অসম লাইভ২৪ঃ ৭ ফেব্ৰুৱাৰীত বিবাহপাশত আৱদ্ধ হ’ল সিদ্ধাৰ্থ মলহোত্ৰা আৰু কিয়াৰা আদৱানী৷ ৰাজস্থানৰ সূৰ্যগড় প্ৰাসাদত নিকটাত্মীয় তথা বন্ধুবৰ্গৰ উপস্থিতিত বিবাহৰ অনুষ্ঠান সম্পন্ন হয় কিয়াৰা-সিদ্ধাৰ্থৰ৷ সিদ-কিয়াৰাই কিন্তু দীপিকা-ৰণবীৰ, বিৰাট-অনুষ্কা আৰু আলিয়া-ৰণবীৰৰ দৰে সব্যসাচীয়ে তৈয়াৰ কৰা পোছাক পৰিধান কৰা নাই৷ সিদ্ধাৰ্থ-কিয়াৰাই মনিশ মলহোত্ৰাই ডিজাইন কৰা পোছাকহে পৰিধান কৰে বিবাহৰ অনুষ্ঠানত৷ কি বৈশিষ্ঠ আছিল এই পোছাকৰ?
সিদ্ধাৰ্থ-কিয়াৰা দুয়োগৰাকীয়ে ভ্ৰমণপ্ৰিয়৷ দুয়োৱে প্ৰেমৰ সম্পৰ্কত থাকোতেও দক্ষিণ আফ্ৰিকা, ডুবাইকে ধৰি বহুকেইখন দেশেই ভ্ৰমণ কৰিছে৷ সিদ্ধাৰ্থ-কিয়াৰাই এক সাক্ষাৎকাৰত প্ৰকাশ কৰা অনুযায়ী দুয়োৰে প্ৰিয় ঠাই হৈছে ৰোম৷ দুয়োৰে ইটালীৰ ৰাজধানী ৰোম ভালপোৱাৰ কথা জানিয়েই মনিশ মলহোত্ৰাই তাৰকা যুঁটিৰ বাবে তৈয়াৰ কৰা পোছাকত ৰোমৰ ডিজাইন দিছে ডিজাইনাৰগৰাকীয়ে৷
কিয়াৰাই পৰিধান কৰা গোলপীয়া ৰঙৰ লেহেঙ্গাত প্ৰাচীন ৰোমৰ স্থাপত্যৰ কাৰুকাৰ্য সূক্ষ্মভাৱে তুলি ধৰা হৈছে৷ মনীশ মলহোত্ৰাই ডিজাইন কৰা পোছাকত সুন্দৰৰূপত ফুটি উঠিছিল কিয়াৰাৰ সৌন্দৰ্য৷ খুব বেছি মেকআপো কৰা নাছিল কিয়াৰাই৷ সাধাৰণ নিউড মেকআপতেই বিয়াৰ বাবে সাজিছিল কিয়াৰাই৷ দুয়োৰে পোছাকৰ থিম আছিল গুলপীয়া আৰু গল্ডেনৰ মিশ্ৰণ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
