লতা মঙ্গেছকাৰ আৰু আশা ভোঁছলে৷ ভাৰতীয় সংগীত জগতৰ দুই উজ্জ্বল নক্ষত্ৰ৷ তেজৰ সম্পৰ্কৰ বান্ধোনেৰে বন্ধা দুয়োৰে সম্পৰ্ক৷ কিন্তু এই দুই নাম উচ্চাৰিত হ’লেই প্ৰতিদ্বন্দ্বিতাৰ প্ৰসংগও প্ৰকট হৈ উঠে৷ তেওঁলোকৰ সম্পৰ্ক আছিল ভালপোৱাৰ, সম্পৰ্ক আছিল প্ৰতিযোগিতাৰ৷ এই সম্পৰ্কত আছিল দূৰত্ব আৰু বিতৰ্কও৷ এক জটিল মেৰপেছেৰে বন্ধা আছিল দুই বায়েক ভনীয়েকৰ সম্পৰ্ক৷
দীননাথ মঙ্গেছকাৰৰ পাঁচ সন্তানৰ ভিতৰত জ্যেষ্ঠ কন্যা লতা মঙ্গেছকাৰৰ কান্ধত খুবেই কম বয়সতে আহিছিল পৰিয়াল চলোৱাৰ দায়িত্বভাৰ৷ পিতৃৰ অকালপ্ৰয়াণৰ পাছতেই তেওঁৰ কান্ধত আহিছিল পৰিয়ালটোক চলোৱাৰ দায়িত্ব৷ কাৰণ তেওঁ যে আছিল জ্যেষ্ঠ কন্যা৷
খুবেই কম বয়সৰ পৰা জীৱনৰ কঠিন বাস্তৱৰ মুখামুখি হোৱা, ভায়েক ভনীয়েকৰ বিষয়ে লতা মঙ্গেছকাৰ আছিল স্বভাৱতেই ৰক্ষণশীল আৰু দায়িত্বশীল৷ সেই কাৰণেই বোধহয় মানি ল’ব পৰা নাছিল সৰু ভনীয়েক আশা ভোঁছলেৰ মাত্ৰ ১৬ বছৰ বয়সত বিবাহ কৰোৱাৰ সিদ্ধান্তক৷ সেই ঘটনাকেই বহুতে ধাৰণা কৰে যে মঙ্গেছকাৰ পৰিয়ালত সাময়িক দূৰত্বৰ সূচনা হিচাপে৷ যাৰ প্ৰভাৱ পৰিছিল দুই ভনীয়েকৰ সম্পৰ্কতো৷
নাছৰিন মুন্নি কবীৰৰ সাক্ষাৎকাৰভিত্তিক গ্ৰন্থ লতা মঙ্গেছকাৰ ইন হাৰ ঔন ভয়েছ (Lata Mangeshkar: In Her Own Voice)-ত আশা ভোঁছলেই উল্লেখ কৰিছে যে, শৈশৱত ভায়েকভনী য়েকসকলৰ মাজত তেওঁ আছিল লতা মঙ্গেছকাৰৰ অতিকৈ মৰমৰ৷ লতা মঙ্গেছকাৰে তেওঁক কোলাত লৈ সকলো সময়তে ফুৰিছিল৷ একেলগে শিল্পী হিচাপে লতা মঙ্গেছকাৰৰ প্ৰতি তেওঁৰ গভীৰ শ্ৰদ্ধাৰ আভাষো সেই গ্ৰন্থত পোৱা যায়৷ লতাজীৰ প্ৰতিভাক সৰ্বোচ্চ আসনত তেওঁ সদায়ে বহুৱাই আহিছে৷
এক সাক্ষাৎকাৰত লতা মঙ্গেছকাৰে নিজেই এক সাক্ষাৎকাৰত জনাইছিল যে সৰু ভনীয়েক আশাৰ প্ৰথম স্বামী গণপতৰাও ভোঁছলেৰ কাৰণেই তেওঁলোকৰ মাজত ভুল বুজাবুজিৰ সূত্ৰপাত৷ শুনা যায় যে গণপতৰাওৰ ধাৰণা আছিল যে লতা মঙ্গেছকাৰৰ জনপ্ৰিয়তাৰ বাবেই কামৰ সুযোগ পোৱা নাই আশাই৷ চল্লিছৰ দশকৰ শেষদিশত দুই ভনীয়েকে একেলগে সংগীতজগতত প্ৰৱেশ কৰিলেও পাঁচ আৰু ছয় দশকত লতাই দ্ৰুত শীৰ্ষলৈ যায়৷ সেই সময়ত আশা ভোঁছলেই নিজৰ স্থান তৈয়াৰ কৰিবৰ বাবে যথেষ্ট সংগ্ৰাম কৰিব লগা হৈছিল৷ সেই পৰিস্থিতিতেই গণপতৰাওৱে আশাক মঙ্গেছকাৰ পৰিয়ালৰ সৈতে যোগাযোগ ৰখাত বাধা দিয়ে৷ আনকি ঘৰলৈ অহা যোৱাও বন্ধ কৰাই দিয়ে৷ ফলত দুই ভনীয়েকৰ মাজৰ দূৰত্ব আৰু বাঢ়ি যায়৷
ইয়াতেই প্রশ্ন হয়, সংগীতজগতত সঁচায়ে লতা আৰু আশা প্ৰতিদ্বন্দ্বী আছিল নেকি? এই জল্পনাক লৈ এক সাক্ষাৎকাৰত নিজেই মুখ খুলিছিল আশাই৷ তেওঁ কৈছিল, বাইদেও লতা মঙ্গেছকাৰে কেৱল তেওঁৰ পৰিয়ালৰ সদস্যই নহয়, তেওঁ মোৰ প্ৰিয় শিল্পীও৷ মানুহৰ মাজত গল্প তৈয়াৰ কৰাৰ প্ৰৱণতা আছে৷ অকাৰণে সমস্যা তৈয়াৰ হৈছিল৷ কিন্তু তেজৰ সম্পৰ্ক সকলোৰে ঊৰ্ধ্বত৷’
এক সাক্ষাৎকাৰত তেওঁ তেওঁ এক অভিজ্ঞতাৰ কথাও উল্লেখ কৰিছে৷ বহুবান এনে হৈছে যে কোনো অনুষ্ঠানত একেলগে গীত গালেও ইণ্ডাষ্ট্ৰিৰ কিছু মানুহে কেৱল লতাৰ সৈতে কথা পাতে আৰু তেওঁক উপেক্ষা কৰে৷ যেনে তেওঁলোকে কামেৰে প্ৰমাণ দিছিল যে তেওঁলোক লতাৰ পক্ষত৷ এই ঘটনাসমূহক লৈ দুই ভনীয়েকৰ মাজত কথাবতৰাও হৈছিল বুলি জনাইছে আশাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
