মহাভাৰতৰ অন্যতম শ্ৰেষ্ঠ বীৰ আছিল অৰ্জুন৷ তেওঁৰ ধনুৰ নাম আছিল গাণ্ডীৱ৷ এই ধনুৰ সহায়ত একেলগে বহু যোদ্ধাক তেওঁ পৰাজিত কৰিব পাৰিছিল৷ মহাভাৰতৰ অন্যতম উল্লেখযোগ্য পৰ্ব হৈছে অৰ্জুন আৰু কৰ্ণৰ দ্বৈৰথ৷ সূৰ্য পুত্ৰ কৰ্ণও আছিল মহাভাৰতৰ অন্যতম শ্ৰেষ্ঠতম বীৰ৷ কৰ্ণৰ ধনুৰ নাম আছিল বিজয়৷ অৰ্জুন নে কৰ্ণ বীৰত্বৰে কোন শ্ৰেষ্ঠ সেই প্ৰশ্ন বাৰে বাৰে উত্থাপিত হৈ আহিছে৷ যুদ্ধক্ষেত্ৰত নিৰস্ত্ৰ অৱস্থাত কৰ্ণক বধ কৰি কলংকৰ দাগ লাগিছিল অৰ্জুনৰ গাত৷ অৰ্জুনৰ গাণ্ডীৱ আৰু কৰ্ণৰ বিজয়ৰ মাজত কোনখন ধনু বেছি শক্তিশালী? কুৰুক্ষেত্ৰৰ যুদ্ধৰ ১৭তম দিনত এনে কি ঘটনা ঘটিছিল?
কাৰ পৰা গাণ্ডীৱ পাইছিল অৰ্জুন?
অৰ্জুনৰ গাণ্ডীৱক লৈ নানান গল্প আছে৷ ইয়াৰ মাজত এক কাহিনী অনুসৰি খাণ্ডৱপ্ৰস্থৰ জংঘলত এই ধনু পৰি থকা দেখিছিল পাণ্ডৱে৷ অৰ্জুনক বাদ দি এই ধনু কোনোৱে দাঙিব নোৱাৰিলে৷ অৰ্জুনে যেতিয়া এই গাণ্ডীৱ হাতত তুলি লৈছিল তেতিয়া শ্ৰীকৃষ্ণই কৈছিল, ‘এই ধনু তুমি অবিহনে কোনোৱে দাঙিব নোৱাৰে৷ আৰু তুমিয়েই ইয়াৰ মালিক৷’ গাণ্ডীৱৰ ওপৰিও অৰ্জুনৰ এখন তুনীৰো আছিল যাৰ তীৰ কেতিয়াও শেষ নহয়৷
কাৰ পৰা বিজয় পাইছিল কৰ্ণই?
কৰ্ণৰ ধনু বিজয়ো আছিল অত্যন্ত শক্তিশালী৷ স্বয়ং বিশ্বকৰ্মাই এই ধনু নিৰ্মাণ কৰিছিল৷ মহাদেৱক প্ৰসন্ন কৰি এই ধনু লাভ কৰিছিল কৰ্ণই৷ এই বিজয় হাতত থাকিলে কোনোৱে কৰ্ণক হত্যা কৰিব নোৱাৰে৷
গাণ্ডীৱৰ বিশেষত্ব কি?
অৰ্জুনৰ গাণ্ডীৱৰ ইমানেই জোৰ আছিল যে সমগ্ৰ যুদ্ধক্ষেত্ৰত গাণ্ডীবলৈ সকলোৰে ভয় আছিল৷ অৰ্জুনৰ তুনীৰত এনে কিছু তীৰ আছিল যি তীৰে লক্ষ্যভেদ কৰি আকৌ উভতি আহি তুনীৰত সোমাই থাকে৷ এটা তীৰ এৰিলে এটাৰ পৰাই বহু তীৰ উৎপন্ন হয়৷ অৰ্জুন পুষ্পাস্ত্ৰ, নাৰায়ণাস্ত্ৰ আৰু ব্ৰহ্মাস্ত্ৰ এৰিব পাৰিছিল এই গাণ্ডীৱে৷
বিজয়ৰ বিশেষত্ব
এই ধনুৰ বিজয় আছিল বাবেই কৰ্ণক বিজয়ধাৰী বুলিও কোৱা হয়৷ বিজয়ৰ পৰা এৰা তীৰ কোনো ৰথ বা অন্য বস্তুত লাগিলে সেয়া ধ্বংস কৰি পেলায়৷ বিজয় ইমানেই শক্তিশালী যে এই ধনুৰ হাতত ধৰিলে তাৰ চৌপাশে এটা বলয় তৈয়াৰ হয় সেই বলয় ভেদ কৰা কোনো অস্ত্ৰৰ পক্ষে সম্ভৱ নহয়৷
কাৰ ধনু শ্ৰেষ্ঠ?
শ্ৰীকৃষ্ণই কৈছিল যে বিজয় থাকিলে কৰ্ণক বধ কৰা সম্ভৱ নহয়৷ কিন্তু কৰ্ণই যেতিয়া অৰ্জুনক লক্ষ্য কৰি তীৰ এৰিছিল তেতিয়া অৰ্জুনৰ ৰথ কেইবাহাত পিছুৱাই গৈছিল৷ অৰ্জুনে তেতিয়া কৈছিলস ‘কৰ্ণই এৰা তীৰৰ আঘাতত আমাৰ ৰথ কেইবাহাত পিছুৱাই গ’ল৷ অৱশ্যে আমাৰ কোনো ক্ষতি হোৱা নাই৷’ কৃষ্ণই তেতিয়া কৈছিল, ‘অৰ্জুন তোমাৰ ৰথৰ সাৰথি মই, ৰথৰ শীৰ্ষত বহি আছে হনুমান৷ সেয়ে কৰ্ণৰ তীৰৰ আঘাতত কেৱল তোমাৰ পথ পিছুৱাই গৈছে৷ তুমি বুজিব পাৰিছা, কৰ্ণৰ ধনু বিজয়ৰ কিমান ক্ষমতা?’ কুৰুক্ষেত্ৰৰ যুদ্ধৰ ১৭ তম দিনত এই ঘটনা ঘটিছিল৷ ইয়াৰপাছতেই কৰ্ণৰ ৰথৰ চকা মাটিত বহি যায় আৰু বিজয় এৰি ৰথৰ পৰা নামি চকা তোলাৰ চেষ্টা কৰে কৰ্ণই৷ সেই সুযোগতেই নিৰস্ত্ৰ কৰ্ণক তীৰেৰে বধ কৰে অৰ্জুনে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
