অসম লাইভ ২৪ঃ সমগ্ৰ দেশৰ লগতে অসমতো ভয়াৱহ হাৰত বৃদ্ধি পাইছে ক’ৰোনা আক্ৰান্তৰ সংখ্যা। মঙলবাৰে ৰাজ্যৰ বিভিন্ন স্থানত ক’ৰোনাত আক্ৰান্ত হৈছে ৯২ গৰাকী লোক। পূৰ্বৰ সকলো ৰেকৰ্ড ভংগ কৰিছে ক’ৰোনাৰ দ্বিতীয় জোৱাৰে। বৰ্তমানলৈকে ৰাজ্যৰ ৬৩৬ গৰাকী নতুন ক’ৰোনা আক্ৰান্ত চিকিৎসাধীন। আনহাতে, ২৪ ঘণ্টাত ভাৰতত ১.১৫ লাখ লোক নতুনকৈ ক’ৰোনাত আক্ৰান্ত হৈছে। দেশৰ ৬ ৰাজ্যত সান্ধ্য আইন জাৰি কৰিছে প্ৰশাসনে। সৰ্বাধিক আক্ৰান্ত হৈছে মহাৰাষ্ট্ৰ, ছত্তীশগড়, কৰ্ণাটক, দিল্লী আৰু উত্তৰ প্ৰদেশত। দেশৰ বিভিন্ন স্থানত মিনি লকডাউন ঘোষণা কৰিছে প্ৰশাসনে। পুনে আৰু মুম্বাইত সন্ধিয়া ৬ বজাৰ পৰা পুৱা ৬ বজালৈ এসপ্তাহৰ সান্ধ্য আইন ঘোষণা। ৰাজধানী দিল্লী, উত্তৰ প্ৰদেশ, মহাৰাষ্ট্ৰ, পাঞ্জাৱ, চণ্ডীগড়, হাৰিয়ানা, বিহাৰ, উত্তৰাখণ্ড, তেলেংগনা, ৰাজস্থান, গুজৰাট, গোৱা, জম্মু-কাশ্মীৰ, হিমাচল প্ৰদেশ, কৰ্ণাটক, মধ্যপ্ৰদেশ, ছত্তীশগড় আৰু ঝাৰখণ্ডত মিনি লকডাউন আৰু সান্ধ্য আইন ঘোষণা। ক’ৰোনাৰ ভয়াৱহ সংক্ৰমণক লৈ উদ্বিগ্ন হৈ পৰিছে নিটি আয়োগ। ভেকচিনেচন অভিযান চলি থকাৰ মাজতে দেশত ক’ৰোনাত আক্ৰান্ত হৈছে লাখ লাখ লোক। কোভিড প্ৰট’কল সন্দৰ্ভতো ৰাজ্যসমূহৰ মুখ্যমন্ত্ৰীলৈ কঠোৰ নিৰ্দেশনা জাৰি কৰিছে প্ৰধানমন্ত্ৰীয়ে। ক’ৰোনাৰ ভয়াৱহ পৰিস্থিতিক লৈ স্বাস্থ্য সচিব, কেন্দ্ৰীয় সচিব আৰু জ্যেষ্ঠ চিকিৎসকৰ সৈতে প্ৰধানমন্ত্ৰী মোদীৰ উচ্চস্তৰীয় বৈঠকৰ পাছতে ৰাজ্যৰ মুখ্যমন্ত্ৰীসকলৰ সৈতেও আলোচনাত মিলিত হয় প্ৰধানমন্ত্ৰীগৰাকী। শিক্ষানুষ্ঠান, সামাজিক অনুষ্ঠানৰ লগতে ধৰ্মীয় অনুষ্ঠানসমূহতো কোভিড প্ৰট’কল মানি চলাৰ নিৰ্দেশ প্ৰদান কৰিছে মিনি লকডাউন ঘোষিত স্থানসমূহত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
