বেংক লকাৰত নগদ টকা ৰাখিব পাৰিনে? লকাৰৰ পৰা মূল্যবান সামগ্ৰী নষ্ট হ’লে বা হেৰালে বেংকে কি ক্ষতিপূৰণ দিয়ে? জানি থওক সবিশেষ তথ্য

RBIয়ে ২০২২ চনৰ আগষ্ঠত ছেফ ডিপোজিট লকাৰৰ বাবে সংশোধিত নিয়ম জাৰি কৰিছিল, যি ২০২৩ চনৰ জানুৱাৰীৰ পৰা পুৰণি লকাৰ ধাৰকসকলৰ বাবে আৰু ২০২২ চনৰ জানুৱাৰীৰ পৰা নতুন গ্ৰাহকসকলৰ বাবে কাৰ্যকৰ হৈছে৷ এই নিয়মসমূহৰ অধীনত নতুন ষ্টাম্প পেপাৰত গ্ৰাহকৰ সৈতে লকাৰ চুক্তি সম্পন্ন কৰা বেংকসমূহৰ বাবে এতিয়া বাধ্যতামূলক৷ বেংকসমূহে এবাৰত সৰ্বোচ্চ তিনি বছৰৰ বাবে ভাড়া আদায় কৰিব পাৰে৷ বেংকে খালী লকাৰ আৰু ৱেইটিং লিষ্ট সম্পৰ্কেও তথ্য প্ৰকাশ কৰিব লাগে৷

আৰ বি আইৰ নিয়ম অনুসৰি বেংকৰ অৱহেলা বা নিৰাপত্তাৰ ত্ৰুটিৰ কাৰণে লকাৰত ৰখা সামগ্ৰী ক্ষতিগ্ৰস্থ হ’লে ক্ষতিপূৰণ বেংকে ভৰিব লাগে৷ জুই লগা, চুৰি হোৱা, ডকাইতি আদিৰ বাবে বেংক দায়ী৷ বন্যা বা ভূমিকম্পৰ দৰে প্ৰাকৃতিক দুৰ্যোগত বেংক লকাৰত ৰখা সামগ্ৰী নষ্ট হ’লে তাৰবাবে অৱশ্যে বেংক দায়ী নহয়৷ জানি থোৱা প্ৰয়োজন যে লকাৰত ৰখা কোনো সামগ্ৰী হেৰাই গ’লে বা নষ্ট হৈ গলে বেংকে সেই সামগ্ৰীৰ সম্পূৰ্ণ মূল্য গ্ৰাহকক নিদিয়ে৷ বাৰ্ষিক ভাড়াৰ মাত্ৰ ১০০ গুণ পৰ্যন্তহে ক্ষতিপূৰণ দিয়া হয়৷ যদি লকাৰৰ বাৰ্ষিক ভাড়া ১০০০ টকা হয় তেন্তে সৰ্বোচ্চ ক্ষতিপূৰ্ণ ১ লাখ টকা পৰ্যন্ত হ’ব পাৰে৷