বিহাৰৰ পশু খাদ্য কেলেংকাৰিৰ পঞ্চমটো গোচৰত দোষী সাব্যস্ত হোৱা বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱক পুনৰ পাঁচ বছৰৰ কাৰাদণ্ড আৰু ৬০ লাখ টকাৰ জৰিমনা বিহা হৈছে৷
যোৱা ১৫ ফেব্ৰুৱাৰীত ৰাঁচীৰ চিবিআইৰ বিশেষ আদালতে বিহাৰৰ পশু খাদ্যৰ পঞ্চমটো গোচৰটো অন্য ৩৯ গৰাকীৰ সৈতে প্ৰাক্তন মুখ্যমন্ত্ৰী লালু প্ৰসাদ যাদৱক দোষী সাব্যস্ত কৰিছিল৷
সোমবাৰে আদালতে এই গোচৰৰ আটইকেইজন দোষীৰে শাস্তি ঘোষণা কৰিছে৷ আদালতে শাস্তি ঘোষণা কৰি প্ৰাক্তন মুখ্যমন্ত্ৰী লালু প্ৰসাদ যাদৱক পুনৰ পাঁচ বছৰৰ কাৰাদণ্ড আৰু ৬০ লাখ টকাৰ জৰিমনা বিহিছে৷
উল্লেখ্য যে লালু প্ৰসাদৰ মুখ্যমন্ত্ৰীত্বৰ কালত ১৯৯০ চনত বিহাৰত বিয়াগোম পশু খাদ্য কেলেংকাৰি সংঘটিত হৈছিল৷
প্ৰাক্তন মুখ্যমন্ত্ৰী লালু প্ৰসাদ যাদৱ আৰু তেওঁৰ সহযোগীসকলৰে তেতিয়াৰ বিহাৰৰ কে’বাটাও কোষাগাৰৰ পৰা পশু খাদ্যৰ নামত ১৩৯.৫ কোটি টকা নীতি বৰ্হিভূতভাৱে উলিয়াই নি সেই বিয়াগোম কেলেংকাৰি সংঘটিত কৰা তথ্য প্ৰমাণ পোৱা গৈছে৷
ইফালে প্ৰাক্তন মুখ্যমন্ত্ৰী লালু প্ৰসাদ যাদৱ বিৰুদ্ধে উক্ত কেলেংকাৰি অন্য এটা গোচৰ এতিয়াও বিচাৰাধীন হৈ আছে৷ ভগলপুৰ কোষাগাৰৰ পাৰ পশু খাদ্যৰ নামত ধন উলিয়াই নিয়া অন্য এটা গোচৰ পাটনাৰ চিবিআইৰ আদালতত বিচাৰাধীন হৈ আছে৷
ইয়াৰ পূৰ্বে বিহাৰ প্ৰাক্তন মুখ্যমন্ত্ৰীগৰাকী পশু খাদ্য কেলেংকাৰিৰ চাৰিটা গোচৰত দোষী প্ৰমাণিত হৈ কাৰাবাস খাটি আছিল যদিও কিছু মাহৰ পূৰ্বে জামিনত মুক্তি লাভ কৰিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
