ সৃষ্টি হৈছে। বানৰ সময়ত মথাউৰি মেৰামতিৰ কাম অতি জৰুৰী হৈ থকাৰ সময়তে শ্ৰমিকৰ শিবিৰত এইদৰে আক্ৰমণ আৰু লুটপাত সংঘটিত হোৱাত অঞ্চলটোৰ নিৰাপত্তা ব্যৱস্থাক লৈও প্ৰশ্ন উত্থাপন হৈছে। আৰক্ষীৰ তদন্ত অব্যাহত আছে। উদ্ধাৰ হোৱা সামগ্ৰী আৰু আৰক্ষীৰ অভিযানৰ ভিত্তিত ঘটনাটোৰ সৈতে আৰু কোনো লোক জড়িত আছে নেকি, সেই বিষয়েও অনুসন্ধান চলি আছে। সমগ্ৰ ঘটনাটোৱে যোৰহাটত বানৰ মাজতে সংঘটিত এক গুৰুতৰ অপৰাধ হিচাপে চাঞ্চল্যৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
