কোনো বিবাহিত পুৰুষে যদি কোনো প্ৰাপ্তবয়স্ক মহিলাৰ সৈতে পাৰস্পৰিক সন্মতিত একত্ৰবাস বা লিভ-ইনত থাকে তেন্তে সেয়া অপৰাধ নহয়৷ এক গোচৰত এই পৰ্যবেক্ষণ এলাহবাদ হাইকৰ্টৰ৷ আদালতে নিৰ্দেশত জনাইছে যে একত্ৰবাসকাৰী সেই যুগলৰ বিৰুদ্ধে কোনো ফৌজদাৰি গোচৰ তৰিব নোৱাৰিব৷ ইয়াৰ সৈতে আৰক্ষীক তেওঁলোকৰ নিৰাপত্তা সুনিশ্চিত কৰাৰো নিৰ্দেশ দিছে হাইকৰ্টে৷
উত্তৰপ্ৰদেশৰ শ্বাহজাহানপুৰৰ এক লিভ-ইন যুগলৰ বিৰুদ্ধে আদালতৰ দ্বাৰস্থ হৈছিল মহিলাৰ পৰিয়াল৷ লিভ-ইন সম্পৰ্কত থকাৰ বাবে তেওঁলোকৰ বিৰুদ্ধে ফৌজদাৰী গোচৰো তৰা হয়৷ কাৰণ পুৰুষ সংগীজন বিবাহিত৷ আদালতে পৰ্যবেক্ষণত জনাই যে নৈতিকতা আৰু আইন পৃথক৷ আদালতৰ পৰ্যবেক্ষণ, আইন অনুসৰি সেই ব্যক্তিয়ে কোনো অপৰাধ কৰা নাই৷ আদালতে লগতে কৈছে নাগৰিকসকলৰ অধিকাৰ ৰক্ষাৰ বাবে গৃহীত পদক্ষেপ কেতিয়াও সামাজিক মতামত বা নৈতিকতাৰে পৰিচালিত হব নোৱাৰে৷
আদালতে আৰক্ষীক নিৰ্দেশ দিছে আবেদনকাৰীক গ্ৰেপ্তাৰ কৰিব নোৱাৰিব৷ কেৱল সেয়াই নহয়, তেওঁৰ পৰিবাৰো সতৰ্ক হৈ থাকক৷ ফৌজদাৰী গোচৰ তৰাসকলে যাতে সেই যুগলৰ কোনো ক্ষতি কৰিব নোৱাৰে সেয়া নিশ্চিত কৰিব লাগিব আৰক্ষীয়ে৷ ইয়াৰোপৰি দুই পৰিয়ালৰ কোনোৱে সেই যুগলৰ ঘৰত প্ৰৱেশ বা যোগাযোগ কৰিব নোৱাৰিব৷ সেই নিৰ্দেশো দিছে আদালতে৷ আদালতৰ মতে, তেওঁলোকৰ নিৰাপত্তা নিশ্চিত কৰাৰ দায়িত্ব স্থানীয় আৰক্ষী প্ৰশাসনৰ৷
আদালতত আবেদন কৰিছিল অনামিক আৰু নেত্ৰপালে৷ গোচৰৰ বিৱৰণ অনুসৰি বিগত ৮ জানুৱাৰীত অনামিকাৰ মাতৃ কান্তিয়ে শ্বাহজানপুৰৰ জৈতিপুৰ থানাত এখন অভিযোগ দাখিল কৰিছিল৷ অভিযোগ যে তেওঁৰ কন্যাক প্ৰলোভন দেখুৱাই নেত্ৰপালে লৈ গৈছে৷ ভাৰতীয় ন্যায় সংহিতাৰ বিএন এছ ৮৭ ধাৰাত এই গোচৰ ৰুজু হয়৷ সেই গোচৰক চেলেঞ্জ কৰি আদালতৰ দ্বাৰস্থ হয় লিভ ইন যুগল৷
হাইকৰ্টত জনোৱা হয় যে তেওঁলোক দুজনেই প্ৰাপ্তবয়স্ক৷ বৰ্তমান দুয়ো পাৰস্পৰিক সন্মতিত একত্ৰবাস কৰি আছে৷ ইফালে অনামিকাৰ মাতৃৰ অভিযোগ আছিল নেত্ৰপাল বিবাহিত৷ সেইক্ষেত্ৰত অন্য মহিলাৰ সৈতে সহবাস কৰা ফৌজদাৰী অপৰাধ৷ কিন্তু শুনানিত আদালতৰ পৰ্যবেক্ষণ, নেত্ৰপালে সঁচাকৈয়ে যদি পাৰস্পৰিক সন্মতিত কোনো প্ৰাপ্তবয়স্কৰ সৈতে একত্ৰবাস কৰে তেতিয়া সেয়া ফৌজদাৰী অপৰাধৰ আওতাত নপৰে৷ এলাহবাদ হাইকৰ্টৰ ন্যায়াধীশ জেজে মুনিৰ আৰু ন্যায়াধীশ তৰুণ ছাক্সেনাৰ বেঞ্ছে এই গোচৰৰ শুনানি দিছে৷ আদালতে জনাইছে যে পৰবৰ্তী শুনানি হ’ব ৮ এপ্ৰিলত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
