নভৱা ঘটনা বুলিলেও এনে ঘটনা বাৰে বাৰে দেশত ঘটিবলৈ ধৰিছে৷ কিছুদিন পূৰ্বে প্ৰেমিকৰ দেহ খণ্ডিত কৰি নীলা ড্ৰামত ভৰাই নলাত পেলাই দিছিল প্ৰেয়সীয়ে৷ এইবাৰ আকৌ ট্ৰাংকত ওলাইছে মহিলাৰ দেহ৷ এইবাৰৰ ঘটনা লক্ষ্ণৌৰ গৌমতি নগৰ ষ্টেচনত৷ ছাফাই কৰ্মচাৰীয়ে ট্ৰেইনৰ শ্লিপাৰ কোচত প্ৰৱেশ কৰোতেই তেওঁলোকৰ নজৰত পৰে এটা তেজৰ টোপাল৷ আৰু তেজলগা এটা গৰাকীবিহীন ট্ৰাংকো তেওঁলোকৰ নজৰত পৰে৷ ট্ৰাংকটোত এটা তলাও ওলমি আছিল৷ ট্ৰেইনৰ ছাফাই কৰ্মীকেইজনে ট্ৰাংকটো দাঙি ট্ৰেইনৰ বাহিৰলৈ আনি কি আছে জানিবলৈ তলা ভাঙে৷ তলা ভাঙিয়েই আচৰিত হৈ পৰে ছাফাই কৰ্মীকেইজন৷ ট্ৰাংকটোত ভিতৰত তেওঁলোকে এগৰাকী মহিলাৰ খণ্ডিত দেহ দেখা পায়৷
বিহাৰৰ ছপৰাৰ পৰা যোৱা এই ট্ৰেইন লক্ষ্ণৌৰ গৌমতী নগৰ ষ্টেচনলৈকে যায়৷ ডবাসমূহ খালী হোৱাৰ পাছত তাত ছাফাই কৰ্মচাৰীসকলে ট্ৰেইনৰ ডবাসমূহ চফা কৰে৷ পূৰ্বৰ ধাৰাৰেই তেওঁলোকে ডবাসমূহ চফা কৰিবলৈ যাওঁতেই দেখা পায় এই বিশেষ ট্ৰাংকটো৷ চীটৰ তলত তলাবন্ধ কৰি থোৱা অৱস্থাত উদ্ধাৰ হৈছিল ট্ৰাংকটো৷
ছাফাই কৰ্মচাৰীসকলে ৰে’লৱে প্ৰশাসনক সমগ্ৰ ঘটনা সম্পৰ্কে জনাইছে৷ লগতে ট্ৰাংক খোলাৰো সমূহ ভিডিঅ’ তেওঁলোকে ৰেকৰ্ডিং কৰিছে৷ ট্ৰাংকৰ ভিতৰত মহিলাৰ শিৰচ্ছেদ কৰা দেহটো দেখা পায় ছাফাই কৰ্মচাৰীসকলে৷ ইয়াৰোপৰি হাত আৰু ভৰিও কাটি পলিথিনত মেৰিয়াই কাপোৰেৰে বান্ধি ট্ৰাংকৰ এটা কোণতে থোৱা হৈছিল৷
ৰে’লৱে আৰক্ষীৰ এছ পি ৰোহিত মিশ্ৰই এই ঘটনা সম্পৰ্কে দিয়া মন্তব্যত কয়, ‘এই শৱদেহ কমেও দুদিন পুৰণি হ’ব পাৰে৷ মহিলাগৰাকীৰ বয়স কমেও ৩০ৰ পৰা ৩৫ বছৰৰ ভিতৰত হ’ব৷’ তেওঁ লগতে কয় যে মহিলাগৰাকীক ডিঙি কাটি হত্যা কৰা হৈছে৷ কাৰণ তেওঁৰ ডিঙি আৰু কান্ধত আঘাতৰ চিন আছে৷ ইয়াৰপৰাই অনুমান হয় যে তেওঁক হত্যা কৰাই হৈছে৷ হত্যাৰ পূৰ্বে হতাহতিও হ’ব পাৰে কাৰণ দেহত আঁচোৰৰ দৰে আঘাতৰ চিন আছে৷ শৱদেহটো লুকুৱাবলৈকে তেওঁলোকে ট্ৰেইনত তুলি দিয়ে শৱদেহ লুকুওৱা ট্ৰাংকটো৷
ট্ৰেইনত গৌৰখপুৰ আহি পোৱাৰ পূৰ্বে প্ৰায় ২০টাকৈ ষ্টেচনত ৰয়৷ যাত্ৰাৰ সময়ত ট্ৰেইনখনে বিহাৰৰ থাবেত কমেও ৩০ মিনিট সময়ৰ বাবে ৰয়৷ গৌৰখপুৰ আৰক্ষীয়ে সন্দেহ কৰিছে যে এই শৱদেহ থাবাতেই ট্ৰেইনত উঠোৱা হৈছে৷ জিআৰপিয়ে সমগ্ৰ ঘটনাক লৈ তদন্ত আৰম্ভ কৰিছে৷ ট্ৰেইনখনে যাত্ৰা আৰম্ভ কৰা ষ্টেচনৰ পৰা এই ট্ৰেইন ৰোৱা ২০টাকৈ ষ্টেচনৰ চিচিটিভি ফুটেজ সংগ্ৰহ অভিযান আৰম্ভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
