অসম লাইভ ২৪ঃ মানুহৰ জীৱনত ভাল আৰু বেয়া সময় দুয়োটাই আহে। বহুতৰেই অভিযোগ জীৱনটোত ভাল সময়তকৈ বেয়া সময়েই বেছি। বেয়াৰ তুলনাত ভাল একেবাৰেই নগণ্য। এইধৰণৰ মনোভাৱে কিয় ক্ৰিয়া কৰে আমাৰ মনত? ইয়াৰ আঁৰত আছে বহুকেইটা কাৰণ। মনোবিজ্ঞানীয়ে এই বিষয়ে দিছে বিশেষ কিছু মতামত।
মানুহৰ মনত সদায়ে ভাল ঘটনাতকৈ বেয়া ঘটনাইহে অধিক ক্ৰিয়া কৰে। দৃষ্টি আকৰ্ষণ কৰে বেয়া ঘটনাইহে। ইতিবাচক কথাতকৈ নেতিবাচক কথাৰ প্ৰতিহে আমাৰ আকৰ্ষণ সদায়ে বেছি। নেতিবাচক ঘটনাবোৰে মানুহৰ মনত এনেকৈ ক্ৰিয়া কৰে যে তাৰ পৰা ওলাই আহি সুস্থ জীৱন-যাপন কৰা বহুতৰ পক্ষেই সম্ভৱ হৈ নুঠে। এই প্ৰৱণতাকেই চিকিৎসাবিজ্ঞানৰ ভাষাত ‘নিগেটিভ বায়াছ’ বুলি কোৱা হয়।
‘নিগেটিভ বায়াছ’ কি? নিভেটিভ বায়াছৰ স্বীকাৰ হোৱা ব্যক্তিয়ে সদায়ে বেয়া ঘটনাকহে প্ৰাধান্য দিয়ে। ভাল ঘটনাকো এইসকল ব্যক্তিয়ে সহজভাৱে ল’ব নোৱাৰে। এই ৰোগত আক্ৰান্ত ব্যক্তিয়ে হাঁহি-আনন্দময় পৰিবেশৰ পৰা দূৰত অৱস্থান কৰিব বিচাৰে। এইসকল ব্যক্তিয়ে নিজেও যেনেদৰে আনন্দত বাগ ল’ব নোৱাৰে তেনেদৰে অন্য কোনো ব্যক্তিৰো সুখ সহ্য কৰাটো টান হৈ পৰে। সৰল জীৱন-যাপনৰ কথাবোৰ এইসকল ব্যক্তিয়ে প্ৰায় পাহৰিয়েই পেলাই। মানুহৰ সংগৰ পৰা আঁতৰি এইসকল ব্যক্তিয়ে অকলশৰে সময় অতিবাহিত কৰিব বিচাৰে।
‘নিগেটিভ বায়াছ’ ৰোগ নে? এইয়া একপ্ৰকাৰৰ মানসিৰ ৰোগ বুলি চিকিৎসা বিজ্ঞানে ক’ব খোজে। এই ৰোগৰ পৰা পৰিত্ৰাণ পাবলৈ ৰোগীগৰাকীয়ে নিজেও সতৰ্ক থকাটো জৰুৰী। এইসকল ব্যক্তিয়ে নেতিবাচক কথা কমকৈ কোৱাৰ বা ভৱাৰ অভ্যাস নিজেই গঢ়ি তোলাটো প্ৰয়োজন। আত্মসমালোচনা মানুহৰ জীৱনত প্ৰয়োজন যদিও তাৰ মাত্ৰা অত্যাধিক হোৱাটো ৰোগৰেই লক্ষণ। এই ৰোগত আক্ৰান্ত ৰোগীৰ ক্ষেত্ৰত পৰিয়ালৰ ভূমিকাও গুৰুত্বপূৰ্ণ হৈ পৰে। এই ৰোগত আক্ৰান্ত ৰোগীক অত্যাধিক সমালোচনা কৰাৰ সলনি আত্মবিশ্বাক গঢ়ি তুলিব পৰা কথা কোৱাটোৱে প্ৰয়োজন। শৰীৰৰ সমান্তৰালভাৱে মনৰ যত্ন লোৱাটোও সমানেই গুৰুত্বপূৰ্ণ।
নিগেটিভ বায়াছৰ লক্ষণে দেখা দিয়া ব্যক্তিসকলে অন্যান্য কৰ্মত নিজকে প্ৰতিসময়তে ব্যস্ত ৰখাটো দৰকাৰ। সৃষ্টিশীল কৰ্মত জড়িত থকাৰ ওপৰিও গান শুনা, চিনেমা চোৱা, বন্ধু সৈতে ইতিবাচক আড্ডা দিয়া আদিত নিজকে ব্যস্ত ৰাখিব পাৰে। ইয়াৰোপৰি অভিজ্ঞ মানসিক চিকিৎসকৰ পৰামৰ্শ গ্ৰহণ কৰাটোও
অত্যন্ত গুৰুত্বপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
