চিনি পাইনে এইজন বিগ-বছ বিজেতাক, বহু বছৰ সন্ধানহীন হৈ থাকি এতিয়া ধাবা খুলি ব্যৱসায়
একালৰ বৃন্দাবন, একালত পৰে চন। এই কথা হুবহু খাটে এইগৰাকী অসময়ৰ অভিনেতাৰ ক্ষেত্ৰত। এটা সময়ত ভাল নাম থকা, টেলিভিচন জগতত ভাল নাম উপাৰ্জন কৰা অভিনেতাগৰাকী আজি এক অন্য জীৱন হে যাপন কৰি আছে।
দেশৰ অন্যতম জনপ্ৰিয় টেলিভিছন ৰিয়েলিটি অনুষ্ঠান বিগ বছৰ বিজয়ী আজিৰ দিনত এখন সাধাৰণ ধাবা খুলি কোনোমতে জীৱন নিৰ্বাহ কৰি আছে। হয়, ইয়াত আশুতোষ কৌশিকৰ কথা কোৱা হৈছে। আজিৰ দিনত এইগৰাকী বিগ বছ উইনাৰৰ কথা বহু কম লোকেহে জানে।
২০০৭-০৮ চনটো আছিল ৰিয়েলিটি টিভিৰ বাবে এক অনন্য সময়। সেই সময়ত ৰিয়েলিটি আৰু ড্ৰামা শ্ব’বোৰ নতুন আছিল আৰু মানুহৰ মাজত যথেষ্ট জনপ্ৰিয় হৈ পৰিছিল আৰু প্ৰতিযোগীসকল বেছিভাগেই ফিল্টাৰবিহীন আছিল। সেই সময়ত ভাৰতত ৰিয়েলিটি টিভি শ্ব’ৰ সংখ্যাও কম আছিল আৰু ৰিয়েলিটি টিভিও তাৰকাসকলৰ বাবে অতি নতুন আছিল।
সেই সময়ছোৱাত এটা নাম বহুত চৰ্চালৈ আহিছিল। সকলোৱে একেখন মুখৰ কথা কৈ আছিল। সেই নাম আছিল আশুতোষ কৌশিক। উত্তৰ প্ৰদেশৰ চাহাৰনপুৰৰ এই যুৱকে এটা নহয়, একেলগে দুটাকৈ ডাঙৰ ৰিয়েলিটি শ্ব’ত জয়ী হৈ ৰাতিটোৰ ভিতৰতে তাৰকালৈ পৰিণত হৈছিল, কিন্তু সফলতাৰ চিৰি যিমান বেগেৰে বগাই উঠিল সিমান বেগেৰে তললৈ সৰি পৰিল আশুতোষ।
প্ৰথমে ২০০৭ চনত ২৫ বছৰীয়া আশুতোষে এমটিভি ৰ’ডিজৰ পঞ্চম ছিজনত অংশগ্ৰহণ কৰিছিল। তেওঁৰ নিৰ্ভীকতা আৰু প্ৰকৃততাই তেওঁক অনুৰাগীৰ প্ৰিয় কৰি তুলিছিল আৰু সহজেই সেই ছিজনত জয়ী হৈ ট্ৰফী লাভ কৰিছিল।
ইয়াৰ পিছত ২০০৮ চনত বিগ বছ ছিজন ২ত অংশগ্ৰহণ কৰে আশুতোষে। য’ত মনিকা বেদী আৰু ৰাহুল মহাজনৰ দৰে প্ৰবীণ তাৰকা আশুতোষৰ সৈতে একেলগে এখন ঘৰত বন্দী হৈছিল। এই অনুষ্ঠানতো আশুতোষে পুনৰবাৰ নিজৰ সৰলতা আৰু প্ৰকৃত স্বৰূপেৰে নিজকে প্ৰমাণ কৰি এই শ্ব’ৰ প্ৰথমজন নন-চেলিব্ৰিটি বিজয়ী হিচাপে পৰিগণিত হয়। এয়া আছিল আশুতোষৰ কেৰিয়াৰৰ শিখৰ ,কিন্তু দুৰ্ভাগ্যজনকভাৱে আগন্তুক পথ কঠিন বুলি প্ৰমাণিত হয় কেৰিয়াৰৰ ক্ষেত্ৰত।
২০০৯ চনত মদ্যপান কৰি বাইক চলোৱাৰ অপৰাধত গ্ৰেপ্তাৰ হোৱা আশুতোষৰ কেৰিয়াৰৰ পতন আৰম্ভ হয়। আদালতত তেওঁক দোষী সাব্যস্ত কৰি এদিনৰ কাৰাদণ্ড বিহা হয়। ইয়াৰ পিছত আশুতোষে সৰু সৰু চৰিত্ৰৰ জৰিয়তে পুনৰ অনুৰাগীৰ মাজলৈ উভতি আহিবলৈ চেষ্টা কৰে।
‘লাল ৰং’, ‘জিলা গাজিয়াবাদ’, ‘শ্বৰ্টকাট ৰোমিঅ’ আদি ছবিত পাৰ্শ্ব চৰিত্ৰত অভিনয় কৰা দেখা গৈছিল যদিও তেওঁৰ কামে বিশেষ দৃষ্টি আকৰ্ষণ কৰিব পৰা নাছিল। পিছত এটা সাক্ষাৎকাৰত আশুতোষে নিজেই স্বীকাৰ কৰে যে তেওঁ হঠাতে পোৱা সেই ষ্টাৰডম চম্ভালিব নোৱাৰে, সেয়েহে তেওঁ এই সকলো এৰি যোৱাৰ সিদ্ধান্ত লয়।
যাৰ ফলত এটা দশক ধৰি কতো কোনো সন্ধান নোহোৱা হৈ পৰে আশুতোষৰ। সদ্যহতে এটা পোডকাষ্টৰ জৰিয়তে পুনৰ চৰ্চালৈ আহিছে এসময়ৰ এইগৰাকী ৰিয়েলিটি শ্ব’ বিজেতা তাৰকা। বৰ্তমান ৪৩ বছৰীয়া আশুতোষ ছাহাৰানপুৰত বাস কৰি ধাবাৰ ব্যৱসায় চলাই আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
