১০ নৱেম্বৰত অৱসৰ গ্ৰহণ ডি ৱাই চন্দ্ৰচূড়ৰ, ১১ নৱেম্বৰত নতুন মুখ্য ন্যায়াধীশৰ শপতগ্ৰহণ, কোন পৰিৱৰ্তী ন্যায়াধীশ !
ভাৰতৰ ৰাষ্ট্ৰপতি দ্ৰৌপদী মূৰ্মুৱে বৃহস্পতিবাৰে ন্যায়াধীশ সঞ্জীৱ খান্নাক ভাৰতৰ পৰৱৰ্তী মুখ্য ন্যায়াধীশ হিচাপে নিযুক্তি দিয়ে। ন্যায়াধীশ খান্না বৰ্তমান উচ্চতম ন্যায়ালয়ৰ সবাতোকৈ জ্যেষ্ঠ ন্যায়াধীশ। অহা ১১ নৱেম্বৰৰ পৰা তেওঁ মুখ্য ন্যায়াধীশৰ দায়িত্ব ল’ব। বৰ্তমানৰ মুখ্য ন্যায়াধীশ ডি ৱাই চন্দ্ৰচূড়ে অহা ১০ নৱেম্বৰত অৱসৰ গ্ৰহণ কৰিব।
কেন্দ্ৰীয় আইন আৰু ন্যায় মন্ত্ৰী অৰ্জুন ৰাম মেঘৱালে কয়, ‘ভাৰতীয় সংবিধানে প্ৰদান কৰা ক্ষমতা প্ৰয়োগ কৰি, মাননীয় ৰাষ্ট্ৰপতিৰ সৈতে আলোচনা কৰি ন্যায়াধীশ সঞ্জীৱ খান্নাক ভাৰতৰ মুখ্য ন্যায়াধীশ হিচাপে নিযুক্তি দি আনন্দিত হৈছো’।
ভাৰতৰ ৫১ সংখ্যক মুখ্য ন্যায়াধীশ হিচাপে দায়িত্ব ল’ব ন্যায়াধীশ খান্নাই। অৱশ্যে তেওঁৰ কাৰ্যকাল কেৱল ২০২৫ৰ ১৩ মে’লৈকেহে চলিব। উল্লেখযোগ্য যে ২০১৯ চনৰ ১৮ জানুৱাৰীত দিল্লী উচ্চ ন্যায়ালয়ৰ পৰা উচ্চতম ন্যায়ালয়ত ন্যায়াধীশ খান্নাক নিযুক্তি দিয়া হৈছিল।
উচ্চতম ন্যায়ালয়ৰ ন্যায়াধীশ হিচাপে কাৰ্যনিৰ্বাহ কৰা সময়ছোৱাত ন্যায়াধীশ খান্নাই কেইবাটাও ৰাজনৈতিক স্পৰ্শকাতৰ গোচৰত বিচাৰপীঠৰ নেতৃত্ব দিছিল। ইয়াৰ ভিতৰত উল্লেখযোগ্য হৈছে আম আদমি পাৰ্টিৰ নেতা অৰবিন্দ কেজৰিৱালৰ জামিন আবেদনৰ সৈতে জড়িত গোচৰ। শেহতীয়াকৈ তেওঁৰ নেতৃত্বত গঠিত বিচাৰপীঠে কেজৰিৱালক অন্তৱৰ্তীকালীন জামিন প্ৰদান কৰে।
ন্যায়াধীশ খান্নাই ইলেক্ট্ৰনিক ভোটিং মেচিন (ইভিএম) আৰু ভোটাৰ ভেৰিফাইড পেপাৰ অডিট ট্ৰেইল (ভিভিপিএটি)ৰ সৈতে জড়িত গোচৰৰ শুনানি গ্ৰহণ কৰি আছিল। তেওঁৰ এই সিদ্ধান্তত ভাৰতীয় নিৰ্বাচন আয়োগক অতিৰিক্ত সুৰক্ষা ব্যৱস্থা ৰূপায়ণ কৰিবলৈ আহ্বান জনায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
