অসম লাইভ২৪ঃ প্ৰায় ২৪ ঘণ্টা অজ্ঞান হৈ থকাৰ পিছত শনিবাৰে সম্বিত ঘূৰি আহিছে সুভদ্ৰা দেৱী ওৰফে ‘কলিজা আইতা’ৰ। বিগত তিনি দিন ধৰি চকু নেমেলা আইতাই আজি দুই-এটা কথাও ক’বলৈ আৰম্ভ কৰিছে। এই কথা জানিবলৈ দিছে প্ৰমোদ তালুকদাৰ মেম’ৰিয়েল অ’ল্ড এজ হোম কৰ্তৃপক্ষই।
অ’ল্ড এজ হোম কৰ্তৃপক্ষই আইতাৰ সাধাৰণভাৱে সুস্থ হোৱাত গুৱাহাটী মেডিকেল কলেজ এণ্ড হাস্পতালৰ চিকিৎসক, চিকিৎসা কৰ্মীসকলৰ নিৰন্তৰ প্ৰচেষ্টা আৰু ৰাইজৰ মৰমৰ শলাগ লয়। অৱশ্যে এতিয়াও সম্পূৰ্ণৰূপে সুস্থ হোৱা নাই আইতা। স্বাস্থ্যৰ সামান্য উন্নতি হোৱাৰ খবৰটোৱে কিন্তু বহুতকে আনন্দ দিছে। সকলোৰে মৰমৰ সুভদ্ৰা দেৱী ওৰফে ‘কলিজা আইতা’ প্ৰমোদ তালুকদাৰ মেম’ৰিয়েল অ’ল্ড এজ হোমৰ বাসিন্দা। শতকগৰকা কলিজা আইতাৰ কথা–বতৰাই সকলোকে মুগ্ধ কৰি আহিছে।
বাৰ্ধক্যজনিত কাৰণত অসুস্থ হৈ পৰা কলিজা আইতাক বৃহস্পতিবাৰে গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হৈছিল। বৰ্তমানো আই চি ইউতে চিকিৎসাধীন হৈ আছে তেওঁ। এতিয়া সকলোৱে আশা কৰিছে আইতা সোনকালে সম্পূৰ্ণ সুস্থ হৈ ঘৰলৈ উভতি আহক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
