কেনিয়াত ছাফাৰি ভ্ৰমণৰ সময়ত সংঘটিত এক ভয়ংকৰ হেলিকপ্টাৰ দুৰ্ঘটনাত ৭জন লোকৰ মৃ*ত্যু ঘটিছে। ১৯ আগষ্টত উত্তৰ কেনিয়াৰ ছাম্বুৰু কাউণ্টিৰ মাউণ্ট অলোলোকৱেৰ ওচৰত সংঘটিত হয় এই দুৰ্ঘটনা। হেলিকপ্টাৰখনত ৬জন যাত্ৰী আৰু এজন পাইলট আছিল। কেনিয়া চিভিল এভিয়েচন অথৰিটিয়ে জনোৱা অনুসৰি, হেলিকপ্টাৰখন পুৱা প্ৰায় ৯:১৩ বজাত লইছাবা কনজাৰভেন্সীৰ পৰা ইৱাছ’ নিয়ৰো অঞ্চললৈ গৈ থকা অৱস্থাত দুৰ্ঘটনাত পতিত হয়। দুৰ্ঘটনাটো মাউণ্ট অলোলোকৱেৰ ওচৰৰ দুৰ্গম অঞ্চলত সংঘটিত হোৱাৰ বাবে উদ্ধাৰ অভিযানতো যথেষ্ট অসুবিধাৰ সৃষ্টি হয়। ঘটনাস্থলীত জুই আৰু ধোঁৱাৰ সৃষ্টি হৈছিল বুলি উদ্ধাৰকাৰী সংস্থাসমূহে জনাইছে। কেনিয়া ৰেড ক্ৰছসহ বিভিন্ন সংস্থাই উদ্ধাৰ আৰু মৃ*তদেহ উদ্ধাৰৰ কামত অংশগ্ৰহণ কৰে। দুৰ্ঘটনাটোৰ প্ৰকৃত কাৰণ এতিয়াও স্পষ্ট হোৱা নাই । ঘটনা সন্দৰ্ভত কেনিয়া এয়াৰ এক্সিডেণ্ট ইনভেষ্টিগেচন বিভাগে তদন্ত আৰম্ভ কৰিছে।
প্ৰকাশিত তথ্য অনুসৰি, দুৰ্ঘটনাত মৃ*ত্যু হোৱা লোকসকলৰ ভিতৰত পাঁচজন আমেৰিকাৰ নাগৰিক আছিল। নিহতসকলৰ ভিতৰত আছিল পাইলট জোছ আউট্ৰাম, মাৰ্কিন সংবাদকৰ্মী জোছ আলবাৰ্টো ছুৱাৰেজ, মিচেল ছেন্সি, ষ্টেফানী হলিহান, ৰ’জাৰ এডৱাৰ্ড ডুৱাৰ্টে, এডাম হ্লাভাটি আৰু হেনৰী পাৰা। হেলিকপ্টাৰখন লেডী লৰী হেলিকপ্টাৰ্ছৰ দ্বাৰা পৰিচালিত Eurocopter EC130 B4 আছিল। ই লইছাবা কনজাৰভেন্সীৰ পৰা ইৱাছ’ নিয়ৰো নদী অঞ্চললৈ যাত্ৰা কৰিছিল। এই অঞ্চলটো কেনিয়াৰ বিখ্যাত বন্যপ্ৰাণী আৰু ছাফাৰী পৰ্যটনৰ অন্যতম কেন্দ্ৰ।
এই দুৰ্ঘটনাই কেৱল কেনিয়াতে নহয়, আমেৰিকা আৰু ইকুৱেডৰতো ব্যাপক প্ৰতিক্ৰিয়াৰ সৃষ্টি কৰিছে। পাঁচজন আমেৰিকান নাগৰিকৰ মৃত্যুৰ বিষয়টো আমেৰিকাৰ ষ্টেট ডিপাৰ্টমেণ্টে নিশ্চিত কৰিছে আৰু আমেৰিকাৰ দূতাবাসে স্থানীয় কৰ্তৃপক্ষৰ সৈতে যোগাযোগ কৰি পৰিয়ালসমূহক কনছুলাৰ সহায় আগবঢ়াইছে। ইকুৱেডৰ চৰকাৰেও মিচেল ছেন্সি-কণ্টুগি আৰু তেওঁৰ পত্নীৰ মৃত্যুত শোক প্ৰকাশ কৰিছে।
বৰ্তমান তদন্তৰ মূল লক্ষ্য হৈছে হেলিকপ্টাৰখন কিয় দুৰ্ঘটনাত পতিত হ’ল, সেই বিষয়ে তথ্য সংগ্ৰহ কৰা। বিমানখনৰ কাৰিকৰী অৱস্থা, উৰণৰ পৰিস্থিতি আৰু দুৰ্ঘটনাৰ সময়ৰ অন্যান্য বিষয় পৰীক্ষা কৰা হ’ব। তদন্ত সম্পূৰ্ণ হোৱাৰ পিছতহে দুৰ্ঘটনাৰ প্ৰকৃত কাৰণ স্পষ্ট হোৱাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
