২০২৪ৰ লোকসভা নিৰ্বাচনৰ সংখ্যাগৰিষ্ঠতা দখল কৰি তৃতীয়বাৰৰ বাবে দেশৰ প্ৰধানমন্ত্ৰী হ’ল নৰেন্দ্ৰ মোডী । দেওবাৰে (০৯ জুন)ত শপত গ্ৰহণ কৰাৰ পিছত সোমবাৰে (১০ জুন)ত মন্ত্ৰণালয় ভাগ কৰি দিয়ে প্ৰধানমন্ত্ৰীয়ে৷ লোকসভাৰ অধ্যক্ষ নিৰ্বাচনৰ ওপৰতে এতিয়া সকলোৰে দৃষ্টি নিবদ্ধ হৈ আছে। সেই সন্দৰ্ভত ৰাষ্ট্ৰপতি দ্ৰৌপদী মুৰ্মুৱে জাৰি কৰিছে এক অধিসূচনা। ২৬ জুনত অনুষ্ঠিত হ’ব এই লোকসভা অধ্যক্ষৰ নিৰ্বাচন।
২৭ তাৰিখে সংসদৰ দুয়োটা সদনতে উপস্থিত থাকিব ৰাষ্ট্ৰপতি দ্ৰৌপদী মুৰ্মূ৷ পুৱা ১১ বজাত আছে ৰাষ্ট্ৰপতিৰ ভাষণ। অৰ্থাৎ ইয়াৰ পূৰ্বে সকলো নৱনিৰ্বাচিত লোকসভা সাংসদে শপত গ্ৰহণ কৰাৰ সমান্তৰালকৈ নতুন অধ্যক্ষও নিৰ্বাচিত হ’ব লাগিব৷ ২৪ আৰু ২৫ জুনত নতুন সাংসদসকলে শপত গ্ৰহণ কৰিব।
লোকসভাৰ অধ্যক্ষ পদত কোন থাকিব?
ভাৰতীয় জনতা পাৰ্টিয়ে লোকসভাৰ অধ্যক্ষ পদ নিজৰ মানুহেই ৰাখিব বিচাৰিছে৷ অৰ্থাৎ বিজেপিৰ এজন সাংসদেই লোকসভাৰ অধ্যক্ষ নিৰ্বাচিত হোৱাটোৱেই নিশ্চিত। ইফালে এই চৰ্চিত খবৰক নস্যাৎ কৰি বিজেপিৰ এগৰাকী জ্যেষ্ঠ নেতাই কয় যে, লোকসভাৰ অধ্যক্ষ পদৰ বাবে কোনো মিত্ৰ দলৰ পৰা দাবী অহা নাই। বিজেপিয়ে সেয়ে প্ৰথমে দলীয় পৰ্যায়ত বিবেচনা কৰিব আৰু দলে বিশেষ ব্যক্তিজনক চিনাক্ত কৰাৰ পাছত এন ডি এৰ মিত্ৰৰ সৈতেও আলোচনা কৰি সেই নামৰ ওপৰত এক ঐকমত্য গঠন কৰিব৷
মোদী চৰকাৰৰ প্ৰথম কাৰ্যকালত মধ্যপ্ৰদেশৰ ইন্দোৰৰ পৰা বিজেপিৰ লোকসভাৰ সাংসদ সুমিত্ৰা মহাজন অধ্যক্ষ নিৰ্বাচিত হৈছিল আৰু দ্বিতীয় কাৰ্যকালত ৰাজস্থানৰ কোটাৰ পৰা বিজেপিৰ সাংসদ ওম বিৰলা লোকসভাৰ অধ্যক্ষ নিৰ্বাচিত হৈছিল৷ কিন্তু এইবাৰ অৰ্থাৎ তৃতীয় কাৰ্যকালত বিজেপিৰ ২০১৪ আৰু ২০১৯ চনৰ দৰে লোকসভাত সংখ্যাগৰিষ্ঠতা নাই, সেয়েহে অনুমান কৰা হৈছে যে টিডিপিয়ে লোকসভাৰ অধ্যক্ষ পদৰ দাবী ৰাখিব পাৰে। একাংশই আকৌ জেডিইউৰ কোনো সাংসদ লোকসভাৰ অধ্যক্ষ নিৰ্বাচিত হ’ব বুলিও বাতৰি প্ৰকাশ কৰিছে৷
২৪ জুনৰ পৰা আৰম্ভ হ’ব সংসদৰ অধিৱেশন
সূত্ৰ অনুসৰি প্ৰধানমন্ত্ৰী নৰেন্দ্ৰ মোদীয়ে বিদেশ ভ্ৰমণৰ পৰা উভতি অহাৰ পিছতে লোকসভাৰ নতুন অধ্যক্ষৰ নাম ঘোষণা কৰা হ’ব৷ ২৪ জুনৰ পৰা আৰম্ভ হ’বলগীয়া ১৮ সংখ্যক লোকসভাৰ প্ৰথম অধিৱেশনৰ সময়ত বিজেপিয়েও নিজৰ দলৰ যিকোনো সাংসদৰ নাম প্ৰস্তাৱ ৰাখিব৷ লোকসভাৰ নতুন অধ্যক্ষক সৰ্বসন্মতিক্ৰমে বাছনি কৰা হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
