সন্তান জন্মৰ পাছত এগৰাকী মাতৃয়ে তেওঁৰ শিশুক স্তনদুগ্ধ পান কৰোৱাই সেয়াই স্বাভাৱিক৷ কিন্তু সেই মাতৃদুগ্ধত যদি আৰু এক নৱজাতকৰ প্ৰাণ বাচে তেন্তে? ঠিক সেই মানৱিক উদাহৰণেই দাঙি ধৰিলে প্ৰাক্তন বেডমিণ্টন তাৰকা জ্বালা গুট্টাই৷
সম্প্ৰতি এক্সযোগে কৰা এটা পোষ্টত তেওঁ জনাইছে যে মাতৃত্বৰ প্ৰথম এবছৰত তেওঁ প্ৰায় ৬০ লিটাৰ স্তনদুগ্ধ হায়দৰাবাদ আৰু চেন্নাইৰ চৰকাৰী হাস্পতালত দান কৰিছে৷ তেওঁৰ এই উদ্যোগক কেৱল প্ৰশংসাই কৰা নাই, নতুনকৈ সন্মুখলৈ আনিছে ডনাৰ ব্ৰেষ্টমিল্ক আৰু মিল্ক বেংকৰ গুৰুত্বও৷ জ্বালা গুট্টাই লিখিছে, মাত্ৰ ১০০ মিলিলিটাৰ ড’নাৰ মিল্কে ১ কেজি ওজনৰ অপৰিণত শিশুক কেইবাদিন পৰ্যন্ত পুষ্টি জোগান ধৰিব পাৰে৷ নিওনেটাল কেয়াৰ ইউনিট বা এন আই চি ইউত ভৰ্তি অসংখ্য নৱজাতকৰ বাবে এই গাখীৰ হৈ উঠিব পাৰে জীৱনী শক্তি৷
কিয় ইমান গুৰুত্বপূৰ্ণ ডনাৰ ব্ৰেষ্টমিল্ক?
চিকিৎসকসকলৰ মতে মাতৃদুগ্ধ কেৱল খাদ্যই নহয়, নৱজাতকৰ বাবে একপ্ৰকাৰ প্ৰাকৃতিক প্ৰতিৰোধক৷ ইয়াত থাকে এণ্টিবডি, এনজাইম আৰু নানান ৰোগপ্ৰতিৰোধকাৰী উপাদান, যিয়ে শিশুক সংক্ৰমণৰ পৰা ৰক্ষা কৰে আৰু শৰীৰৰ স্বাভাৱিক বিকাশত সহায় কৰে৷
বিশেষকৈ প্ৰিমেচিউৰ বা অসুস্থ শিশুৰ ক্ষেত্ৰত ইয়াৰ গুৰুত্ব আৰু বেছি৷ কাৰণ এই শিশুৰ জন্মৰ পাছত নানান জটিলতা থাকে৷ তাৰভিতৰত সকলোতকৈ ভয়ংকৰ এক ৰোগ হৈছে নেক্ৰোটাইজিং এণ্টাৰোকোলাইটিছ৷ এই ৰোগত শিশুৰ অন্ত্ৰত মাৰাত্মক সংক্ৰমণ হব পাৰে৷ যি বহু সময়ত প্ৰাণঘাটিও হৈ উঠে৷
গৱেষণাত দেখা গৈছে যিসমূহ শিশুৱে মাতৃদুগ্ধ বা স্ক্ৰিণিং কৰা ডোনাৰ মিল্ক পায় তেওঁলোকৰ এনইচি হোৱাৰ আশংকা অন্য ফৰ্মূলা মিল্ক খোৱা শিশুৰ তুলনাত বহু কম৷
যেতিয়া মাতৃয়ে শিশুক স্তনপান কৰাব নোৱাৰে
সকলো মাতৃতে সন্তানক জন্মৰ লগে লগে মাতৃদুগ্ধ খোৱাব নোৱাৰে৷ চিজাৰিয়ান ডেলিভাৰি, অত্যধিক শাৰীৰিক দুৰ্বলতা, মানসিক চাপ, প্ৰিমেচিউৰ ডেলিভাৰি বা অন্য জটিলতাৰ কাৰণে বহু সময়ত মাতৃগৰাকীক দুগ্ধ অহাত দেৰি হয়৷ সেই কঠিন সময়ত ডোনাৰ মিল্কেই নৱজাতকৰ বাবে লাইফলাইন হৈ থিয় দিয়ে৷
এইসমূহ অসুবিধাৰ বাবেই বিভিন্ন হাস্পতালত তৈয়াৰ হৈছে হিউমেন মিল্ক বেংক৷ ইয়াত সুস্থ মাতৃসকলে স্বেচ্ছাই স্তনদুগ্ধ বা বুকুৰ গাখীৰ দান কৰে৷ স্বাস্থ্য পৰীক্ষা আৰু নিৰাপত্তাৰ সমস্ত নিয়ম মানি সেই গাখীৰ সংগ্ৰহ পৰি সংৰক্ষণ কৰা হয়৷ তাৰপিছতেই এন আই চিইউত ভৰ্তি শিশুসকলক সেই গাখীৰ দিয়া হয়৷
সচেতনতাৰ অভাৱ ডাঙৰ সমস্যা
ভাৰতত প্ৰতিবছৰে বিপুল সংখ্যক অপৰিণত শিশুৰ জন্ম হয়৷ ফলত নিৰাপদ ডোনাৰ মিল্কৰ প্ৰয়োজনো ক্ৰমশ বাঢ়িছে৷ কিন্তু এতিয়াও বহু মানুহে নাজানে যে বুকুৰ গাখীৰো দান কৰিব পাৰি আৰু ই শিশুৰ জীৱন ৰক্ষা কৰিব পাৰে৷ ৰক্তদানৰ দৰেই বেষ্টমিল্ক দানো এক নিস্বাৰ্থ মানৱিক উদ্যোগ৷
জ্বালা গুট্টাই তেওঁৰ পোষ্টত আবেদন জনাইছে যে যিসকলে স্তনদুগ্ধ দান কৰিবলৈ আগ্ৰহী তেওঁলোকে নিকটবৰ্তী চৰকাৰী হাস্পতাল বা নিবন্ধিত মিল্ক বেংকৰ সৈতে যোগাযোগ কৰিব পাৰে৷ কাৰণ এগৰাকী মাতৃৰ সামান্য দানেই হয়তো আৰু এক সৰু শিশুক প্ৰাণ উপহাৰ দিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
