এইবাৰ মেগাষ্টাৰ অমিতাভ বচ্চনৰ সৈতে একেলগে দেখা যাব অসম কন্যা লাভলীনাক

কমনৱেলথ গেমছ ২০২৬ত দেশৰ বাবে পদক জয় কৰি চৰ্চালৈ অহা তিনিগৰাকী ভাৰতীয় ক্ৰীড়াবিদ— শ্বর্মিলা ধনখড়, লাভলীনা বৰগোহাঁই আৰু ঝণ্ডু কুমাৰক এইবাৰ জনপ্ৰিয় কুইজ শ্ব’ ‘কৌন বনেগা ক্ৰোড়পতি’ (KBC)ৰ হট ছিটত বলীউডৰ মহাতাৰকা তথা কিংবদন্তি অভিনেতা অমিতাভ বচ্চনৰ সন্মুখত দেখা যাব।

তিনিওগৰাকী পদক বিজেতাই অমিতাভ বচ্চনৰ সন্মুখত KBCৰ আইকনিক ‘হট ছিট’ত বহাৰ সুযোগ লাভ কৰিব। গ্লাছগোত অনুষ্ঠিত কমনৱেলথ গেমছ ২০২৬ৰ পদক বিজেতাসকলক লৈ বিশেষভাৱে প্ৰস্তুত কৰা এই খণ্ডটো সোনকালেই সম্প্ৰচাৰ হোৱাৰ সম্ভাৱনা আছে। এই বিশেষ খণ্ডত ক্ৰীড়াবিদ তিনিগৰাকীয়ে কেৱল তেওঁলোকৰ ক্ৰীড়া সফলতাৰ কথাই নহয়, জীৱনসংগ্ৰাম, বাধা-বিঘিনি আৰু সপোন পূৰণৰ যাত্ৰাৰ কথাও দৰ্শকৰ সৈতে ভাগ-বতৰা কৰিব।

শ্বর্মিলা ধনখড়

পেৰা-এথলীট শ্বর্মিলা ধনখড়ে কমনৱেলথ গেমছ ২০২৬ৰ F57 শ্বট পুট ইভেণ্টত স্বৰ্ণ পদক জয় কৰি দেশলৈ গৌৰৱ কঢ়িয়াই আনিছিল। তেওঁৰ জীৱন কাহিনী বিশেষভাৱে অনুপ্ৰেৰণাদায়ক। ঘৰুৱা হিংসাৰ দৰে কঠিন পৰিস্থিতিৰ পৰা ওলাই আহি ক্ৰীড়াৰ জৰিয়তে নিজৰ পৰিচয় গঢ়ি তোলা শ্বর্মিলা আজি দেশৰ বহু মহিলাৰ বাবে প্ৰেৰণাৰ উৎস হৈ পৰিছে। তেওঁৰ এই যাত্ৰাই প্ৰমাণ কৰিছে যে জীৱনত যিমানেই প্ৰতিকূলতা নাহক কিয়, দৃঢ় সংকল্প আৰু পৰিশ্ৰমেৰে নিজৰ সপোন বাস্তৱায়িত কৰিব পাৰি।

লাভলীনা বৰগোহাঁই

অসমৰ গৌৰৱ তথা ভাৰতীয় বক্সাৰ লাভলীনা বৰগোহাঁয়েও কমনৱেলথ গেমছ ২০২৬ত উজ্জ্বল প্ৰদৰ্শন আগবঢ়াইছিল। মহিলাৰ ৭৫ কিলোগ্ৰাম শাখাত তেওঁ ৰূপৰ পদক জয় কৰে। আন্তঃৰাষ্ট্ৰীয় মঞ্চত ইতিমধ্যে নিজৰ দক্ষতাৰ পৰিচয় দিয়া লাভলীনাৰ বাবে এই পদক আছিল আন এক উল্লেখযোগ্য সফলতা। KBCৰ মঞ্চত তেওঁৰ ক্ৰীড়া জীৱনৰ অভিজ্ঞতা আৰু সফলতাৰ আঁৰৰ কঠোৰ পৰিশ্ৰমৰ কাহিনী শুনিবলৈ পোৱাৰ সম্ভাৱনা আছে। অনুষ্ঠানটোতে লাভলীনা বৰগোহাঁয়ে অমিতাভ বচ্চনক এখন গামোচাৰে সম্বৰ্ধনা জনোৱাৰ লগতে অসম গৌৰৱ গঁড়ৰ এটা প্ৰতিকৃতিও উপহাৰস্বৰূপে আগবঢ়ায়।

ঝণ্ডু কুমাৰ

পেৰা-পাৱাৰলিফ্টাৰ ঝণ্ডু কুমাৰেও কমনৱেলথ গেমছ ২০২৬ত দেশৰ বাবে ব্ৰঞ্জৰ পদক লাভ কৰে। পুৰুষৰ হেভিৱেট শাখাত তেওঁ ১৯০ কিলোগ্ৰামৰ শ্ৰেষ্ঠ লিফ্ট প্ৰদৰ্শন কৰে, যিটো ১৩০.৯ পইণ্টৰ সমান আছিল। তেওঁৰ এই প্ৰদৰ্শনৰ জৰিয়তে ভাৰতীয় দলটোৱে প্ৰতিযোগিতাখনত প্ৰথমটো পদক লাভ কৰিবলৈ সক্ষম হৈছিল। ঝণ্ডু কুমাৰৰ সফলতাও কঠোৰ পৰিশ্ৰম, অধ্যৱসায় আৰু আত্মবিশ্বাসৰ এক উৎকৃষ্ট উদাহৰণ।

KBCৰ হট ছিটত শ্বর্মিলা ধনখড়, লাভলীনা বৰগোহাঁই আৰু ঝণ্ডু কুমাৰৰ উপস্থিতিয়ে অনুষ্ঠানটোক আৰু অধিক বিশেষ কৰি তুলিব বুলি আশা কৰা হৈছে। তেওঁলোকৰ জীৱনসংগ্ৰাম আৰু সফলতাৰ কাহিনীয়ে বিশেষকৈ দেশৰ যুৱ প্ৰজন্মক নিজৰ লক্ষ্যৰ দিশে আগবাঢ়ি যাবলৈ নতুন উৎসাহ আৰু সাহস যোগাব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ